Read Hawaii Pidgin Isaiah 58 Bible Online

Isaiah 58 - Hawaii Pidgin bible

Isaiah 58

¹Yahweh tell: “Yell real loud! No hold back! Jalike one trumpet, make um loud! Tell my peopo, da one dat come from Jacob, How dey wen go agains me An do bad kine stuff!

²Me, I da One dey aks wat fo do, ery day! Dey ack like dey really like know how I stay make. Dey ack like dey one peopo Dat stay do wass right erytime, An lissen wat I dea God tell dem fo do, Cuz I da Judge. Dey aks me fo judge da right way fo dem. Dey ack like dey like me, God, Come nea dem.

³Dey tell me, ‘Wase time, Us guys skip food so we can pray, An you neva see dat! Wase time, Us guys make ourself come notting, An you neva know!’ Dass how dey talk. But you know wat you guys do?! Same time you guys skip food, You guys go do wateva you like. You guys even make any kine to all yoa worka guys.

⁴Wen you guys skip food, You guys ony make argue an beef! You no stay pray! You guys hit each odda wit yoa fist Fo do someting bad! If you guys skip food da way you stay do today, No tink you goin make me lissen you, Up hea inside da sky, Cuz I not!

⁵You tink, dat wen I like you skip food, I ony like fo peopo ack like dey notting, An bow down dea head Jalike one reed dat stand up inside da watta, An spread out one burmbag cloth wit ashes on top Fo lay down dea. You guys tink dass all you guys gotta do wen you skip food?! You tink dat goin make me, Yahweh, feel good inside?! No way!

⁶“But dis da way I say gotta be, Wen you guys skip food: Anybody dat stay in jail Cuz da judge, judge um wrong way, Get um outa dea! Anybody gotta carry heavy load Jalike one yoke fo cows fo pull one wagon, Hemo da yoke! Anybody stay suffa cuz dey get plenny presha, Let um go an no make dem slaves again! Broke up all da yokes!

⁷Wen you guys no eat food so you can pray, Share yoa food wit da hungry peopo! Da peopo dat no mo notting an homeless, Take um wea dey can stay! Wen you see peopo dat no mo clotheses, Give um clotheses! An no go hide Wen yoa own ohana guys need help!

⁸Den, wen dass how you make, Goin be jalike wen da sun come up -- Erybody goin see Dat you guys get life from me, Yahweh. All da place you get cut an scratch, New skin goin grow dea real quick. Cuz you stay do da right ting erytime, Dat goin make you so you goin go ahead, An cuz Yahweh stay awesome, He no goin let nobody come [afta / behind] you fo hurt you.

⁹Den you guys goin call, An me, Yahweh, I goin hear an do someting. You guys goin yell fo me help you, An I goin tell, ‘Right hea, I stay!’ “But firs, you guys betta no give da odda guys hard time, Jalike you stay tie one yoke on top one cow! You guys betta no poin finga an talk stink no moa!

¹⁰An you guys betta go all out Fo help da hungry peopo, An take good care da peopo dat get hard time! Den, if you guys make lidat, Peopo goin get life, No matta get bad kine stuff all ova. Jalike you guys stay give one light dat shine Wen eryting stay dark, Fo make da dark places get light all ova, Jalike noon time!

¹¹Yahweh goin show you guys Wea fo go all da time. He goin take care wateva you guys need, No matta da sun stay hot an burn up da land. He goin make you guys stay strong An feel good. You goin be jalike one garden dat get plenny watta, Jalike one watta puka dat no pau come out.

¹²Some a yoa peopo Goin build up again da ol broke up town, An fix up da ol foundation, Dat yoa ancesta guys wen put firs time. Peopo goin call you guys ‘Da guys dat fix da broke up walls, Da guys dat fix da streets So peopo can live dea.’

¹³“You guys gotta make da Res Day spesho fo me. An no go any place mo far den you betta go, An no let yoaself jus do wateva you like dat day, Cuz da whole day stay spesho fo me. You guys gotta tell peopo Dat da Res Day make you feel good inside, An dat stay spesho ony fo me, Yahweh, Fo show respeck fo me lidat. Dis, how you goin show respeck fo da Res Day: You no goin do stuff yoa own way dat day. You no goin look fo ony da kine stuff you like do. You no goin talk any kine waste time stuff,

¹⁴If you guys stay do all dat, Den you guys goin feel good inside Cuz you stay tight wit me, Yahweh. I goin let you guys ride on top da mos high places inside da land, Cuz you guys goin be da ownas. I goin make shua you guys get plenny food fo eat, From da same land Dat I wen make promise Fo give to yoa ancesta Jacob. Dass wat I goin do cuz I Yahweh, An dass wat I tell!”