Read Hawaii Pidgin Isaiah 6 Bible Online

Isaiah 6 - Hawaii Pidgin bible

Isaiah 6

¹Da same year King Uzziah wen mahke, I see my Boss Yahweh sitting on top one throne, way far up dea inside da sky, an looking real importan. An da bottom a his robe fill up da Temple.

²Angel guys dat look like fire, fly up all aroun him. Each one get six wings. Dey cova dea face wit two a dea wings, dea feets wit da odda two wings, an dey fly wit dea two wings.

³Ery angel guy call to da oddas, “Good an Spesho! Spesho! Spesho! Dass Yahweh, Da God Ova All Da Armies, How good an spesho he stay! Eryting inside da whole world, Show how awesome he stay!”

⁴Wen dey yell strong lidat, even da foundation unda da Temple door stay shake an da Temple fill wit smoke.

⁵Den I wen yell, “Auwe fo me! I stay wipe out awready! Da way I stay talk, An da way da peopo I stay wit stay talk, No way us can come in front God! But still yet, I wen see Yahweh da King, Da God Ova All Da Armies.”

⁶Den one a da angel guys dat look jalike fire, fly ova by me wit one red hot charcoal. He wen take um from da altar wit tongs.

⁷He touch da hot charcoal on top my mout an tell, “Now dis charcoal wen touch yoa mout, All da bad tings you wen do, stay gone awready. God wen pay da price Fo hemo from you all dat bad kine stuff.”

⁸Den I hear my Boss tell, “Who I can send? Who goin go fo us?” An I tell, “Me, I can go, Send me.”

⁹An he tell me, “Go den. Tell da peopo dis: ‘Lissen plenny, but you no goin undastan notting! Look plenny, but you no goin learn notting!’

¹⁰Make dem so dey no can tink good, Make dem so dey no can hear good, An shut dea eyes so no can see good. I no like fo dem see wass happening, I no like fo dem start fo lissen, An fo tink good. Cuz if dey wen change, Den dey goin come good, But dey no goin change.”

¹¹Den I aks him, “Boss, how long I gotta do dat?” An he tell, “Till all da towns stay all bus up An no mo peopo live dea, An all da house, no mo peopo inside, An all da land stay dry an all wipe out.

¹²No stop talking till me, Yahweh, Send all da peopo far away place, An get plenny place all ova da land Wea da peopo leave eryting an go way.

¹³But even if still yet get ten percent da peopo dat stay on top da land, Da army guys goin come back one mo time An burn eryting. But, jalike da terebint tree an da oak tree still ony get stump Wen somebody cut um down, Da peopo dat still stay dea, Goin come jalike one spesho seed fo God, Jalike da stump dat goin grow one mo time.”