Read Hawaii Pidgin Leviticus 13 Bible Online

Leviticus 13 - Hawaii Pidgin bible

Leviticus 13

²“Anybody get one place on top dea skin dat stay swell, o one place dat stay itchy, o one place dat shine o stay red, maybe da kine goin come sick an odda guys can catch um. Den da peopo gotta bring dem by Aaron da pries guy, o one a his boys dat stay one pries.

³Da pries goin check out da sore dat stay on top dea skin. If da hair inside da sore place come white awready, an if da sore look like stay go way down unda da skin, den az one bad kine sick dat odda guys can get um. Afta da pries guy check out da sick guy, da pries guy goin tell erybody dat da guy no can come in front me, Yahweh.

⁴If da place on top da skin come white awready, but no look like stay go way down unda da skin, an da hair inside um not white, da pries goin take da guy an put um away by himself fo seven days.

⁵Day numba seven, da pries guy goin check um out again. If da pries guy see dat da sore no change, an no come mo big on top da skin, da pries goin make da guy stay by himself seven mo days.

⁶Day numba seven, da pries guy goin check out da guy again. If da sore wen fade, an neva come mo big on top da skin, da pries guy goin tell erybody az ony one rash, an da guy stay okay fo come in front me, Yahweh. Da guy gotta wash his clotheses, den he can come in front me.

⁷But if da rash come mo big on top da skin afta he show himself to da pries guy fo find out if he okay, den he gotta come back by da pries guy fo check um out one mo time still yet.

⁸Da pries guy goin check out da guy again. If da rash stay come mo big on top da skin, da pries guy goin tell erybody dat da guy no can come in front me, Yahweh. Az one sick dat da guy can give to odda guys.

⁹“Anybody get one sick on top da skin dat dey can give to anodda guy, da peopo gotta bring dem by da pries guy.

¹⁰Da pries guy goin check um out. If get one white place on top da skin dat stay swell, an if da place dat stay swell get raw skin,

¹¹az one sick inside da skin dat anybody can catch, an no goin come good bumbye. Da pries guy goin tell erybody dat da guy no can come in front me, Yahweh. Da pries guy no goin make da sick guy stay by himself so he can check um out one mo time, cuz da guy awready no can come in front me.

¹²“If da sick come out all ova da guy skin, an da pries see dat [stay / dey] go cova da skin from da head to da feets,

¹³da pries guy goin check um out. If da sick stay all ova his body, da pries guy goin tell erybody dat he can go in front me, Yahweh. Cuz da sick stay all white an dry up, he can go in front me.

¹⁴But if da pries guy see dat da skin still yet stay raw, den da guy no can go in front me, Yahweh.

¹⁵Wen da pries guy see da raw skin, he goin tell erybody dat da guy no can go in front me. Da guy can give da sick to anodda guy.

¹⁶But if da raw skin change an come back white an dry, he gotta go by da pries guy again.

¹⁷Da pries guy goin check out da guy again. If da sores wen come white an dry, da pries guy goin tell erybody dat da guy can come in front me. He stay okay.

¹⁸“Wen somebody get one boil on top dea skin, an da ting come good,

¹⁹an on top da place wea da boil wen stay, get one white place dat stay swell o get one kinda red an white shiny kine place, dey gotta go by da pries guy.

²⁰Da pries guy goin check um out. If da place look like stay go way down inside da skin, an da hair inside um come white, da pries guy goin tell erybody dat da guy no can come in front me, Yahweh. Az one sick dat odda guys can catch. Dat kine sick wen come from wea da boil wen stay befo.

²¹But if da pries guy check um out, an no mo white hair inside um, an no go down inside da skin, an ony can see um litto bit, den da pries guy goin take da guy an put um away by himself fo seven days.

²²But if da kine sick stay come mo plenny on top da skin, da pries guy goin tell erybody dat da guy no can come in front me, Yahweh. Odda guys can catch um.

²³But if da shiny place no stay change, an no come mo big, az ony one scar from da boil, an da pries guy goin tell erybody dat da guy can come in front me.

²⁴“Wen somebody get one burn on top dea skin, an one kinda red an white shiny kine place o one white shiny kine place come inside da raw skin on top da burn, dey gotta go in front da pries guy.

²⁵Da pries guy goin check out da burn place. If da hair inside da shiny part wen come white, an da sore look like go way down inside da skin, az da kine sick odda guys can catch, cuz stay come from da place wea da burn wen stay. Da pries guy goin tell erybody dat da guy no can come in front me, cuz dass da kine sick odda guys can catch.

²⁶But if da pries guy check out da place, an no mo white hair inside da shiny part, an no go down inside da skin, an ony can see um litto bit, den da pries guy goin take da guy an put um away by himself fo seven days.

²⁷Day numba seven, da pries guy goin look um again. If da sore come mo plenny on top da skin, da pries guy goin tell erybody dat da guy no can come in front me, Yahweh. Az one sick odda guys can catch.

