Read Hawaii Pidgin Isaiah 64 Bible Online

Isaiah 64 - Hawaii Pidgin bible

Isaiah 64

¹Yahweh, I wen like fo you open da sky An come down hea awready! If you wen do dat, da mountains goin shake Jalike get earthquake, An fall down in front you!

²Jalike wen da fire make da dry wood burn An make da watta boil, I wen like fo you come down hea awready So da peopo dat stay agains you Goin know wat kine God you, An da diffren peopos Goin come scared an shaking in front you.

³Befo time you wen do scary kine stuff Dat us guys neva tink you goin do um. You wen come down, An da mountains shake jalike get earthquake An fall down in front you,

⁴From da time eryting start, Nobody eva hear o see Any odda god dat can do awesome stuff Fo da peopo dat stay wait fo him. You da ony God can make lidat.

⁵You come fo help da peopo dat do da right ting An stay good inside cuz a dat, An rememba how you make. But fo shua, wen us still do bad kine stuff, You wen stay huhu! So, us gotta do how you like us make An do um all da time! Dass da ony way us goin get outa trouble!

⁶All us guys wen come Jalike somebody dat do pilau kine stuff An no can come in front you, Yahweh, cuz a dat. All da tings we do fo show we stay do da right ting, Jalike stink an dirty kine rags. We all lose fight, jalike one dry up leaf. An da bad kine stuff we do, wipe us out Jalike da wind wen blow away da leaf.

⁷No mo nobody know wat kine God you, So nobody call you fo help um. No mo nobody try fo go hang in dea wit you, Cuz you no like even look at us guys. You make us lose fight, So da bad kine stuff we do, take ova us.

⁸Still yet, Yahweh, you oua Fadda. Us, jalike da clay. You, da guy dat make us guys come jalike clay pots. All us guys, you wen make us.

⁹Eh Yahweh, no stay mo huhu wit us guys, Mo den us can handle! No rememba foeva, da bad kine stuff we wen do. Look at us, cuz all us guys, yoa peopo.

¹⁰Da towns dat stay spesho fo you, Now no mo notting dea. Even on top Mount Zion, no mo notting! Yoa main town, Jerusalem, Stay all bus up!

¹¹Our awesome Temple, dat stay spesho fo you, Wea our ancesta guys wen tell Dat you da greates, Dat all burn down. All da nice tings we wen get, All one pile a junk now.

¹²So, Yahweh, afta all dis tings happen, You still yet goin hold back, o wat?! You still yet no goin talk notting, o wat?! You still goin make us guys get presha Mo den we can handle, o wat?!