Read Hawaii Pidgin Daniel 11 Bible Online

Daniel 11 - Hawaii Pidgin bible

Daniel 11

¹An da year numba one wen Darius da Mede guy stay king inside Persia, I, da angel guy dat wen help Michael so no mo nobody hurt him.”

²“Wat I goin tell you now, stay true too: Goin get three mo kings come king inside Persia. Den king numba four goin come. He goin come mo plenny rich kine stuff den da odda three king guys. Da rich kine stuffs he get, he goin use um fo get mo powa den da kings befo him, an wen he like make war agains da Greek country, da peopo goin follow him.

³Lata, one king goin come dat know how fo fight fo real kine. He get plenny powa, an goin take charge a da Greek peopo. Cuz a dat, he do wateva he like.

⁴Afta he mahke, his peopo goin broke up in four part, an da land wea he was king goin come four countries. Da ones dat come kings for dose countries, no goin be from his blood, an da countries no goin be da same jalike wen he was king. But odda guys goin grab da land wea he was da king, an take ova da new countries.

⁵“Da king fo da south part, dass Egypt, goin come strong. But one a his army general guys goin come mo strong den him. An he goin take ova Syria side an come king too. He goin get mo plenny land den da Egypt guy.

⁶Bumbye, da Egypt king an da Syria king goin make deal fo help each odda. One princess from da south goin marry da king fo da north, fo make good da deal. But she no goin keep da powa she get, an no goin stay strong. An da king fo da Syria land nort side no goin be strong too. One time goin come wen odda peopo goin come an throw out her, an da one dat wen marry her, an her boy, an da guy dat wen help her, an dey goin kill um all.

⁷“Lata, one guy from da princess ohana goin come fo do wat she no can do. He goin attack da Syria king army north side, an go inside his strong walls. He goin fight da north side guys an win.

⁸He goin take stuffs from dea gods, an dea god statues dat dey melt metal fo make um, an dea nice tings, dea silva an gold stuffs, an take um Egypt side. Afta dat, he no goin bodda da king fo da north side litto bit.

⁹Den anodda Syria king north side an his army goin attack da Egypt king land, south side. Afta dat, da north side guys goin go back dea own land.

¹⁰Da Syria king boys goin make ready fo make war, an put togedda one big army dat know how fo fight good. Dey goin attack da king fo da south, jalike one big flood dat nobody can stop. Dey goin fight all da way to da main place wit strong walls, wea da Egypt king stay.

¹¹“Den da Egypt king, south side, goin get real huhu. He goin go out an make war agains da Syria king, north side. Da Syria king goin put togedda one big army too, but da Egypt guy goin take ova dem.

¹²Da Egypt king make da Syria army guys come his prisonas. Den, da Egypt king goin get big head, an goin kill plenny tousand Syria guys. But he no goin win dat war yet.

¹³Az cuz da Syria king, north side, goin put togedda anodda army, mo big den da firs army. Plenny years lata, he goin go out wit one big army, wit all da stuffs dey need fo make war.

¹⁴“Dat time, plenny guys goin fight da Egypt king, south side. Eh Daniel, even some yoa Jewish guys dat like fight erytime, goin fight da Egypt king cuz yoa guys get one dream fo make dea own govmen. But dey no goin be strong nuff fo win.

¹⁵Den da Syria king, north side, goin come pile up dirt fo go ova da wall fo one big town wit strong wall, Egypt side. He goin take ova da town. Da army fo da Egypt king, south side, no goin get nuff powa fo fight da Syria king. Even dea bestes guys from da Egypt army, no goin be strong nuff fo fight dem.

¹⁶Da Syria king dat fight dem goin do wateva he like do. No goin get nobody from da Egypt army can fight da Syria army. Da Syria king goin take ova da Israel land, dat mo nice looking land. An he goin get da power fo wipe out dat whole land.

¹⁷Da Syria king goin make up his mind fo go south side wit all da powa he get cuz he da king. He goin make one deal fo no fight da Egypt king. He goin give one Syria wahine fo da Egypt king marry. He do dis cuz he stay plan fo use her, fo wipe out da Egypt land. But da deal da Syria king stay make no goin work, an da plan no goin help him.

¹⁸Lata, da Syria king goin start fo attack da peopos dat live by da ocean an on top da islands. He goin make plenny a dem prisonas. But goin get one army leada guy from one odda place dat goin make da Syria king change his plan, no matta he no mo respeck fo nobody. Cuz a dat, da Syria king goin come da guy dat nobody get respeck fo!

¹⁹So afta dis, da Syria king goin back to da strong walls inside his own land. But bumbye he goin come weak, so dat nobody goin worry bout him an no goin see um again no moa.

²⁰“Da king guy dat goin take ova afta him goin send one guy all ova his land fo colleck tax fo make him still look good. He goin make real hard time fo da peopo. Cuz a dat, nobody goin get respeck fo da king, an afta two-three year, he goin lose powa. Da peopo goin kick um out, but not cuz dey huhu, o cuz dey fight him.

²¹“Den, goin get one guy dat erybody know he no good. No mo nobody give him respeck, jalike he get da right fo be king fo real kine. But still yet, he goin take ova an come king. Wen erybody tink eryting stay okay fo dem, dis guy goin attack Syria. He goin bulai da peopo wit plenny nice kine promise, den he goin grab dem an take ova.

²²Den he goin wipe out one real big army, an take da powa from da pries guy dat stay in charge a da deal God wen make wit his peopo.

