Read Hawaii Pidgin Amos 5 Bible Online

Amos 5 - Hawaii Pidgin bible

Amos 5

¹Amos say: “So! You peopo from da Israel ohana! Lissen wat I goin tell bout you guys! Dis one funeral song, yeah? Me, Amos, I making um fo you guys. Dis da song:

²‘Da Israel ohana, jalike one young girl. No matta she young, Her wen fall down cuz dey wen kill her. Her no goin stand up one mo time, eva. Dey wen leave her body dea, inside her own country. Cuz no mo nobody goin come fo her.

³‘Cuz dis wat my boss Yahweh say Bout da Israel ohana: “Wen tousan army guys go out fo fight from one town, Ony hundred goin come back. Wen hundred army guys go out fo fight from one nodda town, Ony ten goin come back to dea Israel ohana.” Auwe!’ Dass my song!”

⁴Dis wat Yahweh wen tell da Israel ohana: “Eh! Come back by me an be my guys, So I can help you, yeah? Den you guys goin stay alive an no mahke.

⁵No go by da Bethel peopo fo get help, No go Gilgal side. No go da odda side da country, Beer-Sheba side. You rememba, Gilgal was da first place yoa peopo wen come inside dis land, But now, Gilgal garans goin be da place wea dey goin drag you outa dis land. Da Bethel peopo goin come notting.”

⁶Amos wen tell: “Eh you guys! Go by Yahweh fo get help So den you guys goin stay alive an no mahke. But if you no like, God goin wipe out da Joseph ohana quick, jalike da fire, An burn up Bethel town so fas, nobody can pio da fire.”

⁷“Auwe, fo you guys! You tell peopo Dat eryting da judge say, no good, An bulai peopo so dey no mo dea rights! Jalike you throw um down on top da dirt!”

⁸“God, he da one wen make da stars -- Da Pleiades an Orion stars, He change da real dark time an make um come morning time, He change da day time an make um come dark, nite time. He tell da watta fo come up outa da ocean, Den he pour um out on top da groun. Yahweh, Yahweh, dass his name, cuz dass who him!

⁹He da one dat bus up da strong guys An broke down dea strong walls!”

¹⁰“But you Israel peopo, You hate anybody dat tell da judge Dat you guys do wass not right. Anybody dat talk strait in front da judge, You guys make to dem jalike dey junk.

¹¹Cuz da peopo dat no mo notting, You guys make um pay tax An take away some a da food dat dey cut an clean, Cuz a dat, no matta you guys build house Wit fancy kine cut stone block -- You guys no goin live inside. No matta you guys plant good looking kine grape farm -- You guys no goin drink da wine from dose grapes.

¹²Eh! I know how much stuff you guys do agains me. I know all da diffren ways you guys do bad kine stuff! You guys, you stay agains da peopo dat do da right ting. You guys like get money from bribe, You guys like make presha So da peopo dat need help from da judge, no goin get help!

¹³“Fo shua, weneva tings stay lidat, Da smart peopo dat you guys hate, Dey goin say notting, Cuz eryting stay bad awready.”

¹⁴“Come back an do good kine stuff, not da bad kine, Den you guys goin live. Den Yahweh, da God Fo All Da Armies, Goin stick wit you guys fo real kine. Right now you guys ony tell dat he stick wit you guys, But he not.

¹⁵Go all out fo hate da bad kine stuff An get love fo da good kine stuff. Make shua you pick judges dat goin tell wass right. Den, maybe Yahweh, da God Fo All Da Armies, Bumbye give chance to da litto bit peopo Dat goin stay alive still yet From yoa Israel ohana.”

¹⁶“Cuz a wat you guys wen do, dis wat my God Yahweh say -- he my Boss, da God Fo All Da Armies: ‘Inside ery town, goin hear peopo crying fo you guys. Ery open place, ery street, da peopo saying, “Auwe! Auwe!” Dey even goin tell da farm worka guys Fo go town, da funeral, an cry fo you guys cuz you mahke. Da peopo dat know how fo sing da funeral songs, Dey goin pay um fo yell plenny fo you guys afta you mahke.

¹⁷Cuz wen I go thru da land wea you guys live, I goin punish you guys. Peopo goin cry plenny, Even inside all da grape farms!’ Dass wat Yahweh say.”

¹⁸One nodda time, Amos say dis: “Auwe, fo you guys dat talk lidis: ‘Time awready fo Yahweh show up!’ Wat you guys tink goin happen to you Wen Yahweh come back, aah? Wen he show up, eryting goin come hard fo you guys, not good! Jalike one storm make eryting come dark, no mo light!

¹⁹Fo you guys, goin be jalike dis -- you go run away from da lion, An one nodda kine wild animal goin catch you from da odda side! Den you go inside yoa house, An put yoa hand on top da wall fo rest, An da snake bite you!

²⁰Dat time, wen Yahweh come back, no goin be good fo you! No goin get light! Ony goin get dark, Jalike wen get black nite an no can see notting.”

²¹Yahweh say, “Wen you guys make religious kine stuff, I no take wat you guys doing! Wen you guys stop work Cuz you make like you coming togedda fo me, Make me like bahf!

²²Da kine guys like you guys, If you guys bring animals fo kill um an burn um up fo make sacrifice fo me, If you guys bring wheat fo make present fo show you get respeck fo me, I no like dat, notting. Wen you guys kill da fat cow fo make da sacrifice, Still yet, I no goin take um.

²³Eh, latas, wit da noise from yoa religious kine songs. Dey ony bodda me! Dey ony noise! I no like hear yoa guitar kine music From you guys. Wase time!Vivid.

²⁴Mo betta, wen you judge da right way bout eryting, Dat make da peopo change how dey tink, Jalike wen da big watta come an change eryting. You gotta do da right ting erytime, Jalike one riva dat get watta inside erytime.

²⁵“Rememba: Dat time yoa ancesta guys wen stay inside da boonies, Fo forty year, you Israel guys wen make sacrifice fo me, An bring me presents cuz you like show me love an respeck.

²⁶Dat time, you guys neva carry aroun da idol kine god you call yoa ‘King’, Da one dey call Sikut -- but dass wat you doing now! You neva carry da Kiyyun statue wit you, da star god -- But dass wat you guys doing now. Dem, da idol kine gods you guys pray to, Dat you wen make fo yoa own self.

²⁷Dass why now, I goin throw you guys outa dis land An make you guys go da odda side Damascus. Go ahead! Take da idol kine gods wit you!” Dass wat Yahweh say, da One dat stay da God Fo All Da Armies.