Read Hawaii Pidgin Daniel 10 Bible Online

Daniel 10 - Hawaii Pidgin bible

Daniel 10

¹Da year numba three wen Cyrus stay da king fo Persia, God give one message dat was secret befo time, to Daniel (da guy anodda king wen call Belteshazzar). Wat God show Daniel, dat message, stay true, an tell bout one big war. He undastan wat dat mean cuz he wen see um, jalike in one dream.

²Da time da message come, me, Daniel, I stay feel sore inside fo three week.

³I no eat good kine food like meat o wine, an I no comb my hair wit oil, till da three weeks pau.

⁴April 23, I stay standing on top da side a da big Tigris River.

⁵I look up, an ova dea in front me get one guy wit linen kine clotheses. He get one fancy gold belt aroun his waist.

⁶His body look like da yellow jasper jewel stone, his face look like da lightning, his eyes jalike torches dat stay burning, his arms an feets shine like bronze metal afta peopo polish um. His voice sound jalike from plenny peopo.

⁷Me, Daniel, I da ony guy dat wen see dis ting. Da guys dat stay wit me neva see um, but dey come real scared, an dey run away hide.

⁸So I stay dea by myself, da guys run away, an I da ony one dat see dis importan ting dat stay jalike one dream. I come weak. I even look like I stay wipe out. I no can do notting.

⁹Den I hear da awesome guy talking, an wen I lissen him, I pass out sleep, wit my face on top da groun.

¹⁰Den, somebody touch me an pull me up wit his hand, an put me on top my hands an knees, an I stay shaking.

¹¹He tell, “Eh Daniel! God get plenny love an aloha fo you! Tink plenny bout wat I goin tell you now! Stand up, cuz God wen send me by you now!” Wen he tell me dat, I stand up, still shaking.

¹²Den he tell me, “No scared, Daniel. Cuz from da firs day dat you wen tink fo try fo undastand da message from God, an fo put yoaself last in front yoa God, he wen hear wat you say. I come hea now, cuz a wat you wen say.

¹³But da angel guy dat stay in charge a da Persia land, he no let me come hea fo twenny-one days. Den Michael, one a da main angel guys, come fo help me, cuz I stay stuck ova dea, by da Persia king guys.

¹⁴Now, I stay come hea fo help you undastan wat goin happen to yoa peopo long time from now. Da ting you see jalike one dream, tell bout one time dat still yet goin come.”

¹⁵Wen he stay telling me all dis stuff, I look down on da groun, an no can talk notting.

¹⁶Den somebody dat look like one guy touch my lips. Den I open my mout an I can talk again! I tell da one standing in front me, “Boss, cuz a wat I wen see, I no feel good inside, an I no can do notting!

¹⁷Boss, I yoa worka guy, but I no can even talk to you now! I stay weak, an I almos no can breave.”

¹⁸Den da one dat look like one guy touch me one mo time an make me come strong again.

¹⁹“God get plenny love an aloha fo you! So, no scared! Eryting goin go good fo you! Come strong now, come strong!” Wen he talk to me, I come mo strong. I tell, “Boss, talk to me now, cuz you make me come strong.”

²⁰So he tell, “You know why I stay come by you? Pretty soon I goin go back fo make war agains da angel guy dat stay in charge a Persia. Wen I pau dea, den da angel guy dat stay in charge a Greece goin come.

²¹But still yet, I goin tell you wat stay write inside da Book Dat Tell Da Trut. (No mo nobody help me agains dose angel guys dat stay in charge a da odda countries. Ony Michael, da main angel guy fo you Israel guys, he help me.