Read Hawaii Pidgin Daniel 2 Bible Online

Daniel 2 - Hawaii Pidgin bible

Daniel 2

¹Da year numba two wen Nebukadnezzar stay king Babylon side, he dream someting, but he no can rememba wat he wen dream. Da dream bodda him, an he no can sleep good.

²So da king tell his helpa guys fo call da kahuna guys dat know how fo tell wat da dream mean, an da ones dat know how fo stop da bad kine stuff dat happen to you wen somebody put kahuna on top you, an oddas dat know how fo put kahuna on you, an da Chaldea guys dat know how fo learn stuff from da stars, fo come by him. Dey suppose to know wat he wen dream. So dey come stand in front him.

³Da king tell dem, “I wen dream someting. Dis bodda me real plenny, cuz I donno wat I wen dream.”

⁴Da kahuna guys tell da king in Aramaic, “You da King, an we like you live foeva! We yoa worka guys. Tell us da dream, an we goin tell you wat da dream mean.”

⁵Da king tell da kahuna guys, “I tell you guys dis fo shua. If you guys no can tell me wat I wen dream, an wat da dream mean, I goin tell my odda worka guys fo cut off yoa arms an legs, an make yoa house come one big rubbish pile.

⁶But if you guys can tell me wat I wen dream, an wat da dream mean , I goin give you guys plenny stuffs, an show you guys plenny respeck in front da peopo. So, tell me da dream, an wat da dream mean.”

⁷Da kahuna guys tell one mo time, “You da king! Tell us guys da dream. Den we goin tell you wat da dream mean.”

⁸But da king tell um, “Fo shua, I know dat you guys trying fo make slow fo get mo time, cuz you know dat I no change wat I wen tell.

⁹If you guys no tell me wat I wen dream, I goin punish all you guys da same way! You guys wen make plan wit each odda, fo bulai me bout dis dream, an trick me, cuz you tink dat bumbye I goin change my mind. So now, you guys gotta tell me wat I wen dream! Den fo shua I goin know dat you guys can tell me wat da dream mean too .”

¹⁰Da Chaldea guys dat know how fo learn stuff from da stars tell da king, “No mo nobody all ova da world dat can tell you wat you like know. No mo no king, no matta dey big o so strong, eva wen make his guys tell wat he wen dream befo, not even to his guys dat know wat da dreams mean, o dat can stop bad kine stuff dat can happen wen somebody put kahuna on top you, o dat learn stuff from da stars.

¹¹Wat you, oua King, stay aks us fo do, too hard! No mo nobody can tell you wat you like know. Ony da gods can do dis, an dey no live wit da peopo.”

¹²Dat wen make da king come real huhu, wat da smart guys tell him. So he tell his helpa guys fo kill all da smart ones inside Babylon.

¹³So da King tell his guys wat fo do. Dey make ready fo go kill all da smart guys inside Babylon. Da Babylon guys wen go look fo Daniel an his friends, fo kill um too!

¹⁴But den, Daniel go talk wit Aryok. He da main leada fo da king's bodyguards, da ones dat kill da prisonas dat da king like kill. He stay ready fo go out, fo kill all da smart guys inside Babylon, wen Daniel talk to him. Daniel know how fo help peopo tink, an he pick da bestes way fo talk to Aryok.

¹⁵He tell Aryok, “Sir, you da one work fo da King. How come dis bad ting you goin do to da smart guys, come from da King?” So Aryok tell Daniel wat wen happen.

¹⁶Wen Daniel hear dis, he go inside wea da king stay. Daniel tell da king fo wait, so dat he can tell da king wat da dream mean. An da king say okay.

¹⁷Den Daniel go home his house. He tell his friends Hananiah, Mishael, an Azariah wat wen happen.

¹⁸Daniel aks dem fo pray to God Inside Da Sky fo give dem chance an show dem da secret a da dream, so dat him an his friends no get wipe out wit da odda smart guys inside Babylon.

¹⁹Dat nite, Daniel wen see someting jalike one dream, an God wen show him da secret. Den Daniel tell God Inside Da Sky mahalo plenny, cuz he do good tings fo him.

²⁰Daniel tell, “I goin talk good bout God foeva! He know wat fo do erytime, An he get powa!

²¹He change wass goin happen, Now an bumbye. He make some kings come solid, An throw out some odda kings. Da guys dat know wat fo do erytime, He make um know even mo betta wat fo do. Fo da guys dat undastan stuff, He make um know even mo plenny.

²²He show um secret kine stuff Dass hard fo undastan. He know wat stay inside da dark places, Cuz he da One da light come from.

²³You da God fo me an my ancesta guys. I like tell you ‘Mahalo plenny,’ An tell good tings bout you. Cuz you help me know wat fo do erytime, An you give me powa. Wen we aks you fo tell us wat da king wen dream, You tell us guys bout wat he wen dream.

²⁴Den Daniel go by Aryok. He da guy da king wen give da job fo kill all da smart guys inside Babylon. Daniel tell Aryok, “No kill da smart guys inside Babylon! Take me by da king, an I goin tell him wat his dream mean.”

