Read Hawaii Pidgin Daniel 9 Bible Online

Daniel 9 - Hawaii Pidgin bible

Daniel 9

¹Darius, Xerxes boy from da Mede peopo, come da king fo da Babylon land.

²Da firs year he stay king, me, Daniel, I stay study my books bout God dat year. I try fo figga out wat Yahweh mean, wen he tell Jeremiah, da guy dat talk fo him, dat afta Jerusalem come bus up an erybody bag, Jerusalem goin stay all bus up fo seventy year.

³So I no eat so I can pray, an put on burmbag kine clotheses an put ash on top my head, cuz I stay real sore inside. I tink ony bout God, my Boss, an I pray. I beg him fo help me.

⁴I tell my God Yahweh, I know oua peopo wen do wass wrong. Dis how I pray: “Bummas, Boss, you da big God! You scary! Wen you make one deal, you do eryting you wen say you goin do. You stay tight wit da peopo dat get love an aloha fo you an dey lissen wat you tell um fo do.

⁵But us guys wen go buckaloose an do bad kine tings. Us guys do wass wrong. Us guys do da kine stuff we not suppose to do. Us guys go agains you Yahweh, an make deaf ear fo wat you tell us fo do, an from da rules you make dat show us wass right an wass wrong, cuz you da Judge.

⁶We neva lissen da guys dat work fo you an talk fo you. Dey talk fo you cuz dey know wat kine God you. Dey wen talk to oua king guys, oua leada guys, an oua ancesta guys, an all da odda peopo inside da land.

⁷“Boss, you do da right ting erytime. But today, even mo den befo time, us guys get plenny shame an lose face cuz a wat us wen do. Us peopo from Judah, an Jerusalem, an all ova Israel, no matta we stay near o far, inside all da odda lands wea you wen make us go, broke yoa rules an no stay tight wit you.

⁸Yahweh, us an oua king guys, oua leada guys, an oua ancesta guys get plenny shame, cuz we wen do bad kine stuff agains you.

⁹God, you da Boss. You da One show pity an let us go, no matta us wen go agains you.

¹⁰Us neva lissen you, oua God Yahweh, fo live da way you wen teach us, da way yoa worka guys dat talk fo you wen tell us.

¹¹All da Israel peopo wen make deaf ear fo da rules you wen teach, an go da odda way from you, an tell dat dey no goin lissen you. “Az why, jalike you wen drop on top us guys, all da bad tings dat Moses yoa worka guy wen write down inside da rules. You wen make promise dat dese bad tings goin happen if us guys no do da tings we wen make deal fo do. All dat bad stuff stay happen to us, cuz we do bad kine stuff agains you.

¹²You make happen da stuff you wen tell fo punish us an oua govmen guys, wen you drop all dis bad kine stuff on top us. All ova da world, no mo nobody eva do notting lidis befo, jalike you wen do to Jerusalem.

¹³Jalike Moses wen write inside da rules, all dis bad kine stuff wen happen to us guys. But still yet we no come back to you, oua God Yahweh, an stop fo do da bad kine stuff we stay do. An we no tink bout how eryting you tell, stay true.

¹⁴You, oua God Yahweh, you no wait fo drop da bad kine stuff on top us, cuz you do da right ting erytime. But still yet we no lissen you.

¹⁵Da way I tink, you oua Boss an oua God! You wen bring yoa peopo outa Egypt wit yoa strong powa. You wen do dat fo let erybody know from dat time till now, wat kine God you. But us guy do bad kine tings. We no do how we suppose to do.

¹⁶Boss, you do eryting right. So I aks you fo pau stay huhu agains us guys, an no stay mad no moa. We come from Jerusalem, yoa big town, da hill dat stay spesho fo you. All da peopo aroun us stay laugh at us an poin finga us cuz a all da bad kine stuff we stay do, an da bad kine stuff oua ancesta guys wen do.

¹⁷“But God, I yoa worka guy, an I stay pray to you an aks you fo lissen me. Cuz a who you, Boss, try smile an do good kine stuff fo yoa spesho temple, dat stay all bus up, an fo da peopo wen bag from dea.

¹⁸God, try lissen. An try open yoa eyes an look how us stay all bus up! Try look yoa bus up big town, Jerusalem, dat carry yoa name! Cuz us stay pray an aks you fo do dis. Az not cuz us guys do da right kine stuff, but cuz you give plenny chance !

¹⁹Boss, try lissen! Boss, hemo oua shame an let us go! Boss, try lissen, an do um! My God, cuz a who you, no wait! Cuz yoa big town an yoa peopo, dey carry yoa name!”

²⁰I stay pray an tell God all da bad kine stuff I wen do, an all da bad kine stuff my Israel peopo wen do. I aks my God Yahweh fo make da hill dat stay spesho fo him okay again.

²¹Befo I pau pray, Gabriel, da angel guy dat look jalike one regula guy dat I wen see in my odda dream da firs time, wen come fly fas fo reach me. Dat happen late aftanoon time, da same time da pries guys stay make sacrifice.

²²He tell me, “Eh Daniel! I come hea fo help you undastan wass happening.

²³Wen you wen start fo pray, God answa you. Az why I come hea fo tell you dis, cuz he tink real good bout you. So, tink bout wat I goin say, an try fo undastan wat you wen see:

²⁴“Seventy times seven year, az da time God wen make fo yoa peopo an fo yoa town dat stay spesho fo God, Fo make da peopo dat go agains God stop, An fo [make da ones doing bad kine stuff stop / pau da bad kine stuff], Fo make sacrifice fo bring da peopo dat do wass wrong da same side wit God, Fo make dem do da right kine stuff foeva, Fo put seal fo show dat wat da talka fo God dream stay fo real, An fo make da Real Real Spesho Place [inside da Temple] come spesho fo God [again / one mo time].

²⁵“Know dis an tink plenny bout um: From da time da message come fo go build Jerusalem town [again / one mo time], till one guy dat God pick come dat goin lead da peopo, goin be seven times seven year, an [den] sixty-two times seven year. Dey goin build Jerusalem town wit [streets / open spaces inside] an one mo strong wall, but goin get [trouble / plenny presha] dat time.

²⁶Afta da [sixty-two times seven year / all dat time], somebody goin [cut off / kill] da one God pick, an he [goin get no mo / no goin get] [notting / nobody wit him / nobody fo take ova afta him]. Da army [dat come wit / fo] da leada dat goin come, dey goin wipe out Jerusalem town an da Temple dat stay spesho fo God. Den da end goin come jalike wen da big watta come. Goin get war till da end, an erybody goin bag an eryting goin get wipe out.

²⁷Da leada dat come, goin make good one solid deal wit plenny peopos fo seven year. But in da middle a da seven year, he goin stop all kine sacrifice. [On top / Inside] one end a da temple he goin put up idol kine gods dat God hate plenny. Wat he goin do so bad, goin mess up eryting, an make erybody jus bag, till da time dat God say goin make him stop.”