Read Hawaii Pidgin Jonah 2 Bible Online

Jonah 2 - Hawaii Pidgin bible

Jonah 2

¹Wen Jonah stay inside da fish, he wen go pray to his God Yahweh.

²He say: “Wen I get plenny trouble, I yell out to you, Yahweh, fo help me, An you help me. “Wen I was inside da fish opu Was jalike inside da place wea da mahke peopo stay. I yell fo help, An you lissen to me.

³You throw me down inside da real deep place Inside da middo a da sea. Da watta come all aroun me. All da big wave dat you send go ova me.

⁴I stay tinking lidis: ‘God, he wen throw me out, He make me go way wea he no see me.’ I tinking: ‘Fo shua I no goin see one mo time Da Temple dass spesho fo God.’

⁵Da watta wen come ova me an litto bit mo I goin mahke, Da deep watta come all aroun me, Big seaweed wen wrap aroun my head,

⁶I wen go down to wea da mountains stand, on top da ocean bottom. Jalike I go down to da Mahke Peopo Place, Dat get lock fo keep me inside, An I no can go outside, eva! But you, you my God Yahweh! You wen bring me up outa da grave An I stay alive still yet!

⁷“Wen I wen feel like I goin stay alive ony litto bit moa, I tink plenny bout you, cuz you Yahweh. I wen pray hard to you Ova dea wea you stay inside da Temple dass spesho fo you.

⁸Whoeva go down in front Da idol kine gods dat good fo notting, Dey no like stay tight wit you. You da One dat erytime stick wit dem.

⁹But me, I like make sacrifice fo you bumbye, An sing an tell you dat you da greates! Da ting I wen promise you dat I goin do, I goin do um. Cuz you Yahweh, An you da One wen bring me outa trouble!”

¹⁰Den Yahweh, he wen tell da big fish wat fo do, an he bahf Jonah out on top da beach.