²⁵Right den an dea Aryok take Daniel by da king an tell, “King, I find one guy from da peopo you wen bring hea from Judah. He can tell you wat yoa dream mean.”

²⁶Da king aks Daniel, dat get da Babylon name Belteshazzar, “You shua you can tell me wat I wen see inside my dream, an tell me wat da dream mean, o wat?!”

²⁷Daniel tell, “No mo nobody can tell you dis ting you stay aks bout. Not even da smart guys, an da kahuna guys dat know how fo stop da bad kine stuff dat can happen to you wen somebody put kahuna on top you, o dat know how fo tell wat one dream mean, o dat look at da animal guts wen dey kill um fo make sacrifice, so dey can find out wass goin happen bumbye.

²⁸But, get one God inside da sky dat let peopo know da secret tings. He wen let you know awready, King Nebukadnezzar, an wat goin happen bumbye. Now, I goin tell you wat you wen dream, an tell all da pichas dat you wen see in yoa head wen you lay on top yoa bed.

²⁹“You, my King, wen you stay lay dea, you start fo tink bout wat goin happen bumbye. But God, he da one dat stay let peopo know da kine stuff dat stay secret. An he wen show you wat goin happen.

³⁰An was to me, dat God wen show da secret awready, fo wat da dream mean. He no do dis cuz I mo smart den any odda guy dat stay alive. He do dis so you, da king, know wat da dream mean. Den you can undastan wat you wen see inside yoa head.

³¹“You, my King, wen see someting inside yoa dream. You see right in front you, one big statue! Da bugga real big, shiny, an look real scary.

³²Da head, was all gold. Da chest an arms, silva. Da opu part an da thighs, bronze.

³³Da odda part a da legs, iron. Da feets, get one part iron an da odda part clay dat dey bake inside da oven.

³⁴“Wen you stay look da statue, one real big rock wen broke off from one mountain. But no mo nobody wen make um broke off! Da rock fall down, hit da statue on top da iron an clay feets, an smash um up, small pieces.

³⁵Den, da iron, da clay, da bronze, da silva, an da gold wen broke same time, all small pieces, jalike da junk kine stuff dat fall down on top da groun wea dey split da wheat from da junk kine stuff summer time. An da wind blow um all away, so no mo notting dea. But da rock dat wen smash da statue, come one big mountain, an fill up da whole world.”

³⁶Daniel tell da king: “Dass wat you wen dream. Now, I can tell you wat da dream mean.

³⁷King Nebukadnezzar, you da king ova all da odda kings. God Inside Da Sky, he da One wen make you king, an give you da powa, an make you strong, an make erybody get respeck fo you.

³⁸He wen give you powa ova all da peopo, an da animals inside da fields, an da birds inside da sky. Wea eva dey stay, he make you da boss ova all dem. You jalike da gold head on top da statue.

³⁹“Afta you, anodda kine govmen goin come, not awesome like yoas. Afta dat, anodda kine govmen, numba three, goin come. Dey da bronze part a da statue. Dey goin get powa ova da whole world too.

⁴⁰Den, da numba four kine govmen goin come. Dey goin be strong jalike da iron, cuz iron can broke eryting an make um come small pieces. An jalike da iron, dese govmen guys goin smash all da odda govmens dat come befo dem.

⁴¹You wen see dat da feets an da toes was part clay dey wen bake, an part iron. Dat mean, da peopo dat stay unda da numba four kine govmen, dey no goin stay togedda. But still yet, dey goin be strong, jalike da iron dat stay mix wit da clay.

⁴²Jalike da toes stay one part iron an one part clay, so dis govmen goin be litto bit strong, an da odda part easy fo broke.

⁴³Da diffren peopos goin marry each odda, all mix up togedda, but dey no goin stick togedda real good. Az jalike you wen see dat da iron mix wit da clay stay togedda, but diffren.

⁴⁴“Da time numba four kine govmen get powa, God Inside Da Sky goin set up one nodda kine govmen. Dat govmen, no goin be wipe out eva, an odda peopo no goin get um. Dey goin smash all da odda kine govmens, so dey no mo powa. An dat govmen, goin stay solid foeva.

⁴⁵Dass wat da big rock you wen see mean. But nobody wen broke dat rock outa da mountain -- da rock dat broke da iron, da bronze, da clay, da silva, an da gold, in small piece. “Da mos importan God wen let you, da king, know wat goin happen bumbye. Da dream stay true, an you can trus wat I tell you about da dream.”

⁴⁶Den King Nebukadnezzar go down wit his face on top da groun in front Daniel, an show him respeck. He tell his guys fo give wheat an barley an incense to Daniel, so Daniel can make sacrifice to God.

⁴⁷Da king tell Daniel, “Fo shua yoa God stay da God ova all da odda gods, an da Boss ova us king guys. He da One dat show wat tings mean dat stay secret, cuz you wen tell wat dis dream mean.”

⁴⁸Den da king wen make Daniel one real importan guy, an give him plenny present. He make Daniel da main leada guy ova all da Babylon districk, an put him in charge a all da smart guys Babylon side.

⁴⁹Daniel aks da king fo make Shadrak, Meshak, an Abednego, come wit him, fo help him take care da Babylon districk. An Daniel stay nea da king.