Read Hawaii Pidgin Leviticus 15 Bible Online

Leviticus 15 - Hawaii Pidgin bible

Leviticus 15

¹Yahweh tell Moses an Aaron

²fo tell da Israel peopo dis: “Wen any guy get stuff come out from dea body, dat make dem so dey no can come in front me, Yahweh,

³no matta stay come out easy o get hard time come out, dey no can come in front me, Yahweh.

⁴“Goin make any bed da guy lay down on top um, o anyting da guy sit down on top um, no can use um. So dat whoeva lay down o sit down on top um no can come in front me.

⁵Anybody dat touch da guy bed, dey gotta wash dea clotheses, an bafe wit watta, an dey no can come in front me till da sun go down.

⁶Anybody dat sit on top da same ting dat guy wit da stuff coming out wen sit on top um, dey gotta wash dea clotheses, an bafe wit watta, an dey no can come in front me till da sun go down.

⁷“Anybody touch da guy skin gotta wash dea clotheses, an bafe wit watta, an dey no can come in front me till da sun go down.

⁸“If da guy get stuff coming out, an he spit on top somebody dat can come in front me, dat guy gotta wash his clotheses, an bafe wit watta, an he no can come in front me till da sun go down.

⁹Wateva da guy sit on top wen he go ride, goin make peopo so dey no can come in front me,

¹⁰an whoeva touch anyting dat was undaneat da guy dat get da stuff coming out, dey no can come in front me till da sun go down. Whoeva pick up da tings dat wen stay unda da guy, dey gotta wash dea clotheses, an bafe wit watta, an dey no can come in front me till da sun go down.

¹¹“Anybody da guy wit da stuff coming out wen touch befo he wash his hands wit watta, dey gotta wash dea clotheses, an bafe wit watta, an dey no can come in front me till da sun go down.

¹²“If da guy wit da stuff coming out touch one clay pot, gotta broke um. If da guy touch one wood ting, gotta rinse um wit watta.

¹³“Wen da stuff pau come out from da guy body, he goin wait seven days fo da tings da pries guy goin do so he can come back in front me. He gotta wash his clotheses, an bafe wit spring watta. Den he stay ready fo come in front me, Yahweh.

¹⁴Day numba eight, da guy gotta take two doves o two young pigeon, an come in front me wea peopo go inside da yard fo da Tent wea peopo come fo meet me. He goin give da birds to da pries guy.

¹⁵Da pries guy goin make sacrifice wit da birds, one fo da sacrifice cuz a da bad kine stuff da guy wen do, an da odda fo da burn up kine sacrifice. Az how da pries guy goin bring da guy da same side wit me, cuz a da stuff dat come out from his body.

¹⁶“Wen one guy get one wet dream, he gotta bafe his whole body wit watta, an he no can come in front me till da sun go down.

¹⁷If da clotheses o da leather get semen on top um, gotta wash um wit watta, an no can use um till da sun go down.

¹⁸Wen one guy sleep wit one wahine, an get semen come out from da body, both a dem gotta bafe wit watta, an dey no can come in front me till da sun go down.

¹⁹“Wen one wahine get her sick time ery month, dat goin stay fo seven days. Whoeva touch her no can come in front me till da sun go down.

²⁰“Wateva she lay down on top wen she stay sick lidat, dat make da peopo so dey no can come in front me if dey touch um. An wateva she sit on top, dat make da peopo so dey no can come in front me if dey touch um.

²¹Anybody touch her bed gotta wash dea clotheses, an bafe wit watta, an dey no can come in front me till da sun go down.

²²An anybody touch anyting she sit down on top gotta wash dea clotheses, an bafe wit watta, an dey no can come in front me till da sun go down.

²³No matta if da bed o wat she sit on top, if somebody touch um, dey no can come in front me till da sun go down.

²⁴“If one guy sleep wit her, an da stuff dat come outa her touch him, he no can come in front me fo seven days, an wateva bed he lay down on top, dat goin make peopo so dey no can come in front me too.

²⁵“Wen one wahine get blood dat come out fo plenny days, an az not her sick time ery month, o get blood dat still yet stay come out afta her sick time, she no can come in front me till dat pau, jalike wen she get her sick time.

²⁶Wateva bed she lay down on top wen da blood stay come out, an wateva she sit down on top, goin make peopo so dey no can come in front me if dey touch um, jalike wen she get her sick time ery month.

²⁷Whoeva touch um no can come in front me. Dey gotta wash dea clotheses, an bafe wit watta, an dey no can come in front me till da sun go down.

²⁸“Wen da blood pau come out from da wahine body, she gotta wait seven days, an afta dat she can come in front me.

²⁹Day numba eight, she gotta take two doves o two young pigeons, an bring um by da pries guy wea peopo go inside da yard fo da Tent wea da peopo come fo meet me, Yahweh.

³⁰Da pries guy goin make da sacrifice, one bird fo da sacrifice cuz a any bad kine stuff she wen do, an da odda bird fo da burn up kine sacrifice. Az how he goin bring her da same side wit me cuz a da blood dat wen stay come outa her.

³¹“Az how you guys, Moses an Aaron, gotta make shua da Israel peopo stay away from da Tent fo meet wit me, Yahweh, weneva dey no can come in front me. No good dey mahke wen dey stay lidat, an no good dey make da place wea I stay wit dem come pilau.”

³²Dis, da rules fo any guy dat get da kine sick dat come out from dea body, an fo whoeva get semen come out from dea body, so dey no can come in front me,

³³fo one wahine dat get her sick time ery month, fo one guy o wahine dat get stuff come out from dea body, an fo one guy dat sleep wit one wahine dat get her sick time an no can come in front Yahweh.