Read Hawaii Pidgin Leviticus 14 Bible Online

Leviticus 14 - Hawaii Pidgin bible

Leviticus 14

²“Dis, da rules fo da guys dat get da kine sick on top da skin dat odda guys can catch, fo make dem so dey can come back in front me, Yahweh, wen somebody bring him by da pries.

³Da pries guy goin go outside da camp, an check out da guy. If he see dat da guy come good awready from da kine sick on top da skin dat anodda guy can catch,

⁴da pries guy goin tell somebody fo bring two birds dat stay alive an da right kine fo kill fo make sacrifice, an some cedar wood, red string, an one oregano branch, fo da guy dat like come clean fo come in front me, Yahweh.

⁵Den da pries guy goin tell somebody fo kill one bird on top one clay pot wit spring watta inside.

⁶Den he goin take da bird dat still alive an dip um inside da blood wit da spring watta from da bird he wen kill. He goin dip da cedar wood, da red string, an da oregano branch, same time.

⁷Den da pries goin sprinkle da guy dat like come clean again fo come in front me, Yahweh, seven times. An he goin tell erybody dat now stay okay fo da guy come in front me again. Den he goin let go da bird dat stay alive, fo fly away inside da fields.

⁸“Da guy dat da pries guy wen do all dis fo, da guy gotta wash his clotheses, shave off all his hair, an bafe wit watta. Den he ready fo come in front me. Afta dat he can go inside da camp, but he still gotta stay outside his own tent fo seven days.

⁹Day numba seven, he gotta shave off all da hair from his head, his beard, his eyebrow, an his odda hair. He gotta wash his clotheses an bafe wit watta. Den he okay fo come in front me.

¹⁰“Day numba eight he gotta bring two boy kine bebe sheep, an one girl kine bebe sheep, dat ony stay one year ol, an no mo notting wrong wit um. He gotta bring six quart fancy kine wheat flour, mix wit olive oil, fo make one sacrifice wit wheat, an bout one pint olive oil.

¹¹Da pries guy dat tell dat da guy ready fo come in front me, gotta bring da guy an da sacrifice animals in front me wea peopo go inside da yard fo da Tent wea da peopo come fo meet me.

¹²“Den da pries guy goin take one a da boy bebe sheeps fo make one sacrifice fo take away da blame fo da bad tings da guy wen do befo time, an da olive oil. He goin lif up da baby sheep an da oil in front me fo make da kine sacrifice dey lif up.

¹³Den da pries guy goin kill da bebe sheep inside da spesho place wea dey make da kine sacrifice cuz a da bad kine stuff da guy wen do, an da kine sacrifice dey burn up. Jalike da sacrifice cuz a da bad kine stuff, da sacrifice cuz a da blame, az ony fo da pries guy eat, cuz stay real spesho fo me.

¹⁴Da pries guy goin take some a da blood from da sacrifice fo take away da blame, an put um on top da bottom a da right ear a da guy he make da sacrifice fo, an on top his right thumb, an da big toe from his right feet.

¹⁵Den da pries guy goin take some a da olive oil, an pour um inside da palm a his own lef hand,

¹⁶dip his right forefinga inside da oil inside his lef palm, an wit his finga, sprinkle some in front me, Yahweh, seven times.

¹⁷Da pries guy goin put some a da oil dat still yet stay inside his palm, on top da bottom a da guy's right ear, on top his right thumb, an his right big toe, on top da blood from da sacrifice fo take away da blame.

¹⁸Da pries guy goin put da res a da olive oil inside his palm, on top da head a da guy. Dass how he goin bring him da same side wit me.

¹⁹“Den da pries guy goin make da sacrifice cuz a da bad tings da guy wen do befo time, an bring him da same side wit me, cuz befo time he no can come in front me. Afta dat da pries guy goin kill da animal fo da burn up kine sacrifice

²⁰an put um on top da altar, wit da sacrifice wit da wheat too, an bring da guy da same side wit me. Den he can come in front me.

²¹“But if da guy no mo notting, an no can buy da animals, he gotta take one boy kine bebe sheep fo make one sacrifice fo take away da blame, an lif um up, fo bring him da same side wit me, Yahweh. An he goin take two quarts fancy kine flour mix wit bout one pint olive oil fo make one sacrifice wit wheat,

²²an two doves o two young pigeons, wateva he can buy, one fo da sacrifice cuz a da bad tings he wen do, an da odda fo da burn up kine sacrifice.

²³“Day numba eight, he gotta bring da animals an da stuff fo da sacrifice by da pries guy wea peopo go inside da yard fo da Tent wea da peopo come fo meet me, fo make da sacrifice so he can come in front me.

²⁴Da pries guy goin take da bebe sheep an da pint a olive oil fo da sacrifice fo take away da blame, an lif um up in front me, Yahweh, fo da kine sacrifice dey lif up.

