Read Hawaii Pidgin Leviticus 25 Bible Online

Leviticus 25 - Hawaii Pidgin bible

Leviticus 25

¹Da time Moses stay up on top a Mount Sinai, Yahweh tell Moses

²fo tell da Israel peopo dis: “Wen you guys go inside da land I goin give you guys, den ery seven year, da land gotta res fo me, Yahweh.

³Fo six years you guys can plant yoa fields, an fo six years you can trim da grape plants an cut da food.

⁴But da year numba seven, az da Res Year, wen da land goin res fo me, Yahweh. All dat year, you no can plant seed inside yoa fields, an no can trim da grape plants.

⁵No go fo cut da food dat grow from da seed you wen drop da las time you cut food, o da grapes dat grow wea you no trim. Da land goin get one year fo res.

⁶Wateva come up dat year dat you guys no work fo plant, goin be food fo you guys, fo da guys an wahines dat work fo you guys, fo da guys you pay fo work fo you guys, an fo da peopo from odda place dat live wit you guys.

⁷Yoa animals, an da wild animals inside yoa land can eat um too. Wateva come up from da land, can eat um.

⁸“You guys count seven Res Years--az seven times seven years--so da seven Res Years make forty-nine years.

⁹Den, da month numba seven, day numba ten, az da Day Fo Bring Back Da Peopo Da Same Side Wit God, az da year numba fifty. Dat time, peopo goin blow da sheep horn trumpets all ova you guys land.

¹⁰Make da year numba fifty spesho fo me! Tell all ova da land dat erybody gotta give back da land an da peopo dey wen buy to da real ownas. Az goin be da spesho Give Back Year numba fifty wen erybody goin go back fo take ova da property dey wen own befo time, an come one small ohana peopo one mo time.

¹¹Az goin be da spesho Give Back Year, numba fifty. No go plant seed dat year, an no use da food dat grow from wat wen fall down da las time you cut food, o da grapes dat grow wea you no trim.

¹²Az da Give Back Year numba fifty. You guys, you gotta make dat year spesho fo me, Yahweh. You can eat da food you get from da fields.

¹³“Da Year Fo Give Back, numba fifty, erybody goin go back dea own property.

¹⁴“If you guys sell land to one Jew, o buy land from dem, no try scam each odda.

¹⁵If you guys goin buy land from one Jew, you gotta figga how much fo pay, from da numba a years dat come afta da spesho Year Fo Give Back. An da one dat sell, gotta sell you da land an figga how many years still get fo you cut food, till da nex Year Fo Give Back.

¹⁶Wen get plenny mo years fo cut food, you gotta pay mo fo um, an wen no mo plenny years, you pay um ony litto bit fo um, cuz da ony ting dey sell you fo real kine, is how plenny years you can cut da food from dat land.

¹⁷No scam each odda, but stay scared an show respeck fo me, Yahweh. I yoa God Yahweh.

¹⁸“Do wat my rules tell, an make shua fo do wat I say. Den you guys goin live inside da land an no need worry.

¹⁹Den da land goin give plenny food, an you guys goin get plenny fo eat, an live good ova dea, an no need worry.

²⁰You guys goin aks, ‘Wat us guys goin eat da year numba seven, if we no can plant seed o cut food?’

²¹I goin make real good fo you guys da year numba six, so da land goin grow plenny nuff food fo three years.

²²Da year numba eight, wen you guys plant, you guys still yet goin eat da food you wen cut befo, an stay eat um till you cut da new food da year numba nine.

²³“You guys no can sell da land to somebody foeva, cuz da land az mines, an you guys stay live on top my land ony short time.

²⁴All ova da land dat stay yoas, you guys gotta make shua dat whoeva wen sell dea land to you, can buy um back.

²⁵“If one Jew no mo notting, so he sell some a da ohana land, one guy dass da mos nea ohana to him, suppose to come fo buy back wat da odda guy wen sell, so da land still stay wit da ohana.

²⁶But if one guy no mo ohana fo buy um back fo him, but den bumbye da guy make good, an can buy um back,

²⁷firs he gotta figga how much da crops worth from da year wen he sell um till now. Den he goin pay back da guy dat wen buy da land fo wateva he goin grow now till da Give Back Year. So now, he can get his property back again.

²⁸But if da guy dat own da land befo time no mo nuff fo buy um back, den da guy dat wen buy da land can keep um till da spesho Year Fo Give Back. Dat year, da guy dat wen buy um gotta give um back to da guy dat wen own um befo, so den da firs owna guy can go back to his land.

