Read Hawaii Pidgin Leviticus 23 Bible Online

Leviticus 23 - Hawaii Pidgin bible

Leviticus 23

¹Yahweh tell Moses

²fo tell da Israel peopo dis: “Dese da spesho times dat I, Yahweh, tell you guys fo make. You guys goin call all da peopo fo come togedda fo dose times dat stay spesho fo me.

³“Get six days wen you guys can work. But day numba seven, az da Res Day, fo erybody res. Dass wen you guys goin come togedda fo do stuff dat spesho fo me. No matta wea you guys live, you no can work dat day. Az one Res Day you give fo me, Yahweh.

⁴“Dese, da odda spesho times fo come togedda fo me, Yahweh. You guys goin tell da peopo wen da times goin come dat stay spesho fo me.

⁵Da Passova fo Yahweh start wen da sun go down, da month numba one, day numba 14.

⁶Da day afta da Passova, anodda spesho time fo Yahweh start, wen erybody eat da Bread Dat No Mo Yeast. Fo seven days, all da bread you guys eat, gotta be da kine dat no mo yeast.

⁷Da firs day afta da Passova, tell da peopo fo come togedda fo one time dass spesho fo me, Yahweh, an no do regula kine work.

⁸Fo seven days, make da kine sacrifices you make wit fire fo me. Da day numba seven, come togedda fo da time dass spesho fo me, an no do regula kine work.”

⁹Yahweh tell Moses

¹⁰fo tell da Israel peopo dis: “Wen you guys go inside da land I goin give you, an you guys cut da food dat you grow, bring da pries guy one bunch wheat you tie up from da firs wheat you cut.

¹¹Da day afta da Res Day, he goin lif up da wheat in front me, Yahweh, so I goin take um, az one sacrifice from you guys.

¹²Da same day you lift up da wheat, you gotta make one burn up kine sacrifice for me, Yahweh, wit one bebe sheep, one year ol, dat no mo notting wrong wit um.

¹³An you gotta make sacrifice wit wheat o barley wit four pound flour, mix wit olive oil. Az one sacrifice you make wit fire, one real nice smell dat I like. An you pour out one quart wine by da altar fo make one drink sacrifice.

¹⁴You guys no can make da bread fo eat, o roast da wheat o barley an eat um, o eat da new wheat o barley, till da day you bring da sacrifice dat go wit da wheat in front me, yoa God. You guys an yoa kids goin do how dis rule tell foeva, no matta wea you guys live.”

¹⁵“Da day afta da Res Day wen you bring da wheat you cut an tie um up, fo make da sacrifice you lif up, from dat day, count seven weeks.

¹⁶Den count to day numba fifty, up to da day afta da Res Day numba seven. Dat day, make anodda sacrifice fo me, Yahweh. Use da new wheat you jus cut dat week.

¹⁷From wea eva you guys live, ery house an dea ohana gotta bring two breads you make from four pound fancy kine flour from da inside a da wheat. Make um wit yeast. Den give um to da pries guys fo him make da kine sacrifice you lift up fo me, Yahweh.

¹⁸Wit dis bread, you gotta give seven boy kine bebe sheep, one year ol kine, an no mo notting wrong wit um. An give one young boy kine cow, an two boy kine sheeps. Dis goin be one burn up kine sacrifice fo me, Yahweh. Wit da sacrifice from da wheat, an da sacrifice wit da wine, az one sacrifice dey make wit fire, an dey make one real nice smell fo me, Yahweh.

¹⁹Den, make sacrifice wit boy kine goat fo da kine sacrifice cuz a da bad kine stuff da peopo wen do, an two boy kine bebe sheep, da one year ol kine, fo make da kine sacrifice dat show dat you guys an me, Yahweh, stay okay.

²⁰Da pries guy goin lif up da two boy kine bebe sheep in front me, Yahweh, wit da bread from da wheat you cut dat time. Az one sacrifice dat stay spesho fo me, Yahweh, an da food, az fo da pries guy.

²¹Dat same day, you goin tell da peopo fo come togedda fo one spesho religious time, an no do regula kine work. Dis goin be one spesho time you guys an yoa kids goin make from now an foeva, no matta wea you guys stay live.

