Read Hawaii Pidgin Amos 1 Bible Online

Amos 1 - Hawaii Pidgin bible

Amos 1

¹Dis wat Amos wen tell. Amos, he one a da guys from Tekoa dat know how fo breed da sheeps spesho kine. Dat time, Uzziah was king Judah side. Same time, Joash boy Jeroboam was king Israel side. Dat time, Amos wen see someting jalike one dream, bout wat goin happen to da Israel peopo. Was two year befo da big eartquake, you know.

²Dis wat Amos wen tell: “Yahweh Up Dea Inside Da Sky, He make big noise from Zion Mountain! He talk strong from Jerusalem town, jalike thunda! Wen he do dat, da places wea da sheep farmas go fo find grass, No mo grass, notting. An da trees on top Mount Carmel all dry up.”

³You betta lissen! Dis wat Yahweh say: “Too much times awready, da Damascus peopo wen go agains me. Az why, no way I goin let um go an no punish dem! Da buggas wen trash da Gilead peopo Jalike dey wen go drag one heavy board wit plenny spikes ova dea bodies.

⁴Dass why I goin send army guys fo burn da palace Dat dea King Haza`el wen build. Dis fire goin eat up eryting dea, An da Ben-Hadad Fort wit strong walls too.

⁵I goin broke da gate fo Damascus town An wipe out da main guy fo `Aven Valley, Da guy dat stay in charge Bet-Eden side. Da Aram peopo, I goin catch dem An take um all away Kir side.” Dass wat Yahweh say!

⁶You betta lissen! Dis wat Yahweh say: “Too much times awready, da Gaza peopo wen go agains me. Az why, no way I goin let um go an no punish dem! Dey wen catch one whole peopo An sell um to da Edom peopo fo be dea slaves.

⁷Dass why I goin send army guys fo burn da Gaza town wall An burn up da palaces wit strong walls.

⁸I goin wipe out da leada fo Ashdod town An da guy in charge Ashkelon town. I goin go agains da peopo dat live Ekron town. Da odda Filisha guys, dey goin come poho too.” Dass wat Yahweh say!

⁹You betta lissen! Dis wat Yahweh say: “Too much times awready, da Tyre peopo wen go agains me. Az why, no way I goin let um go an no punish dem! Dey wen sell one whole peopo to da Edom peopo, Cuz dey neva like do da right ting fo dea brudda guys.

¹⁰Dass why I goin send army guys Fo burn down da Tyre town wall. Da fire goin eat up da palaces wit strong walls.”

¹¹You betta lissen! Dis wat Yahweh say: “Too much times awready, da Edom peopo wen go agains me. Az why, no way I goin let um go an no punish dem! Dey wen go hunt dea brudda guys, da Israel peopo, Wit sword fo kill. Dey neva like show pity fo da Israel peopo. Dey like stay huhu foeva An no mo cool head, eva.

¹²Dass why I goin send army guys for burn Teman town, An da fire goin eat up da palaces wit strong walls, Bozrah town.”

¹³You betta lissen! Dis wat Yahweh say: “Too much times awready, da Ammon peopo wen go agains me. Az why, no way I goin let um go an no punish dem! Gilead side, dey even wen rip open da hapai wahines Jus so dey can take ova mo plenny land.

¹⁴Dass why I goin make da Rabbah town wall burn An da fire goin eat up all da palaces wit strong walls. Goin get war an yelling An fighting jalike one wild wind storm.

¹⁵Da king fo da Ammon peopo, an his officer guys, I goin take um all away togedda.” Dass wat Yahweh say!