Read Hawaii Pidgin Amos 3 Bible Online

Amos 3 - Hawaii Pidgin bible

Amos 3

¹Eh! Lissen up, you Israel peopo! I talking fo God, cuz Yahweh telling dis to you guys, da whole ohana dat he wen bring hea from Egypt side.

²He say dis: “You guys, you da ony peopo dat I wen pick, From all da ohanas dat get all ova da world! Az why, you da peopo dat I goin punish Fo all da crooked kine stuff you stay do.

³“Tink! Two guys, how dey goin make trip togedda If dey no make plan? No can!

⁴You tink da lion goin make da big noise inside da trees If no mo notting dea dat he can kill? Not even! Da young lion no goin growl inside his house If he neva find notting fo catch.

⁵If no mo nobody wen put da bait, Da bird no goin fall down inside da net! You tink da net goin jump up from da groun If no mo notting dea fo catch? Nah!

⁶If somebody blow da war bugle inside one town, Da peopo dea goin tell, ‘Wass up?! Watch out!’ Weneva bad tings happen inside one town, Was Yahweh dat wen make um happen lidat!”

⁷Cuz you know, my boss Yahweh, he erytime tell his worka guys dat talk fo him da secret plan bout wat he goin do. Lata, he do um.

⁸Wen da lion make big noise, you betta be scared! Wen my boss Yahweh tell you someting, you betta talk fo him!

⁹“Stand up on top da palace roof, Ashdod town, An da palace roof, Egypt land, An talk strong lidis so dat da peopo inside can hear: ‘Eh! Come togedda on top da hills near aroun Samaria town, An check out all da stuff inside dat town dass all jam up, Da way dose guys all ack mean to each odda!’-”

¹⁰You betta lissen! Yahweh, he say dis: “Dem guys, dey donno notting how fo do da right ting! Dey pile up dea palaces wit stuffs dey get From peopo dey wen bus up.”

¹¹Dass why my boss Yahweh say dis too: “Goin get one army dat go agains you guys. Dey goin make circle aroun dis land. Dey no goin let you guys go outside. No matta you guys strong, dey going make you guys come notting. Dey goin steal eryting you get from inside all yoa palace, Dey goin clean you out!”

¹²Yahweh say dis: “Wen da lion grab da sheep, Da sheep farma guy ony bring back litto bit fo show, Maybe two leg bone, o one small piece from da ear. Same ting goin happen wit da Israel ohana! Da ony ting peopo goin bring back from da Samaria guys, Goin be one small piece from da fancy bed da Samaria guys wen buy from Damascus.”

¹³Da God dass in charge a all da armies, my boss Yahweh, dis wat he say: “Lissen up! Tell da peopo dat come from Jacob Dey betta watch out!

¹⁴“Dat time wen I goin punish da Israel peopo Fo try fight agains me, Same time, I goin bus up all da altars Bethel side! I goin wack da horns dat stick out from da altar, Dey goin broke an fall down on top da ground, Den you guys no mo notting fo help you.”

¹⁵I goin wack da house wea dey live winta time An da house wea dey live summa time. Da houses dey build wit plenny ivory inside, goin come poho. All ova da place, no goin get da houses dat get now.” Dass wat Yahweh say.