Read Hawaii Pidgin Amos 2 Bible Online

Amos 2 - Hawaii Pidgin bible

Amos 2

¹You betta lissen! Dis wat Yahweh say: “Too much times awready, da Moab peopo wen go agains me. Az why, no way I goin let um go an no punish dem! Dey wen make stink to da king fo da Edom peopo, Cuz dey wen dig up his body an burn his bones Till ony get ashes fo make mortar.

²Dass why I goin dump fire on top da Moab land Fo burn up da palaces wit strong walls, Keriot town. Da Moab peopo goin mahke, Goin get war an yelling an trumpet noise.

³I goin wipe out da guy in charge dea, I goin kill all dea leadas, same time.” Dass wat Yahweh say!

⁴You betta lissen too! Dis wat Yahweh say: “Too much times awready, da Judah peopo wen go agains me. Az why, no way I goin let um go an no punish dem! Cuz I Yahweh, I wen give um da Rules, But dem, dey ack jalike da Rules no matta! Dey no like do wat I wen tell dem. Jalike dea ancesta guys, Dey let da fake gods make um go da wrong way.

⁵Dass why I goin dump fire on top da Judah peopo Fo burn up da palaces wit strong walls, Jerusalem town.”

⁶You betta lissen! Dis wat Yahweh say: “Too much times awready, you Israel peopo wen go agains me. Az why, no way I goin let you guys go an no punish you guys! You Israel peopo tell, ‘Dis guy owe me money.’ Da judge tell, ‘Nah, he no owe notting.’ But no matta wat da judge go tell, Still yet, you Israel peopo go sell da guy Fo silva money, fo make um one slave. Da guy dat no mo notting, You Israel peopo swap um Jus cuz da guy owe you fo one pair new slippas.

⁷Da guy dat not strong, You Israel peopo push his face inside da dirt. Da guys dat get presha, You Israel peopo ack jalike dey no mo rights. Da fadda an his boy, dey go sleep wit da same girl. “Cuz a all dat, peopo talk bad bout me, An I da One dass good an spesho, you know!

⁸“You Israel peopo, you even lay down On top da clotheses dat odda peopo wen leave dea Nex to da alta fo sacrifice, Till da peopo can pay back wat dey owe. Plus, you Israel peopo, You take odda peopo's wine An drink um up yoa own self, Right dea inside da temple fo yoa god.

⁹“Neva mind was me dat wen wipe out da Amor peopo So you Israel peopo can live hea. Da Amor peopo was tall, jalike da cedar tree, Strong, jalike da oak tree. But I wen wipe dem out Jalike I wipe out all dea fruits from da branches An dea roots from undaneat da ground too.

¹⁰But wot! Was me dat wen bring you guys Outa da Egypt land to dis side. Forty years, I wen show you guys wea fo go inside da boonies So you guys can take ova da land from da Amor peopo.

¹¹Was me dat wen make yoa boys come talka guys fo me, Was me dat wen make yoa young guys make promise Fo stick wit da Nazir kine rules. Eh, you Israel peopo! Az true, o wat?” Dass wat Yahweh say.

¹²“But you guys, you wen make da Nazir guys Broke dea rules an drink wine. You wen tell my talka guys, ‘No talk no mo fo God!’

¹³“Kay den! I goin smash you guys Right dea wea you standing, Jalike wen one wagon go huli on top you Cuz get too much heavy stuff inside.

¹⁴Da guy dat can run fas, no matta, Still yet, dey goin catch um. Da guy dat strong, no matta, He no goin do notting. Da army guy no goin stay alive, No matta he know how fo fight.

¹⁵Da guy dat shoot arrow, He no goin stay standing. Da guy dat run fas, He no goin get outa dea. Da guy dat ride horse, He no goin stay alive.

¹⁶Even if get da army guy dass da mostes strong inside, Dat guy goin throw way da stuff he use fo fight, an run way Wen da day come fo all dat fo happen.” Dass wat Yahweh say.