Read Hawaii Pidgin Isaiah 61 Bible Online

Isaiah 61 - Hawaii Pidgin bible

Isaiah 61

¹Da Spirit from my Boss Yahweh stay in charge me, Cuz Yahweh wen put oil on top my head Fo show he wen pick me. He send me fo tell good kine stuff To da peopo dat odda peopo tink not importan, An fo help da peopo dat feel all bum out So dey can feel good inside one mo time, Fo tell da ones da army guys wen take to dea own country, Dey can go home now, An fo tell all da prisona guys, Da jail stay open now, so dey can go.

²Fo tell, “Dis, da year Yahweh goin make good to his peopo, An dis da time oua God goin pay back da bad guys.” He send me fo give good kine words To erybody dat stay sore inside.

³Yahweh send me fo help da peopo Mount Zion side Dat stay sore inside. He tell me fo give dem One nice head lei fo put on top dea head, An take away da ashes. An make dem stay feel good inside wit perfume So dey no stay sore inside no moa. He send me fo give um one nice robe fo wear Dat make erybody like tell, “Yahweh da greates!” So dea spirit no feel like dey lose fight no moa. Dey goin show dat Yahweh make dem come right wit him, Jalike dey strong oak trees dat Yahweh plant Fo show how awesome he stay.

⁴Dey goin build da ol broke down buildings again An make um come jalike dey new. Dey goin build da broke down towns an make um new, No matta dey stay broke from dea ancesta guys time. \

⁵Peopo you donno goin come Help take care yoa sheeps, An peopo from odda place Goin be da farma guys Inside yoa fields an grape farms.

⁶But you guys, peopo goin call you “Prieses fo Yahweh.” Dey goin call you guys “Helpa guys fo our God.” You guys goin get plenny food From da odda countries, An talk big cuz da awesome tings dey get, You goin get too.

⁷Befo time, you guys feel shame. Bumbye, you goin get two time da stuffs you get befo time. Befo time, nobody respeck you guys. Bumbye, yoa peopo goin yell cuz dey feel good inside. So, yoa peopo goin own two time da land, An dey goin dance an sing foeva Cuz dey feel good inside.

⁸Cuz me, Yahweh, I [stay / feel] good inside Wen peopo judge da right way. Wen peopo steal stuff cuz dey bad, I no like dat. Dey can trus me fo do wat I say I goin do. I goin give dem wat dey wen work fo, An make one deal wit dem dat stay foeva.

⁹Da peopos in da diffren countries Goin know who da ones dat come from my peopo. Erybody dat see dem goin tell Dat dey da ohana Dat Yahweh do good tings fo dem.

¹⁰I stay feel plenny good inside cuz a Yahweh. Eryting inside me feel good cuz a my God. Cuz jalike he give me clotheses fo wear Dat show he da One get me outa trouble, An jalike he give me one nice robe Fo show I get um right wit him. I feel jalike one guy dat goin get married An wear one fancy hat jalike da pries guys, An I feel jalike da lady dat goin marry too, An wear all kine jewel!

¹¹Cuz jalike da groun make da plants come up, An da garden make da seeds grow, Dass how my Boss Yahweh Goin make peopo get um right wit him An tell good tings bout him In front da peopos from all da diffren countries!