Read Hawaii Pidgin Leviticus 1 Bible Online

Leviticus 1 - Hawaii Pidgin bible

Leviticus 1

¹Yahweh call Moses fo come by him, an he talk to him from inside da Tent wea da peopo come fo meet God.

²He tell Moses fo tell da Israel peopo dis: “If any one a you guys make one sacrifice fo me, Yahweh, bring one cow o sheep o goat.

³“If da guy like bring one cow fo make one burn up kine sacrifice, den he gotta bring one boy kine cow dat no mo notting wrong wit um. He gotta show da cow to da pries guys outside wea you go inside da yard fo da Tent wea da peopo come fo meet me, Yahweh. Az fo make shua da cow stay okay fo me take um.

⁴Den da guy goin put his hand on top da head a da cow fo da sacrifice. [Dat mean / Den], I goin take da cow fo da guy, so da guy can come da same side wit me, Yahweh.

⁵Da guy goin kill da boy kine cow in front me, Yahweh. Den Aaron's boys, da pries guys, goin bring da blood from da boy kine cow, an sprinkle um on top all da sides a da altar, by da door wea you go inside da yard fo da Tent wea da peopo come fo meet me.

⁶Den da guy goin take off da skin from da sacrifice, an cut up da sacrifice an make pieces.

⁷Same time, Aaron's boys, da pries guys, goin set up da wood on top da altar da right way, an make one wood fire.

⁹(8-9) Firs, da inside pieces an da legs, da guy goin wash um wit watta. Den da pries guys put da pieces, da head, an da fat, on top da wood dat stay burning on top da altar. Wen da pries guys burn up da whole animal on top da altar, az one sacrifice dat dey burn eryting up, so da smoke from da fire go up an make one real nice smell fo me, Yahweh.

¹⁰“If da sacrifice goin be da kine dey burn up one sheep o one goat, da guy gotta bring one boy kine sheep o one boy kine goat dat no mo notting wrong wit um.

¹¹Da guy goin kill um by da north side a da altar in front me, Yahweh. An Aaron's boys, da pries guys, goin sprinkle da blood on top all da sides a da altar.

¹³(12-13) Da guy goin cut um up an make pieces, an wash da inside pieces an da legs wit watta. Den da pries guy goin put da pieces, an da head, an da fat, on top da wood dat stay burning on top da altar. Wen da pries guy goin burn up da whole animal on top da altar, az one sacrifice dat dey burn eryting up, so da smoke from da fire go up an make one real nice smell fo me, Yahweh.

¹⁴“If da sacrifice goin be one bird dat dey burn up, den da guy can give one dove o one young pigeon fo be da sacrifice fo him.

¹⁶(15-16) Da pries guy goin bring da bird by da altar, an pull off da head. He goin take out da crop an pull out da feathers on top um, an throw um down by da east side a da altar wea dey put da ashes. He goin pull open by da wings, but not all da way off. Den he goin burn up da bird on top da altar. Da blood goin run off da side a da altar.

¹⁷Wen da pries guy burn up da whole bird on top da altar, az one sacrifice dat dey burn up, so da smoke from da fire go up an make one real nice smell fo me, Yahweh.”