Read Hawaii Pidgin Leviticus 12 Bible Online

Leviticus 12 - Hawaii Pidgin bible

Leviticus 12

¹Yahweh tell Moses

²fo tell da Israel peopo: “One wahine dat get hapai an born one boy, she no can come in front me fo seven days afta da bebe born. Az jalike she no can come in front me seven days wen her sick time come ery month.

³Day numba eight, dey goin cut skin da boy.

⁴Den da wahine gotta stay home still yet fo thirty-three days, fo make shua all da bleeding pau an den she ready fo come in front me. She no can touch wateva stay spesho fo me, an she no can go da Tent Dat Stay Spesho Fo Me till da time pau, an den she can come in front me.

⁵If she born one girl, she no can come in front me fo two weeks, jalike she no can come in front me wen her sick time come ery month. Afta da two weeks, she gotta stay home still yet fo sixty-six days, fo make shua all da bleeding pau, an den she ready fo come in front me.

⁶“Afta she born one boy o one girl, an da bleeding pau an she ready fo come in front me, she go by da pries guy wea peopo go inside da yard fo da Tent wea da peopo come fo meet me, Yahweh, an bring one bebe sheep one year ol, fo make one burn up kine sacrifice, an one young pigeon o one dove fo make da kine sacrifice fo any bad kine stuff she wen do.

⁷Da pries guy goin bring da two sacrifice in front me, Yahweh, fo bring her da same side wit me. Den she goin be okay fo come in front me, afta she all pau bleed from born da bebe. “Dis da rules fo da wahine dat born one boy o one girl.

⁸If she no mo nuff money fo buy one bebe sheep, she can bring two doves o two young pigeons, one fo da burn up kine sacrifice, an da odda fo da sacrifice fo any bad kine stuff she wen do. Az how da pries guy goin bring her da same side wit me, an den she can come in front me.”