²⁸But if da sore no change, an no come mo big, an ony can see um litto bit, az one place dat stay swell cuz a da burn. Da pries goin tell erybody dat da guy can come in front me, Yahweh. Az ony one scar from da burn.

²⁹“If one guy o one wahine get one sore on top da head o on top da chin,

³⁰da pries guy goin check out da sore. If look like stay go down inside da skin, an da hair inside um stay yellow an skinny kine, da pries goin tell dat dey no can come in front me, Yahweh. Dat kine sore broke da skin on top da head o da chin, an odda guys can catch um.

³¹But if da pries see dat da place wea da skin stay broke no look like go way down inside da skin, an no mo black hair inside um, den da pries guy goin take da guy an put um away by himself fo seven days.

³²Day numba seven, da pries guy goin check out da sore one mo time. If da place wea da skin stay broke no come mo plenny, an no mo yellow hair inside um, an no look like stay go down inside da skin,

³³da sick guy gotta shave himself, but no shave da place wea da sore stay, an da pries guy goin make um stay by himself seven mo days.

³⁴Day numba seven, da pries guy goin check out da place wea da skin stay broke. If no come plenny, an no go down inside da skin, da pries guy goin tell erybody dat da guy can come in front me. Dey gotta wash dea clotheses, an dey goin be okay fo come in front me.

³⁵But if da place wea da skin stay broke get plenny on top da skin afta da pries guy tell dat dey can come in front me,

³⁶da pries guy goin look um again. If da place wea da skin stay broke get plenny again, da pries no need look fo one yellow hair, cuz da guy no can come in front me.

³⁷But if da pries guy tink da place wea da skin stay broke no mo plenny, an get black hair growing inside um, da sore come good awready. Da pries goin tell erybody dat da guy can come in front me, Yahweh.

³⁸“Wen one guy o one wahine get white shiny kine places on top dea skin,

³⁹da pries guy goin check um out da guy an da wahine. If da place stay white an shiny an almos no can see um, az ony one rash on top da skin an odda guys no can catch um, an da guy o da wahine can come in front me.

⁴⁰“Wen one guy hair fall out from on top his head, he ony bolohead. Az okay fo him come in front me, Yahweh.

⁴¹An if da hair on top da front a his head fall out, dass bolohead too. Da guy can come in front me.

⁴²But if he get one white sore wit litto bit red inside wea he no mo hair on top o on da front a his head, an da sore come mo big, az one sick dat odda guys can catch.

⁴³Da pries guy goin check um out. If da sore on top his head o on top da front a da head stay swell, an get white wit litto bit red, jalike one sick odda guys can catch,

⁴⁴den fo shua da guy get da kine sick odda guys can catch, an no can come in front me, Yahweh. Da pries guy goin tell erybody dat he no can come in front me, cuz a da sore on top his head.

⁴⁵“Anybody get dat kine sick odda guys can catch, dey gotta broke da clotheses dey wear fo show dey stay sore inside, an no comb dea hair. Dey gotta cova up da bottom part a dea face, an yell to erybody, ‘No come nea! I no can go in front Yahweh!’

⁴⁶Da whole time dey get dat kine sick, dey no can come in front me, Yahweh. Az why dey gotta live by demself, dey gotta live outside da camp, dey no can live nea odda peopo.”

⁴⁷“Da clotheses dat get da kine mildew dat stay spread on top um, wool kine o linen kine clotheses,

⁴⁸any kine dey weave o knit from linen o wool string, o animal skins, o someting peopo make from leather,

⁴⁹an if da mildew on top dese tings look kinda green o kinda red, az da kine mildew dat spread. You gotta show um to da pries guy.

⁵⁰Da pries guy goin check out da mildew, an put um away so no can touch odda kine stuffs fo seven days.

⁵¹Day numba seven, he goin check um out again. If da mildew stay go on top da clotheses, o da stuff dey weave o knit, o on top da leather, no matta wat dey use um fo, az da kine mildew dat goin wipe out all da stuffs. You no can use da ting fo notting.

⁵²Da pries guy gotta burn all da tings dat get mildew, cuz goin wipe out odda stuff. Gotta burn um up.

⁵³“But if da pries guy see wen he go check out da stuffs, dat da mildew no spread on top da clotheses o da odda stuff,

⁵⁴he goin tell somebody fo wash da tings dat get da mildew. Den he goin put um away from da odda stuff fo seven mo days.

⁵⁵Den da pries guy goin check um out one mo time, an if da mildew still look da same, no matta no spread, you no can use um. Burn um up, no matta da mildew stay on da inside o da outside.

⁵⁶But if da pries guy see dat da mildew stay fade afta dey wash um, he gotta broke da mildew part off, fo take out da mildew part.

⁵⁷But if da mildew stay come again on top da stuff bumbye, gotta burn up da whole ting.

⁵⁸Wateva dey wen wash, an no mo mildew, dey gotta wash um again, an den goin be okay fo peopo use um.

⁵⁹“Dis, da rules fo wool o linen cloth, an fo stuff peopo make from leather, dat get mildew on top um, an fo tell erybody if stay okay o if not okay fo peopo use um.”