Read Hawaii Pidgin Daniel 1 Bible Online

Daniel 1 - Hawaii Pidgin bible

Daniel 1

¹Da year numba three wen Jehoiakim stay da king fo Judah, da Babylon king Nebukadnezzar come Jerusalem. He put his army guys all aroun da town so nobody can come inside o go outside.

²Da Boss Yahweh let da Babylon guys catch Jehoiakim, da Judah king. An afta dey take ova Jerusalem, dey take some a da stuff from da Temple Fo God. Dey take um Babylon side to dea temple fo dea god, an put um inside da store house fo all dea rich kine stuff.

³Den da king tell Ashpenaz, da main guy dat stay in charge a all his palace peopo, fo bring him some a da Israel guys dat stay Babylon side from da Israel king's ohana, an from da ali`i guys.

⁴Ashpenaz suppose to bring young guys dat no mo notting wrong wit dea body, good looking, know how fo learn all kine stuff, an know plenny awready, dat can undastan stuff firs time, an smart fo work fo da Babylon king inside his palace. Ashpenaz gotta teach dem da Babylon language, an all da books dat guys wen write Babylon side.

⁵Da king give Ashpenaz da kuleana fo make shua da guys he teaching get food ery day from da king's food, da same kine food da king eat an da same kine wine he drink. Da teacha guys suppose to teach dem fo three years, an afta dat, dey get job working fo da king.

⁶Some a da guys Ashpenaz wen pick come from da Judah ohana: Daniel, Hananiah, Mishael, an Azariah.

⁷Ashpenaz give da Judah guys new kine name. He give dem Babylon kine name. To Daniel, he give da name Belteshazzar. He give Hananiah da name Shadrak. He give Mishael da name Meshak. An he give Azariah da name Abednego.

⁸But Daniel, he make up his mind dat he no goin eat da kine food an wine da king like him eat, cuz dass da kine stuff Yahweh make kapu. So Daniel tell da guy in charge fo no make him eat dat kine food.

⁹God awready wen make Ashpenaz, da guy in charge, come tight wit Daniel, an he show him pity.

¹⁰But da guy tell Daniel, “I scared a my boss da king, cuz he wen tell me wat kine food you guys gotta eat, an wat fo drink. Bumbye he goin see you look mo worsa den all da odda guys yoa age. Den da king goin chop off my head cuz a dat.

¹¹Den Daniel talk to da luna guy dat Ashpenaz wen put in charge a him, Hananiah, Mishael, an Azariah. He tell,

¹²“Try fo test me an my friends fo ony ten days. You da boss! Give us guys ony whole wheat an barley kine food fo eat an watta fo drink.

¹³Den, afta da ten day, you come see how us guys look, an how da odda young guys look, da guys dat stay eat da king kine food. Den you can make to us guys how you like, from da way you see us.”

¹⁴So da luna guy do how dey tell him, an give um da test fo ten days.

¹⁵Afta da ten days, da Israel guys look mo betta an mo strong, den da odda young guys dat eat da king kine food.

¹⁶Cuz a dat, da luna guy take away da king's kine food an wine from da Israel guys, an give um whole wheat an barley kine food.

¹⁷God make da four young Israel guys know plenny bout any kine stuff, an undastan how come stay lidat. Dey learn plenny from books, an dey know wat fo do erytime. An Yahweh wen give Daniel spesho powa fo help peopo undastan all kine stuff peopo see in dea dreams, an wen dey not sleeping too.

¹⁸Da three year pau, dat King Nebukadnezzar wen give um. Den, da guy in charge a da palace peopo bring da young guys in front da king.

¹⁹Da king talk wit all da young guys dat study togedda. He see dat from all dem, Daniel, Hananiah, Mishael, an Azariah stay mo smart den da odda guys. So da four guys wen start work fo da king.

²⁰Wateva da king aks da young Israel guys, fo find out if dey know wat fo do erytime, an how come peopo do wat dey do, he find out dat dey know ten times mo betta den all da guys inside his whole Babylon land dat can tell wat da dreams mean, o dat can stop da bad kine tings dat happen to you wen somebody put kahuna on top you.

²¹So Daniel stay work inside da palace, all da way till da year numba one wen Cyrus come king fo Babylon.