Read Hawaii Pidgin Isaiah 57 Bible Online

Isaiah 57 - Hawaii Pidgin bible

Isaiah 57

¹But da peopo dat get um right wit God, Wen dey mahke, Nobody even stay tink bout dat. Da peopo dat stay tight wit God, He take dem away. But nobody undastan God stay take away da good kine guys too, So dey no suffa from da bad kine stuff Da odda peopo stay do.

²Da peopo dat stay do da right ting erytime, Eryting goin come good fo dem. An dey goin rest good on top dea bed.

³But you guys, come ova hea! Yoa mudda guys, dey go call da spirit From da mahke peopo Fo come tell um wat goin happen bumbye, An dey fool aroun an take money! Yoa fadda guys, dey stay fool aroun Wit wahines dey not married to!

⁴Who you talking about wen you stay make fun a dem? Who you make ugly face at An stick out yoa tongue? Yoa fadda-mudda guys stay go agains erybody! Dey ony bulai.

⁵You guys like fool aroun Unda da kine kapu trees fo da idol kine gods. You guys kill yoa own kids fo da god Molek Down by da streams dat no mo watta, Fo make sacrifice unda da cracks in da cliffs.

⁶An you guys, you jalike one wahine Dat get smooth kine stones from da stream, Fo make yoa idol kine gods. Stone, dass all you get! An fo dem you pour out plenny drink fo sacrifice An give plenny wheat o barley fo sacrifice too. Wen I tink bout all dis stuff, You guys tink I suppose to feel good bout wat you do?! No way!

⁷You guys, jalike one wahine Dat go put her bed on top one real high mountain. An den she go up dea fo make sacrifice an make sex. An you guys, you do same ting too.

⁸You guys ack jalike dat wahine, Dat bring inside da house One ting fo help her rememba her gods. Den she shut da door so nobody can see. You guys make lidat too, Cuz you go way from me, Jalike dat wahine open da cover off her bed An go on top um an make ready. She make one deal wit some guys Fo go dea bed, cuz she like do dat, An like look at dem all naked.

⁹You guys, az how you stay make! Jalike dat wahine wen go By da idol kine god Molek An give him olive oil fo one present. She use all diffren kine perfume. She send her messenja guys far way Fo find new idol kine gods -- Even far, like down to da Mahke Peopo Place! An you guys, do da same ting.

¹⁰You guys go long way fo find new gods, An you come tired from all dat. Jalike da wahine dat no like tell, “All dat, az wase time!” Den she come strong again, So she no pass out.

¹¹Yahweh tell, “Who bodda you guys An make you come scared?! Cuz you guys stay bulai me, An no rememba me, An no even bodda fo tink bout me. Long time I neva say notting. Dass why you guys stay scared a da odda peopo. But you no scared a me, o wat?!

¹²But me, I goin tell erybody Bout all da kine stuff you guys do, Cuz you guys tink you do da right ting. But all dat stuff no goin help you guys notting.

¹³Wen you guys call me fo help, Let da idol kine gods dat you guys wen go get, Get you guys outa trouble! Da wind goin blow all dem away. Jalike ony one guy goin breathe, An dey gone! But whoeva trus me fo hide dem So dey no get hurt, Dey goin get da land, An Mount Zion, dat stay spesho fo me.”

¹⁴Den somebody tell dis too: “Pile up dirt on top da groun fo make road! Make da road ready fo my peopo! Take away all da stuff from on top da road So dat my peopo no fall down]!”

¹⁵Yahweh, da One stay way far up dea Inside da sky, an real importan. He stay alive foeva. He stay good an spesho, cuz dass wat kine God him. He tell: “I live inside da mos high place, Da place dat stay spesho fo me! But still yet, I stay live wit da one Dat stay feel all heavy inside, An know dey notting. Az cuz I like make da peopo dat know dey notting An da ones dat stay feel heavy inside, Come strong inside.

¹⁶Cuz no goin be foeva, Dat I poin finga an stay huhu. Az cuz if I wen stay lidat, Den peopo spirits goin come weak wen dey see me -- I da One wen make dem so dey can breathe lidat.

¹⁷Wen dey do bad kine stuff, An dey come greedy fo get eryting fo demself, I punish dem, An no do notting good fo dem, Cuz I real huhu. But still yet, dey do Wateva dey tink az good.

¹⁸I see how dey make, But still yet, no matta dey stay sick inside, I goin make dem come good! I goin take dem An da ones dat stay bum out So dey no stay sore inside no moa.

¹⁹I goin make da peopo talk diffren [from / den] befo time. Dey goin tell, ‘Da peopo far an nea, Dey goin res inside!’-” An Yahweh tell, “Jalike my peopo stay sick, An I goin make dem come good.”

²⁰But da bad kine guys, Dey jalike da rough sea Wen da wind make big wave An no can stay quiet. Dat kine wave ony throw mud An junk kine stuff on top da beach.

²¹No mo res fo da bad kine guys!” Dass wat Yahweh tell.