Read Hawaii Pidgin Isaiah 63 Bible Online

Isaiah 63 - Hawaii Pidgin bible

Isaiah 63

¹Da watcha guy tell: “Eh! Who dat guy coming from da Edom land, From dea main town Bozrah? His clotheses, get all red on top! Who dis awesome looking guy, He stay wear real nice clotheses? He march strait, an he plenny strong! He tell, ‘Me, I da One get da right fo talk, Cuz I do wass right! I get plenny powa fo get peopo outa trouble!’

²“How come da clothes you stay wear, all red? Look jalike da guys dat smash da grapes wit dea feets fo make wine!

³He tell: “I no smash grapes. I smash diffren peopos! No mo nobody from dose peopos help me. Ony me! I smash dem cuz I stay huhu wit dem. I so plenny huhu, Dat I walk all ova dea bodies. Dea blood shoot out all ova on top my clotheses Jalike juice from da grape, an stain eryting.

⁴Cuz I wen tink plenny, Dis, da right time fo me pay back dose peopo Cuz dey wen hurt my peopo. An da time stay now, fo do wat I gotta do Fo get my peopo outa trouble.

⁵I look real hard, But no mo nobody dea fo help me. Bum me out, dat nobody dea kokua me. So I use my own powa fo do wat I gotta do. I stay huhu, an dass wat wen kokua me.

⁶I walk all ova da diffren peopos Jalike dey da grapes, cuz I stay huhu. I make dem come drunk, cuz I stay huhu still yet, An pour dea blood all ova da groun.”

⁷I goin make shua nobody foget, An tell all dat Yahweh do Cuz he stay tight wit us guys, An all da good tings us guys can tell bout Yahweh Cuz he do good tings fo us guys. He give us Israel ohana peopo Plenny good kine stuffs. He show love an pity fo us guys, An he stay tight wit us guys all da time.

⁸He tell, “Fo shua, da Israel ohana, Dey my peopo. Dey my kids, An dey no goin go agains me.” Az why Yahweh da One Fo get his peopo outa trouble.

⁹Erytime his peopo suffa, he suffa too. He stay right dea wit dem, Jalike he one angel messenja guy Fo get dem outa trouble. He pay da price fo get um outa trouble, Cuz he get love an aloha fo dem An he pity dem. Jalike from long time ago He stay pick dem up an carry um all da time.

¹⁰But his peopo, still yet dey go agains him, An make his Good An Spesho Spirit stay sore inside. So he turn away from dem. An he fight dem.

¹¹Den his peopo rememba Long time ago, wit Moses an his peopo. Dey tinking, “Wea da One Wen take Moses an da peopo thru da Red Sea, Da time Moses an his ohana Stay jalike sheep farmas Dat stay take care da peopo ova dea?! Wea da One wen put his Good An Spesho Spirit Right dea wit all da peopo?!

¹²Wea da One dat wen use his awesome powa Fo go wit Moses fo help him?! Yahweh wen go open da watta on da two side So da peopo can go walk thru, Strait thru da middo. An dass how Yahweh make erybody know Wat kine God him, foeva!

¹³Who wen lead da peopo Thru da deep open place on da ocean bottom?! Da peopo no fall down dea, Jalike one horse go fas thru da boonies An dey no fall down,

¹⁴An jalike cows dat can go easy down inside one valley. Da Spirit from Yahweh make da peopo res.” Den me, Isaiah, I pray to Yahweh: “Az how was, da time you wen lead yoa peopo, An you make erybody know Wat awesome kine God you!

¹⁵Yahweh! Look down from da sky From da place you live up dea, Yoa Good An Spesho Place, Dat show how awesome you stay! Look down, fo see wat stay happen! Befo time, you wen go all out fo us guys, But now, you no care. Befo time, you wen use yoa powa fo help us guys, But now, you no do notting. You wen feel plenny love an pity fo me befo time, But now, you stay hold back from me!

¹⁶But you, you oua Fadda! Cuz no matta Abraham an Israel Dey donno notting bout us guys, You Yahweh, you our Fadda! You da One wen pay da price Fo get us guys outa trouble from befo time. Cuz dass wat kine God you, An dass yoa name, Get Us Outa Trouble!

¹⁷Eh Yahweh! How come you let us guys Go holoholo an leave yoa ways?! How come you let us guys come hard head So we no mo respeck fo you?! Come back by us, Cuz us yoa worka guys, Oua ohanas, dey yoa ohanas!

¹⁸Ony litto wile, befo time, Da peopo dat stay spesho fo you Wen own da land. But now, da peopo dat stay make trouble fo us guys, Da Temple Dat Stay Spesho Fo You, Dey walk all ova an broke um down, An make um so nobody can use um.

¹⁹From long time, us guys stay yoa peopo. But da ones dat stay agains us, You neva was da king fo dem. Nobody call dem yoa peopo.