Read Hawaii Pidgin Leviticus 5 Bible Online

Leviticus 5 - Hawaii Pidgin bible

Leviticus 5

¹“If somebody do bad ting cuz he no say notting wen da judge put kahuna on top erybody dat wen see someting happen o know wat wen happen, if dey no say notting. Den da guy get da blame cuz he no talk.

²“Maybe somebody touch someting dat make dem so dey no can come in front me, Yahweh. Jalike dey touch da mahke wild animals, o mahke animals dat da peopo take care um, o mahke animals dat run aroun on top da groun. Even if da guy donno dat he wen touch um, he still yet get blame an no can come in front me, Yahweh.

³“O if somebody touch someting dat come outa anodda guy body an make um so he no can come in front me, Yahweh, o any odda kine ting dat make um so he no can come in front me, Yahweh. Den, no matta if da guy donno he wen touch um, wen he find out bout um, he still yet get da blame.

⁴“O if somebody make strong promise fo do someting, no matta good o bad, but he no tink bout um befo he make da promise, no matta he no rememba da promise, wateva kine ting he do lidat, wen he find out bout um, he still yet get blame.

⁵“Wen somebody get da blame cuz a one a dese tings, he gotta tell wat he wen do wrong fo get da blame.

⁶Den, cuz he get blame fo da bad ting he wen do, he gotta bring one girl kine bebe sheep o girl kine goat fo make sacrifice to Yahweh, an den da pries guy goin bring him back da same side wit Yahweh.

⁷“If da guy get blame fo do bad ting, but he no mo notting fo buy one bebe sheep, he gotta bring two doves o two young pigeons in front Yahweh, fo make um right, one fo da sacrifice cuz a da blame, an da odda fo da kine sacrifice dey burn up.

⁸He goin bring um by da pries guy. He goin give da firs one to da pries guy fo da sacrifice cuz a da bad ting he wen do. Da pries guy goin pull da head from da neck, but no take um off all da way.

⁹Den he goin sprinkle some a da blood from da sacrifice on top da sides a da altar, an pour da res a da blood aroun da bottom a da altar. Az da kine sacrifice fo wen somebody do bad ting.

¹⁰Den da pries guy goin make one burn up kine sacrifice from da odda sacrifice bird, da way he suppose to do um. Dass how da pries guy goin bring da guy back da same side wit Yahweh. An Yahweh goin let him go an hemo his shame cuz a da bad ting he wen do.

¹¹“But if da guy no mo notting fo buy da two doves o two young pigeon, he gotta bring two quart a da bestes kine flour fo make sacrifice cuz a da bad kine ting he wen do. He no can put olive oil o incense on top um, cuz dis fo make sacrifice cuz a da bad ting he wen do.

¹²He goin bring da flour by da pries guy. Da pries guy goin take one hand full a da flour an burn um on top da odda sacrifices dey burn. Az da part fo tell da peopo dat da whole sacrifice stay fo Yahweh, one sacrifice wit fire fo Yahweh cuz da guy wen do bad ting.

¹³Az how da pries guy bring da guy back da same side wit me, cuz a da bad ting he wen do. An I goin let him go an hemo his shame. Da odda part a da sacrifice goin be fo da pries guy, jalike wit da wheat an barley kine sacrifice.”

¹⁴Yahweh tell Moses:

¹⁵“Maybe somebody show dat I no can trus um, cuz he foget bring da presents dat stay spesho fo me, Yahweh, but da guy neva tink befo he foget um dat he suppose to do um. Cuz he get da blame, he gotta bring one boy kine sheep dat no mo notting wrong wit um, an cost da right silva weight dey use inside my spesho place. Dis da kine sacrifice fo pay fo da blame fo do someting bad to somebody.

¹⁶He gotta make um right wit wateva he wen mess up bout bring da tings he suppose to bring dat stay spesho fo me, an twenty percent moa. He gotta give um all to da pries guy, an da pries guy goin make sacrifice wit da boy kine sheep fo bring da guy back same side wit me, Yahweh. Den I goin let da guy go, an hemo his shame [from / cuz a] da bad ting he wen do.

¹⁷“If somebody do something bad, cuz he do wat my rules say he not suppose to do, no matta da guy donno az wrong, he get da blame fo dat, an he goin get punish.

¹⁸Cuz he get da blame fo dat, he gotta bring one boy kine sheep dat no mo notting wrong wit um, an dat you tell cost da right silva weight, an give um to da pries guy. Da pries guy goin make sacrifice fo him wit da boy kine sheep cuz a wat he wen do, no matta he neva know he wen do da wrong ting. Az how da pries guy goin bring him back da same side wit me, Yahweh. An I goin let him go, an hemo his shame.

¹⁹Az how fo make sacrifice wen somebody get da blame fo do someting bad agains me, Yahweh.”