Read Hawaii Pidgin Leviticus 4 Bible Online

Leviticus 4 - Hawaii Pidgin bible

Leviticus 4

¹Yahweh tell Moses

²fo tell da Israel peopo dis: “Wen somebody do someting bad, but dey do um befo dey tink bout um, wen dey do wat my rules tell dat dey not suppose to do, dey gotta make lidis:

³“If da guy dat do someting bad stay da main pries guy dat I, Yahweh, wen pick, dat goin make blame fo all da peopo. So da pries guy gotta bring one young boy kine cow fo me, dat no mo notting wrong wit um, an make sacrifice cuz he da one wen do something bad.

⁴He goin bring da boy kine cow in front me, Yahweh, by da door fo da Tent wea da peopo come fo meet me. He goin put his hand on top da head a da cow, an kill um in front me.

⁵Den da pries guy dat I wen pick goin take some a da boy kine cow's blood inside da Tent wea da peopo come fo meet me, Yahweh.

⁶Da pries guy goin put his finga inside da blood, an sprinkle um seven times in front me, Yahweh, in front da thick curtain fo da place dat stay spesho fo me.

⁷An da pries guy goin put some blood on top da tings jalike horns dat stick outa da alter. Dass da small altar fo incense dat smell nice dat stay in front me, Yahweh, inside da Tent wea da peopo come fo meet me. All da lefova blood, he goin pour um outside, down by da bottom a da big altar wea dey burn up da sacrifice, by da door fo da Tent wea da peopo come fo meet me.

⁸Da pries guy goin take off all da fat from da boy kine cow, da fat dat cova da inside parts, o dat stick wit um. He goin use um fo make sacrifice cuz he da one wen do someting bad.

⁹He goin take both kidneys wit da fat on top um in da middo a da rib an da hip bone, da part a da liver dat stick out. He goin take um out wit da kidneys.

¹⁰He take um out jalike he take out da fat from da cow dey kill fo da sacrifice dat show dat him an me stay tight. Den da pries guy goin burn da fat on top da altar fo da kine sacrifice dey burn up.

¹¹But den, da skin from da cow, an da meat, an head, an legs, da inside parts, an da kukae,

¹²all dat, da pries guy goin take um all outside da camp by one place dey make clean fo me, Yahweh, wea dey throw da ashes. He goin make one fire wit wood an burn um ova dea on top da ashes.

¹³“If all da Israel peopo da ones dat mess up togedda befo dey tink bout um, an dey do wat my rules tell dey not suppose to do dat, no matta dey donno dat wat dey do, stay bad, still yet dey get da blame fo do um.

¹⁴Wen dey find out dat dey do wass wrong, dey gotta bring one young boy kine cow fo make sacrifice cuz a da bad ting dey wen do. Dey goin bring um in front da Tent wea da peopo come fo meet me.

¹⁵Da older leaders fo da peopo goin put dea hand on top da head a da sacrifice cow in front me, Yahweh. Den dey goin kill da cow in front me.

¹⁶Den da main pries guy dat I Yahweh wen pick, goin take some a da blood inside da Tent wea da peopo come fo meet me.

¹⁷He goin put his finga inside da blood an sprinkle um seven times in front me, Yahweh, in front da thick curtain inside da tent.

¹⁸He goin put some a da blood on top da tings jalike horns dat stick outa da small altar dat stay in front me, Yahweh, inside da Tent wea da peopo come fo meet me. All da res a da blood, he goin pour um outside down by da big altar fo da burn up kine sacrifice, dat stay outside da door fo da Tent wea da peopo meet wit me, Yahweh.

¹⁹He goin take off all da fat from da cow, an burn um on top da altar fo make smoke.

²⁰He goin make dis kine sacrifice wit da boy kine cow, jalike he wen do wit da odda boy kine cow fo da sacrifice dey make wen da main pries guy do bad kine ting. Az how da pries guy goin bring da peopo da same side wit God. Den God goin let go da peopo, an hemo dea shame fo da bad kine stuff dey wen do.

²¹Den da pries guy goin take da boy kine cow outside da camp, an burn um jalike he burn da odda boy kine cow. Az da kine sacrifice fo make fo all da peopo dat do bad ting.

²²“Wen one leada guy do wat one a Yahweh's rules tell he not suppose to do, but he no tink bout um befo, an he do um, he get da blame fo make lidat.

²³Wen he find out dat wat he wen do, stay wrong, he gotta bring one boy kine goat dat no mo notting wrong wit um.

²⁴He goin put his hand on top da goat's head, an kill um da same place wea dey kill da animal fo make burn up kine sacrifice in front Yahweh. Az da kine sacrifice fo wen somebody do something bad.

²⁵Den da pries guy goin take some a da blood from da sacrifice wit his finga, an put um on top da tings jalike horns dat stick out from da altar fo da burn up kine sacrifice, an pour out da res a da blood aroun da bottom a da altar.

²⁶He goin burn all da fat on top da altar, jalike he burn up da fat fo da kine sacrifice dat show him an Yahweh stay tight wit each odda. Az how da pries guy goin bring back da leada guy da same side wit Yahweh, an Yahweh goin let da guy go, an hemo his shame from da bad ting he wen do.

²⁷“If one a da odda kine peopo do someting bad, an no tink bout um, an he do wat one a my rules tell dat nobody suppose fo do, he goin get da blame fo dat.

²⁸Wen somebody tell him dat wat he wen do, stay wrong, den he gotta take one girl kine goat dat no mo notting wrong wit um, fo be da sacrifice fo da bad ting he wen do.

²⁹He gotta put his hand on top da head a da animal fo da sacrifice cuz he wen do da bad ting, an kill um by da place wea dey make da burn up kine sacrifice.

³⁰Den da pries guy goin take some a da blood wit his finga, an put um on top da tings jalike horns dat stick out from da altar fo da burn up kine sacrifice, an pour out da res a da blood aroun da bottom a da altar.

³¹Da pries guy goin take out all da fat, same ting jalike dey take um out fo da sacrifice dat show dat da guy an Yahweh stay tight wit each odda. Den he goin burn up da fat on top da altar. Da smoke goin be one real nice smell fo me, Yahweh. Az how da pries guy goin bring da guy back da same side wit me. Den I goin let him go, an hemo da shame from da bad ting he wen do.

³²“If da guy bring one bebe sheep fo make da sacrifice cuz he wen do bad ting, he goin bring one girl kine bebe sheep dat no mo notting wrong wit um.

³³He goin put his hand on top da head a da sacrifice animal, an kill um fo make sacrifice cuz a da bad ting he wen do, by da same place wea dey kill animal fo make da burn up kine sacrifice.

³⁴Den da pries guy goin take some a da blood wit his finga from da sacrifice fo da bad ting da guy wen do, an put um on top da tings jalike horns dat stick out from da altar fo da burn up kine sacrifice, an pour out da res a da blood aroun da bottom a da altar.

³⁵He goin take out all da fat, jalike dey take out da fat from da bebe sheep fo da sacrifice dat show dat me an da guy stay tight wit each odda. An da pries guy goin burn da fat on top da altar on top all da kine sacrifices dat dey make wit fire fo me, Yahweh. Az how da pries guy goin bring da guy back da same side wit me. An me, Yahweh, no matta da guy wen do bad kine stuff, I goin let him go an hemo his shame.”