²⁵Da pries guy goin kill da bebe sheep fo da sacrifice fo take away da blame, an take some a da blood, an put um on top da bottom a da right ear a da guy, da right thumb, an da right big toe.

²⁶Den da pries guy goin pour some a da olive oil inside da palm a his own left hand,

²⁷an wit his right forefinga, sprinkle some a da oil seven times in front me.

²⁸Den he goin put some a da oil from his hand on top da same places he put da blood from da sacrifice fo take away da blame: on top da bottom a da guy's right ear, his right thumb, an his right big toe.

²⁹Da pries guy goin put da res a da oil inside his hand on top da head a da guy, fo bring him da same side wit me.

³⁰Den da pries guy goin kill da doves o da young pigeons, wateva da guy can buy.

³¹He goin kill one fo make da sacrifice cuz a da bad tings da guy wen do, an da odda fo make da burn up kine sacrifice wit da wheat sacrifice. Az how da pries guy goin bring da guy da same side wit me, Yahweh. Den he can come in front me.”

³²Dis, da rules fo whoeva get da kine sick on top da skin dat odda guys can catch, an da guy no mo notting fo buy da regula kine stuff fo make him so he can come in front God.

³³Anodda ting Yahweh tell Moses an Aaron:

³⁴“Wen you guys go inside da Canaan land, dat I stay give you guys fo own um foeva, if I put one mildew inside one house dat goin spread all ova dea,

³⁵da guy dat own da house gotta go tell da pries guy, ‘I see someting dat look jalike mildew inside my house.’

³⁶Da pries guy goin tell um fo take eryting outa da house befo da pries guy go inside. If da owna no do dat, den da pries goin tell dat eryting inside da house get da mildew. Den da pries guy go inside fo check out da house.

³⁷He goin look fo mildew on top da walls. If stay lok kinda green o kinda red, an go mo deep den da wall,

³⁸da pries guy goin go outside da house door, an shut um up fo seven days.

³⁹Day numba seven, da pries guy goin go back fo check out da house. If da mildew wen spread on top da walls,

⁴⁰da pries guy goin tell da peopo dat dey gotta take out da stones dat get da mildew, an throw um outside da town wea peopo put da kine stuff dat make um so dey no can come in front me, Yahweh.

⁴¹Da house, da pries guy goin make um scrape all da walls inside, an dey gotta throw da stuff dey scrape off an throw um da place outside da town dey get fo da kine stuff dat make peopo so dey no can come in front me, Yahweh.

⁴²Den dey goin take odda new stones fo put wea da ol stones dey wen take out, an dey goin take new clay fo plasta all da walls.

⁴³“If da mildew come back inside da house afta dey take out da stones wit da mildew, an scrape da house walls, an plasta um,

⁴⁴da pries guy goin go check um out again. If da mildew wen spread inside da house again, az da kine mildew dat wipe out stuff. Da house pilau, no can use um.

⁴⁵Gotta broke down da house: da stones, da beams, an all da clay, an take um outside da town, da place wea peopo throw stuff dat make um so dey no can come in front me, Yahweh.

⁴⁶“Anybody go inside da house all da time da house stay shut up, dey no can go in front me till da sun go down.

⁴⁷An anybody sleep o eat inside da house, dey gotta wash dea clotheses.

⁴⁸“But if da pries guy come fo check out da house, an da mildew neva spread inside da house afta dey put da new clay, he goin tell erybody dat da house stay okay fo use, cuz no mo mildew awready.

⁴⁹Fo da kine sacrifice dat make da house okay da way I see um, he goin take two birds, some cedar wood, red string, an one oregano branch.

⁵⁰He goin kill one bird ova one clay pot an get spring watta inside.

⁵¹Den he goin take da cedar wood, da oregano branch, da red string, an da odda bird dat stay alive, dip um inside da blood mix wit da spring watta from da bird he wen kill, an use um fo sprinkle da house seven times.

⁵²Afta he make da sacrifice wit da blood from da bird, da spring watta, da bird dat stay alive, da cedar wood, da oregano branch, an da red string, fo make da house okay fo use,

⁵³den he goin let da alive bird go fly away inside da fields outside da town. Az how he goin make da house okay da way I Yahweh see um.

⁵⁴“Dis, da rules fo da kine sick on top da skin dat odda guys can catch, o wea da skin stay broke,

⁵⁵o fo mildew inside da clotheses, o inside da house,

⁵⁶fo one place dat stay swell on top da skin, one rash, o one shiny spot,

⁵⁷so da pries guy can find out wen someting stay okay o not okay, an wen da peopo can come in front God, an wen dey no can.” Dis da rules bout da kine sick on top da skin dat odda guys can catch, an da mildew.