²²“Wen you cut da food from yoa field inside yoa land, no cut um all da way by da edge a da land, o pick up da extra food dat da harvesta guys no pick up. Leave um dea fo da peopo dat no mo notting, an da peopo from odda place dat stay live wit you guys. I yoa God Yahweh.”

²³Yahweh tell Moses

²⁴fo tell da Israel peopo dis: “Da month numba seven, da firs day, you guys make one day wen you guys res, an make one spesho time fo come togedda so you guys no foget wat I do. Blow horns real loud fo bring erybody togedda.

²⁵No do regula kine work, but make sacrifice wit fire fo me, Yahweh.”

²⁶Yahweh tell Moses:

²⁷“No foget, da month numba seven, da day numba ten, nine day afta da Blow Da Horn time, az da Day Fo Bring Da Peopo Da Same Side Wit Me, Yahweh. Erybody gotta come togedda fo one religious time dat stay spesho fo me. You guys no can eat food dat day, so you can pray an make sacrifice wit fire fo me, Yahweh.

²⁸No do work dat day, cuz az da day fo bring da peopo da same side wit me, yoa God Yahweh.

²⁹Anybody eat food dat day, you gotta cut dem off so dey not yoa peopo no moa.

³⁰I goin wipe out from dea peopo anybody dat do work dat day.

³¹You guys no can do work notting. Dis one ting you guys gotta do now an foeva, wea eva you guys stay live.

³²Az one res day fo you guys, an you guys no can eat food so you can pray. From day numba nine wen da sun go down, till da same time da nex day, az one res day fo you guys.”

³³Yahweh tell Moses

³⁴fo tell da Israel peopo dis: “‘Da month numba seven, da day numba fifteen, five days afta da Day Fo Bring Da Peopo Da Same Side Wit Me, Yahweh, anodda religious time dass spesho fo me, Yahweh, start, wen all you guys gotta live in shacks. You guys goin make um an live inside fo seven days.

³⁵Da firs day, az spesho fo me, Yahweh. Da peopo gotta all come togedda an no do regula kine work.

³⁶Fo seven days you guys gotta make sacrifices wit fire fo me, Yahweh. Day numba eight, az spesho fo me too. Erybody gotta come togedda one mo time, an make sacrifice wit fire fo me, Yahweh. Az da last time fo come togedda an stay spesho fo me, an no do work.

³⁷(“Dese da spesho religious times I Yahweh tell you guys fo make ery year. You goin tell da peopo fo come togedda fo dese times dat stay spesho fo me, an fo bring da kine sacrifices dey make wit fire. Az da burn up kine sacrifices, da sacrifices wit wheat o barley, an sacrifices wit stuff fo eat an drink, wateva dey suppose to do fo dat day.

³⁸Dese sacrifices az some mo from da ones fo my Res Days, an mo den da presents, an wateva you make strong promise fo, an fo wateva you give me, Yahweh, jus cuz you like give um.

³⁹“So, fo da Shacks, you guys start da month numba seven, da day numba fifteen, afta you guys bring togedda da food you cut from da land. Den you guys make dis spesho religious time fo me, Yahweh, fo seven days. Day numba one, az one res day. An day numba eight, az anodda res day.

⁴⁰Day numba one, you guys goin take da bestes kine fruit from da trees, an palm branches, an odda branches wit leafs, an branches from da poplar tree. Fo seven days you guys goin show dat you stay good inside in front me, yoa God Yahweh.

⁴¹Ery year, all you guys gotta make dis spesho religious time fo me, Yahweh. You an yoa kids goin make um ery year da month numba seven. Dis, az anodda ting you guys gotta do from now an foeva, wea eva you guys stay live.

⁴²Make shacks an live inside um fo seven days. Erybody dat born from one Israel ohana, goin make shacks fo dea small ohana an live inside um.

⁴³Dass so yoa kids an grankids no foget bumbye dat I wen tell da Israel peopo fo live inside shacks, da time I bring dem outa Egypt. I yoa God Yahweh.”

⁴⁴So Moses tell da Israel peopo bout da spesho religious times dat Yahweh tell um fo make.