Read Hawaii Pidgin Daniel 5 Bible Online

Daniel 5 - Hawaii Pidgin bible

Daniel 5

¹Long time afta, Belshazzar come king. One time, he make one big party fo one tousand a his ali`i guys, an he drink wine togedda wit dem.

²Wen Belshazzar stay drinking his wine, he tell his guys fo bring in da fancy gold an silva cups an bowls dat his ancesta guy Nebukadnezzar wen take from da Jerusalem temple, so dat him an da ali`i guys, his real wifes, an his odda wifes, can drink from um.

³So dey bring in da fancy kine gold cups dat dey wen go get from da Temple Fo God inside Jerusalem. Da king, da ali`i guys, his wifes, an his odda wifes drink from um.

⁴Wen dey stay drink da wine from da cups, dey stay talk good bout dea idol kine gods, dat dey wen make from gold, silva, bronze, iron, wood, an stone.

⁵Right den an dea dey see da finga a one hand come by dem! Da hand write on top da plaster part a da wall inside da king's palace, wea get plenny light from da stand fo da lamp. Da king watch da hand write on da wall.

⁶His eyes come real big, an he come real scared. His knee stay knock togedda, an he come real weak an he stay shaking an he no can tink good.

⁷Da king yell real loud fo his guys bring da kahuna guys dat know how fo stop da bad kine stuff dat happen wen somebody put kahuna on top you, da kahunas dat know how fo tell stuff from da stars, an da kahuna guys dat look at da animal guts wen dey kill um fo make sacrifice, so dey can figga wass goin happen bumbye. Wen all dose smart guys from Babylon come, he tell um: “Whoeva read dis writing an tell me wat dis mean, I goin put purple kine king kine clotheses dat cost plenny on top him, an one gold chain aroun his neck. He goin come da numba three leada fo da Babylon peopo.”

⁸Den all da king's smart guys come inside look, but dey no can read da writing o tell da king wat stay mean.

⁹So King Belshazzar come even mo scared, an his eyes come mo big. Da ali`i guys no can tink.

¹⁰Da king mudda hear da noise from da king an da ali`i guys. She go inside da place wea dey get da party. She tell, “King Belshazzar, I like you stay alive foeva! No worry! No need yoa eye come big!

¹¹Get one guy inside dis land dat get da spirit from da good an spesho gods inside him. Wen yoa fadda stay king, peopo find out dat dis guy can see stuff real clear, an undastan plenny, an know wat fo do erytime, jalike da gods. King Nebukadnezzar, yoa fadda, make dat guy da main leada fo da kahuna guys dat know how fo tell wat da dreams mean, an da kahuna guys dat know how fo stop da bad kine stuff dat happen wen somebody put kahuna on top you, da kahunas dat know how fo tell stuff from da stars, an da kahuna guys dat look at da animal guts wen dey kill um fo make sacrifice, so dey can find out wass goin happen bumbye.

¹²Dis guy Daniel, dat yoa fadda wen name Belteshazzar, peopo find out dat he get real strong powa fo figga out stuff. He undastan any kine stuff. He can figga out wat dreams mean, an answa hard kine question, an figga out hard kine stuff. Tell Daniel fo come, an he can tell you wat dis writing mean.”

¹³So dey bring Daniel in front da king. An da king aks him, “You da guy Daniel, one a da guys my fadda da king wen bring from Judah?

¹⁴Wat I hear bout you, da spirit from da gods stay strong inside you, an peopo know dat you see stuff real good, an undastan plenny, an know wat fo do erytime, mo den odda peopo.

¹⁵My guys wen bring dese smart guys an kahuna guys in front me fo read dis writing an tell me wat da words mean, but dey no can tell me.

¹⁶I hear dat you can tell wat tings mean, an figga out hard kine stuff. So, go read da writing, an tell me wat dat mean. Wen you do dat, I goin put purple king kine clotheses dat cost plenny on top you, an put one gold chain aroun yoa neck. You goin come da numba three leada fo da Babylon peopo.”

¹⁷Daniel tell da king, “You keep dis stuff fo yoaself an give wateva you like pay me to odda guys. But yeah, I goin read da writing fo you an tell you wat dat mean.

¹⁸“King Belshazzar, lissen! Da God Dass Mo Importan Den All Da Odda Gods, he wen make yoa fadda Nebukadnezzar come king. He make him come mo importan, an make peopo get respeck fo him, an make him awesome.

¹⁹Cuz God make him mo importan, all da diffren peopos from ery country an ery language come real scared a him. Wen da king like somebody fo die, he kill um. Wen he like keep somebody alive, he keep um alive. Wen he like make somebody come mo importan, he make um mo importan. Wen he like make somebody come not importan, he make dem come not importan.

²⁰“But den, King Nebukadnezzar start fo get big head, an inside, he come hard head an tink he can make how he like. Az why God throw him out fo be da king, an da peopo no show respeck fo him no moa.

²¹Da peopo no let him stay wit dem no moa. He get da head fo tink jalike one animal. He live wit da wild donkeys, an eat grass jalike da cows. His body come wet wit da dew from da sky. Afta dat, he find out dat da God Dass Mo Importan Den All Da Odda Gods get da powa fo stay in charge a all da peopo dat come king inside da world, an he make whoeva he like come king.

²²“King Belshazzar, you come from Nebukadnezzar, so I know you know all dis. But you, you neva even tink dat get somebody mo important den you.

²³You go ack jalike you mo importan den da God dat stay king inside da sky. You wen tell yoa guys fo go bring da fancy kine cups an bowls from da Temple fo dat God. Den you, yoa ali`i guys, yoa real wifes, an yoa odda wifes drink wine from um. An you talk good bout da silva, gold, bronze, iron, wood, an stone gods -- no matta dey no can see, hear, o undastan notting. But you neva tell notting bout how awesome da God dat get da powa fo make you stay alive o fo kill you! He da one stay in charge a eryting you do!

²⁴Az why he wen send da hand wit da fingas dat write on top da wall.

²⁵“An dis wat he write: Mene, Mene, Tekel, an Parsin.

²⁶“Dis wat mean: ‘Mene,’ mean dat God count how much time you stay da king, an he tell, you pau awready.

²⁷“‘Tekel,’ mean dat jalike God weigh you on one weight scale an find out you no weigh nuff.

²⁸“An ‘Parsin,’ mean dat God half half da land wea you stay king, an give um to da Mede peopo an da Persia peopo.”

²⁹Den King Belshazzar tell his guys fo put da purple king kine clotheses dat cost plenny on top Daniel, an fo put one gold chain aroun his neck. An he let erybody know, dat Daniel now da numba three main guy ova da land wea Belshazzar stay king.

³⁰But dat same nite, da Mede army guys wen kill Belshazzar, da king fo da Babylon peopo.

³¹Darius da Mede guy wen take ova Babylon an come king. He sixty-two year ol, dat time.