Read Hawaii Pidgin Leviticus 18 Bible Online

Leviticus 18 - Hawaii Pidgin bible

Leviticus 18

¹Yahweh tell Moses

²fo talk to da Israel peopo one mo time an tell um: “Me, Yahweh, I yoa God.

³You guys, no make like da peopo do ova dea Egypt side, da place you guys live befo time. An you guys No make like da peopo do Canaan side, da place I goin bring you guys. No do tings like dem.

⁴You guys gotta do wat my rules tell you fo do, an make shua fo live da way I tell you gotta do. Me, Yahweh, I yoa God.

⁵Take care fo live da way I tell you gotta do, an do wat my rules tell you fo do. Anybody dat do wat my rules tell, dey goin stay alive an get life cuz dey do um. I Yahweh, da God dass fo real.

⁶“Nobody suppose to go nea one close ohana fo make sex wit dem. I Yahweh, da God dass fo real.

⁷“You betta not make sex wit yoa mudda. Az yoa mudda. No make shame fo yoa fadda lidat.

⁸“You betta not make sex wit yoa fadda's odda wifes, cuz dat make shame fo yoa fadda too.

⁹“You betta not make sex wit yoa sista, no matta her yoa fadda's girl o yoa mudda's girl, no matta she grow up da same house wit you, o anodda place.

¹⁰“You betta not make sex wit yoa boy's girl, o yoa girl's girl. Dat goin make shame fo you.

¹¹“No make sex wit yoa fadda's odda wife's girl, cuz yoa fadda her fadda too. She yoa sista.

¹²“No make sex wit yoa fadda's sista. She yoa fadda's close ohana.

¹³“No make sex wit yoa mudda's sista. She yoa mudda's close ohana.

¹⁴“No go nea yoa fadda's brudda's wife fo make sex wit her. No make shame fo yoa fadda brudda lidat. She yoa auntie.

¹⁵“No make sex wit yoa daughta in law. She yoa boy's wife. No make sex wit her.

¹⁶“No make sex wit yoa brudda wife. No make shame fo yoa brudda lidat.

¹⁷“If you make sex wit one wahine, no go make sex wit her girl too. An no go make sex wit her boy's girl o her girl's girl. Dey da wahine's close ohana. Az one real bad kine ting you doing.

¹⁸“No take yoa wife sista fo come anodda wife fo you, cuz den dey goin fight. No make sex wit her wen yoa real wife still yet stay alive.

¹⁹“No go nea one wahine fo make sex wit her wen she get her sick time ery month, wen she no can come in front me.

²⁰“No go make sex wit any odda guy wife, an make yoaself pilau lidat so you no can come in front me.

²¹“No give any a yoa own kids fo make um go through da fire fo make sacrifice fo da idol kine god Molek, cuz you guys betta not make my name pilau. I Yahweh.

²²“No make sex wit one guy jalike you make sex wit one wahine. Az pilau dat.

²³“No make sex wit one animal, an make yoaself come pilau lidat. One wahine betta not give herself to one animal an make sex wit um. Dat mean dey ack jalike peopo an animals not diffren, an az going agains doing da right tings.

²⁴“No go do dis kine stuff an make yoaself so you no can come in front me, Yahweh. Az how da peopos dat donno me stay make, dat stay live inside da land I goin give you guys, da ones I goin move um outa da land.

²⁵Dey wen even make da land pilau awready. So I goin punish da land cuz a all da bad kine stuff da peopo ova dea do. Jalike da land goin throw up da peopo dat stay dea now.

²⁶But you peopo gotta take care fo live da way I wen tell you gotta do, an do wat my rules tell you fo do. An you gotta no do notting dat stay pilau, da kine I wen tell you bout. Da guys dat born hea an da guys from odda place dat live wit you guys, same ting, dey betta not do notting dat stay pilau kine.

²⁷Da peopo dat wen live inside da land befo you guys, dey wen do all dat pilau kine stuff. Dey make da land pilau too.

²⁸If you guys make da land pilau, da land goin throw up you guys, jalike wen throw up da peopo dat stay dea befo you guys.

²⁹“Anybody do any a dese pilau kine tings, you gotta cut dem off so dey not yoa peopo no moa.

³⁰You guys gotta make shua fo do da stuff I tell dat you guys gotta do. No follow da pilau kine style da peopo dat wen stay dea befo you guys do. No make yoaself so you no can come in front me lidat. Me, I yoa God Yahweh!”