²³He goin make all kine promise to da peopo fo help dem, an dey goin make promise fo help him. But afta he do dat, he goin bulai dem. Az how he goin come mo an mo strong wit ony litto bit peopo fo help him.

²⁴Wen erybody tink eryting stay good, dis guy goin take ova da places inside da districk wea da bestes kine food grow. He goin take ova lands wat his fadda an ancesta guys neva do. He goin take all kine stuffs from ova dea, an give his friends all da rich kine stuffs dat he take away from da odda peopos. He goin make plan fo take ova plenny big towns wit strong walls, an he goin do um one by one.

²⁵“Wit one big army, dis Syria king nort side goin make his army strong an ready fo fight. Den he goin fight da Egypt king sout side. So da Egypt king goin make war wit his big strong army. But cuz da Syria king make sneaky plan agains da sout side, da Egypt king no goin win.

²⁶Da palace guys dat eat da fancy kine food da Egypt king give um, dey goin try fo wipe out da Egypt king. An da Syria army guys goin push his army guys back, jalike one flood. Plenny guys goin mahke wen dey make war.

²⁷Den da two king guys goin sit down by da same table an eat togedda. But inside dem, dey stay plan fo do bad kine stuff to each odda. Dey goin bulai each odda. But dea plans no goin come out good fo dem, cuz [ony God know da right time fo eryting happen / still yet all dis goin pau ony wen God say time fo pau].

²⁸Wen da Syria king start fo go back his own land, nort side, he goin bring back rich kine stuffs he wen take from Egypt side. But he make up his mind fo mess up da spesho deal God wen make wit his Jewish peopo. He goin do wat he like agains God's deal, an den go back his own land.

²⁹“Da time come wen God say, da Syria king goin go agains da sout again, but dis time, goin come out diffren den befo.

³⁰Da navy boats guys from da west side goin go agains him. An cuz a dat, da Syria king no goin like fight no moa, an go back home. He goin talk real stink agains God's spesho deal, an do any kine agains God. Wen he stay go home, he goin make nice an lissen to da peopo dat no like God's spesho deal.

³¹“Army guys from da Syria king goin go inside da strong walls aroun da Temple Fo Yahweh. Dey no goin let da pries guys make sacrifices dey suppose to make ery day. Den dey goin put up one pilau idol kine statue inside da place dat stay spesho fo Yahweh, so nobody can pray to Yahweh dea no moa.

³²Da Syria king goin make nice to da peopo dat awready wen go agains God's deal, fo make dem come his side, an make um pilau inside. But da peopo dat know God fo real kine goin come strong an hang in dea, an dey goin fight.

³³“Da leada guys dat undastan wass happening, dey goin teach plenny peopo fo help dem undastan too. But goin get one time, dey goin get plenny problem, cuz da Syria guys goin kill dose leada guys wit swords, o wit fire. Dey goin catch da leadas an throw um in jail, an goin take all dea stuffs.

³⁴Wen all dis stuff happen to da Jewish leada guys, goin get peopo dat help dem litto bit. Plenny odda peopo goin go wit dem an make promise fo help, but dey no goin do notting.

³⁵Some a da leada guys dat undastan how come all dis stay happen, dey goin suffa. Az goin be jalike one test fo da peopo, fo make um come clean inside, an no mo notting bad goin stay wit dem. Goin stay lidis all da way to jus da right time.”

³⁶“Da Syria king goin do anyting he like. He goin ack jalike he mo big den all da gods. He goin talk mo stink den da peopo eva hear befo, agains da God Dass Mo Importan Den All Da Odda Gods. An eryting goin go good fo him, till da time wen God no pau stay huhu. Cuz wat God say gotta happen, goin happen fo shua.

³⁷Da king no goin show respeck fo da gods his ancesta guys wen pray to, o fo da god da wahines like. He no mo respeck fo all da gods. Az cuz he tink he mo big den all da gods.

³⁸Mo den dat, he goin show respeck fo da god fo da strong walls, one god his ancesta guys neva know. He goin show respeck fo dis god wit gold an silva, an da kine jewel stones dat cos plenny, an odda rich kine presents.

³⁹He goin attack da towns dat get da mos strong walls, an one god from odda place goin help him. He goin show plenny respeck fo da peopo dat say he da numba one guy. He goin put um in charge a plenny peopo. He goin give dem guys land if dey pay him.

⁴⁰“Wen da time pau, da Egypt king sout side goin try fo push back da Syria king nort side. But da Syria king guys goin hit da Egypt king guys jalike one big hurricane, wit war wagons, an horse rida guys, an plenny boats. Dey goin attack plenny diffren lands, an go thru dem jalike one big flood.

⁴¹He goin attack da Nice Looking Land too. He goin make plenny trouble in plenny lands an kill dea peopo, but Edom, Moab, an da leada guys inside Ammon, dey no goin come unda his powa.

⁴²He goin take ova plenny land. Da Egypt peopo goin run away from him.

⁴³He goin take ova da gold, da silva, an all da rich kine stuffs dat da Egypt peopo wen hide. Da Libya peopo an da Sudan peopo goin come unda him too.

⁴⁴But he goin hear stuff from da east an da north, an dat goin make him come real scared. So he goin go dea real huhu, an go out fo wipe out plenny peopo.

⁴⁵He goin put up his king kine tents wit da Mediterranean Sea makai side, an da nice looking mountain dat stay spesho fo God, mauka side. But den, he goin mahke, an no goin get nobody dea fo help him.