Read Hawaii Pidgin Leviticus 22 Bible Online

Leviticus 22 - Hawaii Pidgin bible

Leviticus 22

¹Yahweh tell Moses fo tell Aaron an his boys

²“Take care! Goin come some times wen da pries guys no can touch da sacrifices dat da Israel peopo make spesho fo me. Cuz if dey touch um wen dey not suppose to, dey goin make dirty my good an spesho name. I Yahweh.

³“Tell um dis: Fo da pries guys dat stay alive now an bumbye, if anybody from dea ohana no can come in front me, an yet dey come nea da sacrifices dat da Israel peopo make spesho fo me, Yahweh, you guys gotta cut dem off so dey no can come in front me. I Yahweh.

⁴“If any a da pries guys dat come from Aaron get da kine sick on top dea skin dat odda guys can catch, o someting come outa dea body, dey no can eat da kine sacrifice dat stay spesho fo me, till da ting pau an den dey can come in front me. Dey no can come in front me if dey touch someting dat wen touch one mahke body, o if dey get semen come out from dem,

⁵o if dey touch anyting dat crawl dat make um so no can come in front me, o if dey touch anybody dat make um so no can come in front me, no matta wat make um lidat.

⁶Any pries guy touch dat kine stuff, dey no can come in front me till da sun go down. Dey no can eat da food from one sacrifice dat stay spesho fo me, till dey bafe wit watta.

⁷Afta da sun go down, an dey stay clean, den dey can come in front me, an afta dat can eat da sacrifice dat stay spesho fo me, cuz az dea food.

⁸Da pries guys no can eat animal dat awready mahke o dat da wild animals wen rip um up, cuz dat goin make um so he no can come in front me. I Yahweh.

⁹“Da pries guys gotta do wat I tell um fo do, so dey no get da blame an mahke cuz dey no mo respeck fo wat I tell. I Yahweh, an I make dem spesho fo me.

¹⁰“No mo nobody can eat da sacrifices dat stay spesho fo me, ony da pries guys an dea ohana can eat um. His friend dat come stay wit him his house, an da guy he pay fo work fo him, dey no can eat um.

¹¹But if one pries guy buy one slave wit silva, o if one slave wen born inside da pries guy house, dat slave can eat his food.

¹²If one pries girl marry somebody dat not one pries, she no can eat any food dat stay spesho fo me.

¹³But if one pries girl come one widow o get divorce, an no mo kids, an her go back live inside her fadda's house, jalike wen her young, her can eat her fadda's food. But no odda guy can eat um.

¹⁴“If somebody not from da pries ohana eat da food dat stay spesho fo me, an neva know stay spesho befo, dey gotta pay back da pries guy fo da sacrifice, an twenty percent moa.

¹⁵Da pries guys betta not make pilau da spesho sacrifices da Israel peopo give me, Yahweh,

¹⁶cuz dey let da odda peopo eat da food dat stay spesho fo me. Cuz den da pries guys make da odda peopo get da blame fo eat da spesho kine food, so den da odda peopo gotta make da kine sacrifice fo take away da blame. Me, Yahweh, I da one make da pries guys spesho fo me.”

¹⁷Yahweh tell Moses

¹⁸fo tell Aaron an his boys an all da Israel peopo dis: “Any Israel guy, o any guy from odda place dat live by you guys, if dey like give one animal fo make one burn up kine sacrifice fo me, Yahweh, fo one strong promise dey wen make, o cuz dey like do um,

¹⁹dey gotta give one boy kine cow dat no mo notting wrong wit um, o one boy kine sheep, o one boy kine goat. Den I goin take um an make good fo dem.

²⁰No bring anyting dat get someting wrong wit um, cuz I no goin take um fo make good fo you guys.

²¹Wen anybody bring one a da cows o da sheeps fo make da kine sacrifice dat show dat dem an me, Yahweh, stay tight wit each odda, cuz a one strong promise dey wen make, o cuz dey like do um, gotta be one animal dat no mo notting wrong wit um. Den I goin take um from dem.

²²No bring me one animal dat no can see, o dat get broke bone, o bad cut, o dat get sore dat get pus run out, o get rash o odda sick on top da skin. No put dese kine animals on top da altar fo one sacrifice you make wit fire fo me, Yahweh.

²³Wen you give one sacrifice ony cuz you like give, you can give one boy kine cow o sheep dat no come out good, o small, but I no take dat kine sacrifice if you wen make one strong promise fo make sacrifice fo me.

²⁴You betta not give me one animal dat get dea privates cut off o mess up. You betta not make lidat wen you reach yoa own land,

²⁵an you guys betta not take dat kine animals from one guy from odda place, an make sacrifice fo give um to me fo food. I no goin take um fo make good fo you guys, cuz dey get someting wrong wit um.”

²⁶Yahweh tell Moses:

²⁷“Wen one bebe cow, bebe sheep, o bebe goat born, dey gotta stay wit dea mudda fo seven days. From da day numba eight, I goin take um fo da kine sacrifice you make wit fire fo me, Yahweh.

²⁸No kill one mudda cow o one mudda sheep da same day you kill dea bebe.

²⁹“Wen you make da kine sacrifice fo tank me, Yahweh, make um da right way so I goin take um an make good fo you.

³⁰You gotta eat um da same day you kill um, an no leave notting till morning. I Yahweh.

³¹“Make shua you lissen wat I tell you fo do, an do um. I Yahweh.

³²No talk bad an make dirty my good an spesho name. All da Israel peopo gotta show dat dey know I good an spesho. I Yahweh, da One make you guys spesho fo me.

³³I wen bring you guys outa Egypt, fo me come yoa God. I Yahweh.”