Read Hawaii Pidgin Daniel 4 Bible Online

Daniel 4 - Hawaii Pidgin bible

Daniel 4

¹“Dis me, Nebukadnezzar da King. I write dis letta to all you diffren peopos from ery country an ery language, dat stay live all ova da world. I like eryting come mo an mo good fo you guys.

²“I like tell you guys bout da God Dass Mo Importan Den All Da Odda Gods, an da awesome an unreal tings he wen do fo me. I tink az good fo me tell you guys bout all da stuff he wen teach me.

³“Real awesome, all da kine stuff he do! Da kine stuff he show me, I know he get powa! He stay da king foeva! He get da right fo stay in charge Ova all da peopo dat live today An ova all da peopo dat goin come bumbye.

⁴“Me, Nebukadnezzar, I ony stay inside my house, taking it easy. Inside my palace, eryting was going good fo me.

⁵But den one nite, wen I stay lay down on top my bed, I wen get one dream an wen make me come scared. Da picha in my head I wen see, scare me plenny!

⁶“So I wen tell my guys fo bring in front me, all da smart guys inside Babylon, fo come tell me wat da dream mean.

⁷Den dey all come -- da kahuna guys dat know how fo tell wat one dream mean, an da guys dat know how fo stop da bad kine stuff dat happen to you wen somebody put kahuna on top you, an da Chaldea guys dat know how fo learn stuff from da stars, an da guys dat look at da animal guts wen dey kill um fo make sacrifice so can find out wass goin happen bumbye. I tell dem bout my dream, but no mo nobody can tell me wat da dream mean.

⁸“Afta all dese guys wen come, Daniel come by me. I tell him bout my dream. (He get da name Belteshazzar too, jalike da name fo my god. An da spirit from da spesho gods stay inside him.)

⁹“I tell um, ‘Belteshazzar, you stay in charge a da kahuna guys dat know bout da dreams. I know dat da spirit from da spesho gods stay inside you. An you know how fo find out da secrets nobody know. Da stuff I wen see in my dream, tell me wat da dream mean.

¹⁰Dis wat I wen see wen I stay sleep on top my bed. I stay look aroun, An in front me get one tree, An da tree stand Inside da middo a da world. An da tree stay real big.

¹¹Da tree stay grow mo big an strong still yet, An da top reach da sky. All da peopo can see um From da mos far place inside da world.

¹²Da leaf look real nice an get plenny fruit, Get food nuff fo erybody an eryting in da world. Da wild animals from da boonies Come unda um fo shade. Da birds from da sky Live inside da branches. Eryting dat stay alive Get dea food from um.

¹³“Wen I stay sleeping on top my bed, I see some mo pichas inside my head: I look, an in front me, get one angel watcha guy Dat stay spesho fo God. He coming down from da sky.

¹⁴Da angel guy yell wit one loud voice, ‘Cut down da tree! Chop off da branches! Pull off da leafs! Make da fruits go all ova da place! Let da animals run away from unda da tree! Make da birds fly off da branches!

¹⁵But let da stump an da roots Stay dea inside da groun! Put heavy iron an bronze strap fo tie down da stump, An let um stay inside da grass inside da field. “‘Get one guy, let um get all wet Wit da dew from da sky. Let da same ting happen to him, Jalike how da animals Dat stay live in da grass on top da groun.

¹⁶Make him, So he no can tink like anybody! Let him tink jalike one animal, Fo seven year.

¹⁷“‘Us angel watcha guys tell Wat God make up his mind fo do. We stay spesho fo God, An we tell wat goin happen. Cuz we do dat, Erybody dat stay alive goin know dis: Da God Dass Mo Importan Den All Da Odda Gods, He get da powa fo tell All da govments in da world Wat dey gotta do. He make whoeva he like Come da king fo dem. He even can take one guy Dat nobody tink he importan, An make him da govmen leada.’

¹⁸“Dis da dream dat me, Nebukadnezzar da King, wen dream. Now, Belteshazzar, tell me wat da dream mean. Cuz no mo nobody from da smart guys inside my country can tell me wat da dream mean. But fo shua you can, cuz da spirit from da spesho gods stay inside you.

¹⁹“Dis wen throw Daniel off (his Babylon name Belteshazzar), an he no can tink, an come real bum out. So me, Nebukadnezzar, I tell, ‘Belteshazzar, no let da dream o wat da dream mean, make you scared.’ “Belteshazzar tell, ‘Boss, I like if da dream ony tell bout da peopo dat hate you, an if da dream ony talk bout da peopo dat stay agains you. But az not how goin be. Da dream, bout you!

