Read Hawaii Pidgin Isaiah 62 Bible Online

Isaiah 62 - Hawaii Pidgin bible

Isaiah 62

¹Fo help God's peopo on top Mount Zion, I no goin hold back an no talk! Fo help da Jerusalem peopo, I no goin stay quiet, Till erybody can see, Dat God's peopo get um right wit him, Jalike wen da sun come up morning time, An erybody can see Dat God get his peopo outa trouble, Jalike one torch dat stay burn nite time,

²Da peopo in all da countries goin see All da right kine tings you guys stay do. All da kings goin see Dat you guys stay awesome. You guys goin get one new name. Yahweh goin give um to you guys.

³You guys goin be jalike one nice looking lei Dat Yahweh get in his hand. Jalike da kine head cloth da king guys wear Dat God hold in his hand.

⁴Nobody goin tell you guys no moa Dat yoa God wen leave you guys. Nobody goin tell Dat [no mo notting / nobody can live] ova dea inside yoa land. But wen dey tink bout you guys, dey goin tell Dat God stay [feel] good inside bout you guys. An wen dey tink bout yoa land, dey goin tell Dat God stay come jalike yoa husban.

⁵Jalike one young guy take one wahine fo come his wife, You Jerusalem guys goin take Jerusalem town. Jalike da young guy feel good inside bout his bride, Yoa God goin stay feel good inside bout you guys.

⁶Eh you Jerusalem peopo! I stay put guys on top yoa walls fo watch. Day time an nite time, Dey no goin stay quiet. You guys dat stay pray to Yahweh Fo no foget wat he wen promise fo do, No res o go sleep.

⁷No let Yahweh res, Till he make Jerusalem solid, An make all da peopo on top da earth talk good bout him.

⁸Yahweh make dis promise Cuz he get da powa fo make um happen: “No moa, I goin eva let Da peopo dat stay agains you Take away yoa wheat. I no goin eva again let da peopo from odda place Drink da new wine you guys wen work hard fo make.

⁹But da guys dat cut da wheat, Dey da ones goin eat um An tell good stuff bout Yahweh. An da guys dat cut da grapes, Dey da ones goin drink da wine Inside da Temple Yard Dat Stay Spesho Fo Me.”

¹⁰Go, pass thru da town gates. Make one place so my peopo can come back! Build up da big road. Take away da stones. Hold up one flag So da diffren peopos know wea fo go!

¹¹Yahweh tell da peopo all ova da world fo lissen: “Tell my Jerusalem peopo from Mount Zion, ‘Look! da One goin get you guys outa trouble, He stay come! Look! He stay bring wit him Da ones he wen get outa trouble!’-”

¹²Dose peopo he goin bring, Odda peopo goin call dem ‘Da Spesho Peopo Fo Yahweh, Da Peopo Dat Yahweh Pay Da Price Fo Get Um Outa Trouble.’ An peopo goin call Jerusalem, ‘Da Town Yahweh Wen Look Fo, Da Town Yahweh No Goin Leave.’-”