²⁹“If one guy sell one house, inside one big town dat get wall aroun um, he get da right fo buy um back one year afta he wen sell um. He can buy um back dat year.

³⁰If he no buy um back dat same year, da house inside da big town dat get wall goin stay fo da guy dat wen buy um, an stay fo him an his ohana foeva. He no gotta give um back inside da spesho Year Fo Give Back.

³¹But da kine house inside one small town dat no mo wall aroun um, dey jalike da land outside da towns. Da guy dat wen sell um, o somebody from da guy ohana, can buy um back. An da guy dat buy um, gotta give um back, da spesho Year Fo Give Back.

³²“But inside da towns dat da Levi ohana get, da guys dat come from dat ohana get da right fo buy back any house dey wen sell.

³³So da Levi ohana property, dey can buy um back. Dey can sell one house inside one a dea towns, but da spesho Year Fo Give Back, da new owna gotta give um back. Az cuz da houses inside da Levi ohana towns, az da ony property dey get inside da Israel land.

³⁴But da fields dat da Levi ohana peopo own aroun dea towns fo da cows an sheeps eat dea, dey no can sell um. Dat stay fo dem foeva.

³⁵“If get Jews dat no mo notting, an no can work, help dem jalike you help one guy from odda place o one guy dat live nea you fo short time. Den dey can live wit you guys.

³⁶No make um pay interes o pay back mo den wat dey wen borrow, but show respeck fo God cuz you stay scared a him. Dass how da Jews dat no mo notting can still stay live wit you guys.

³⁷You betta not make dem pay interes fo wat dey borrow, o sell dem food fo mo den wat da food cost.

³⁸I Yahweh, yoa God. Was me wen bring you guys outa Egypt, an give you guys da Canaan land, an fo come yoa God.

³⁹“If one a yoa peopo owe you plenny dat he no mo notting, an he sell himself to you fo pay you off, no make him work jalike one slave.

⁴⁰You goin make to him jalike one guy you pay fo work fo you, o jalike one guy dat live nea you fo short time. He goin work fo you, ony till da spesho Year Fo Give Back come.

⁴¹Den you goin let him an his kids go, an dey goin go back by his own ohana an da property dat his ancesta guys own from befo time.

⁴²Da Israel peopo, dey slaves fo me, Yahweh, cuz I wen bring dem outa Egypt. Az why you guys betta not sell dem fo come slaves fo odda peopo.

⁴³No give dem hard time, but show respeck fo me, yoa God.

⁴⁴“Da guys an wahines dat you guys like come slaves fo real kine, dey goin come from da odda peopos dat stay live aroun you guys. You guys can buy slaves from dem.

⁴⁵You guys can buy da peopo dat live nea you fo short time too, an peopo from dea ohanas dat wen born inside yoa land. Dey can come yoa slave.

⁴⁶You guys can give da slaves dat not Jews to yoa kids wen you mahke, fo come yoa kids slave. You guys can make dem slaves all da time dey stay alive. But you betta not give hard time to da Jews dat yoa slave, cuz da Israel peopo, dey yoa brudda guys.

⁴⁷“If one guy from odda place, o one guy dat live wit you guys fo short time, come rich, an one Jew no mo notting, so da Jew guy sell himself to da guy from odda place dat live nea you, o to da guy's ohana,

⁴⁸da Jew still get da right fo somebody buy him back afta he wen sell himself. One a his ohana guys can buy him back.

⁴⁹One uncle o one cousin, o odda ohana can buy him back. O if da slave guy come rich, he can buy himself back.

⁵⁰Da Jew dat stay slave an da guy dat wen buy him da firs time, dey goin figga da time from da year he wen sell himself till da spesho Year Fo Give Back. Den da price fo buy him back goin be da same jalike dey goin pay one guy dat work fo dem fo da res a dat time.

⁵¹If get plenny mo years still yet till da spesho Year Fo Give Back, he gotta pay mo plenny fo buy himself back, almos da same jalike da guy pay fo buy him.

⁵²If ony litto bit time stay till da spesho Year Fo Give Back, he goin figga dat an pay ony litto bit fo wat da guy wen pay fo him.

⁵³Da guy from odda place dat live wit you guys, gotta make to da Jew dass his slave, jalike one guy he pay fo work fo him year afta year. You gotta make shua dat da guy dat own him now, no make mean to him.

⁵⁴“Even if da ohana guy o he no can buy him back, da owna gotta let him an his kids go, wen da spesho Year Fo Give Back come.

⁵⁵Cuz da Israel peopo, az slaves fo me, Yahweh. Dey work fo me, an I wen bring dem outa Egypt. I Yahweh, an I da God fo you guys!”