Read Hawaii Pidgin Leviticus 20 Bible Online

Leviticus 20 - Hawaii Pidgin bible

Leviticus 20

¹Yahweh tell Moses

²fo tell da Israel peopo dis: “Any Israel guy, o any guy from odda place dat stay live wit da Israel guys, if dey give any a dea kids fo make um go inside da fire fo make sacrifice fo da idol kine god Molek, dey gotta mahke. Da Israel peopo gotta throw stones fo kill um.

³I goin go agains dat guy, an cut him off from his peopo. Wen he give his kid fo make sacrifice fo Molek, he make my spesho place pilau, an he talk bad an make dirty my good an spesho name too.

⁴But if da Israel peopo ack jalike notting happen wen dose peopo give one a dea kids fo Molek, an da Israel peopo no kill um,

⁵I goin go agains whoeva make da sacrifice fo Molek, an agains dea ohana. I goin cut dem off so dey not my peopo no moa. Same ting fo erybody dat make jalike dem, cuz dey make like one wahine dat fool aroun fo money wen dey go down in front Molek, cuz dey ony suppose to go down in front me.

⁶“I goin go agains whoeva go look fo da wahines dat talk to da mahke peopo, an da guys dat know how fo find out wat da mahke peopo spirits know. Dey make like one wahine dat fool aroun fo money wen dey go agains me an follow da odda spirits. I goin cut dem off so dey not dea peopo no moa.

⁷“Make yoaself come good an spesho fo me, cuz I yoa God Yahweh.

⁸You guys, make shua fo do wat my rules tell. I Yahweh, da One dat make you guys spesho fo me.

⁹“If anybody [put kahuna on top / talk stink bout] dea fadda o mudda [an tell dey no matta], dey gotta mahke. Cuz dey wen [put kahuna on top / talk stink] dea fadda o mudda, dey da ones get da blame, an dey gotta mahke.

¹⁰If somebody fool aroun wit anodda guy's wife, wit any odda guy wife, you guys gotta kill da guy an da wahine dat wen fool aroun.

¹¹“If somebody make sex wit his fadda's wife, he no mo respeck fo his fadda. Da guy an da wahine, gotta mahke. Da two a dem, get da blame fo wat dey do.

¹²“If somebody make sex wit dea daughter in law, da guy an da wahine gotta mahke. Wat dey wen do, az one real pilau kine ting. Da two a dem, get da blame fo wat dey wen do.

¹³“If one guy make sex wit anodda guy jalike he make sex wit one wahine, az pilau dat. You guys gotta kill dem. Da two a dem, get da blame fo wat dey do.

¹⁴“If somebody marry one wahine an her mudda too, az one real bad kine ting. You guys gotta burn da guy an da wahines in da fire fo kill um. Dat way, da kine real bad stuff no goin stay wit you guys.

¹⁵“If somebody make sex wit one animal jalike az one wahine, you guys gotta kill da guy an da animal.

¹⁶“If one wahine go by one animal fo make sex wit um, you guys gotta kill da wahine an da animal. Dey gotta mahke cuz dey get da blame fo wat dey wen do.

¹⁷“If somebody marry his sista, no matta his fadda's girl o his mudda's girl, an dey make sex togedda, az shame fo dem. You guys gotta cut dem off in front all da peopo, so dey not dea peopo no moa. Da guy make his sista shame, so he get da blame fo dat.

¹⁸“If somebody make sex wit one wahine wen she get her sick time ery month, he wen show wea da blood stay come from, an she wen show um too. You guys gotta cut dem off so dey not yoa peopo no moa.

¹⁹“No make sex wit yoa mudda's sista o yoa fadda's sista, cuz dat goin show dat you no mo respeck fo one close ohana. You two guys get da blame togedda fo dat.

²⁰“If somebody sleep wit his auntie, he show dat he no mo respeck fo da uncle. Dey get da blame fo do one bad ting. Wen dey mahke, dey no goin get kids.

²¹“If somebody marry an make sex wit his brudda's wife an da brudda still alive, az one pilau ting. He no mo respeck fo his brudda. Dey goin get kids.

²²“You guys gotta make shua fo do wat all my rules tell, eryting I tell you cuz I da judge. Den no need throw out you guys from da land wea I goin bring you guys fo live.

²³You guys betta not make like da odda peopos ova dea. I goin throw dem outa da land in front you guys. Cuz dey do all dis pilau kine stuff, I hate dem.

²⁴But I wen tell you guys, ‘You guys goin take ova dea land, an you guys goin own um. Az one land dat get plenny milk an honey.’ I yoa God Yahweh. I wen make you guys diffren den all da odda peopos.

²⁵“Az why you guys gotta know an make diffren, da kine animals an birds dat you guys can eat, an da kine animals an birds dat you guys no can eat. No make yoaself pilau from eat one animal o bird, o da kine animal dat move aroun on top da groun -- da kine I tell you guys fo no eat, cuz dey make you so you guys no can come in front me.

²⁶You guys suppose to be spesho fo me, cuz I Yahweh, an I stay good an spesho. I wen make you guys diffren den da odda peopos, fo come mines.

²⁷“Da guys o da wahines dat talk to da mahke peopo, o dat know how fo find out wat da mahke peopo spirits know, dey gotta mahke. You guys goin throw stones at dem fo kill dem. Dey get da blame fo wat dey wen do.”