²⁰Da tree you wen see, dat stay grow mo big an strong, till da top reach da sky. An all da peopo in da world can see um.

²¹Get real nice leaf an plenny fruits on top, an da tree give food fo erybody. Give shade fo all da animals inside da field, an get branches fo da birds inside da sky make nest.

²²Dat tree, az jalike one picha a you, King Nebukadnezzar! You wen come big an strong. You come mo an mo importan, so now you real big, jalike you stay reach da sky. You get da right fo be da king fo da whole world!

²³“‘King Nebukadnezzar, you wen see one angel watcha guy dat stay spesho fo God, come down from da sky. He tell, “Cut down da tree an broke um up! Leave da stump an da roots inside da groun. Tie um wit iron an bronze strap on top da stump, an let um stay dea inside da grass inside da field. Let him come wet wit da dew from da sky. Let him live jalike da wild animals, till seven year pass!’

²⁴“An den Daniel tell me, ‘King Nebukadnezzar, dass wat da dream mean. Dass wat da God Dass Mo Importan Den All Da Odda Gods, tell gotta happen, an he talking bout you, my boss da king.

²⁵Da peopo goin make you go way from dem an go stay wit da wild animals. You goin eat grass jalike da cows, an come wet wit da dew from da sky. Afta seven year, you goin know dat da God Dass Mo Importan Den All Da Odda Gods, get da powa fo tell all da govments in da world wat dey gotta do. God can give whoeva he like come da king fo dem.

²⁶Inside yoa dream, somebody wen tell fo leave da stump an da roots a da tree, inside da groun. Dat mean fo shua, da Mos Importan God goin let you come da king one mo time, afta you come shua dat da God In Da Sky stay in charge.

²⁷King Nebukadnezzar, az why I like you lissen an do wat I tell you now: Throw out all da bad kine stuff you wen do awready, an do wat stay right. Throw out all da tings you wen do fo go agains God, an make good to da peopo dat suffa plenny. Den maybe you can stay king long time.’-”

²⁸All dis kine stuff wen happen to King Nebukadnezzar.

²⁹Twelve month afta dat, da king stay walking aroun on top da flat roof on top his palace, inside Babylon town.

³⁰He tinking, “Dis town, Babylon, stay big now! Az cuz I wen build um lidat, fo come my house, da king! I do um cuz I stay real strong, an peopo goin know I awesome an importan!”

³¹He stay talk still yet, an right den an dea, one voice come down from da sky! Da voice tell, “Dis message fo you, King Nebukadnezzar! I take away da powa fo you be king.

³²Da peopo goin make you go way from dem an make you stay wit da wild animals. You goin eat grass jalike da cows. Afta seven year pass, you goin know dat da God Dass Mo Importan Den All Da Odda Gods get da right, fo tell all da govments in da world wat dey gotta do. He can make whoeva he like come king fo dem.”

³³Right den an dea wat Daniel wen tell bout King Nebukadnezzar wen happen! Da peopo wen make him go way from dem, an he eat grass jalike da cows. His body come wet wit da dew from da sky. Bumbye his hair grow long, jalike da feathers from da eagle, an his finganails come long jalike da feet fo da birds.

³⁴“Afta da seven year, me, Nebukadnezzar da King, wen look up to da One inside da sky. Den I start fo tink again. Den I tell bout da God Dass Mo Importan Den All Da Odda Gods How he do good tings fo me! I tell good tings bout da One Dat Stay Live Foeva, An I tell dat he stay awesome, An he goin stay king foeva! He get da right fo stay in charge Ova all da peopo dat live today An ova all da peopo dat goin come bumbye.

³⁵All da peopo inside da world, God see um, jalike dey notting. He do wateva he like Wit da armies from inside da sky, An da peopo inside da world. No mo nobody can hold him back O aks him how come he do dat.

³⁶“Dat same time dat I wen start fo tink good again, da peopo show me plenny respeck cuz I da king. Dey show me dat I stay importan fo dem, an I come awesome again. Da smart guys dat wen teach me wat fo do, an my ali`i guys wen go all out fo come by me. An I wen come king again. I get even mo plenny powa den befo time.

³⁷Now me, Nebukadnezzar da King, I talk good bout da King Inside Da Sky, an tell dat he awesome. Eryting he do stay right. Anybody live his way, dey goin do da right ting too. An he can make da guys dat ack like dey big head guys, come notting.”