Read Hawaii Pidgin Malachi 2 Bible Online

Malachi 2 - Hawaii Pidgin bible

Malachi 2

¹So now, you pries guys, dis wat you gotta do.

²Dis wat Yahweh, Da God Ova All Da Armies tell: “If you guys make deaf ear, an no like lissen fo show respeck fo me, no matta you know wat kine God me, den I goin put kahuna on top you guys. Erytime you guys tell da peopo, ‘Yahweh goin do good tings fo you guys,’ I goin make eryting come bad fo dem. Dass cuz you guys no put yoa heart fo show respeck fo me, no matta you know wat kine God me!

³Cuz a wat you guys do, I goin mess up you guys ohana, so come small. I goin take all da stuff from inside da animals dat you kill fo da spesho religious times an rub um all ova yoa face. Den I goin take you guys outside da town, an throw you on top da kukae pile.

⁴You guys know wat you suppose to do awready. Dass cuz I like da deal stay solid dat I get wit you guys ohana, da Levi ohana.” Dass wat Yahweh, Da God Ova All Da Armies tell.

⁵He tell you guys: “Da deal dat I get wit da Levi ohana, goin stay solid. I wen give dem good kine life, an make tings come out good fo dem. I wen make da Levi ohana guys know who me, so dey stay scared an shaking in front me.

⁶Wen dey teach, dey tell da trut. Da tings dey tell, no mo notting bad. Eryting come out good fo dem. Dey do da right kine tings, an dey stay tight wit me. An dey help plenny peopo turn aroun fo no do bad kine stuff no moa.

⁷Az why, wen da pries guys talk, dass wea you go fo learn stuff, an aks dem fo teach you God's Rules. Cuz da pries guys, dey da messenja guys fo Yahweh, Da God Ova All Da Armies!

⁹(8-9) “But you guys wen go da wrong way! Da way you guys teach, you make plenny peopo go da wrong way too! You ack like no mo da deal I get wit da Levi ohana! I goin make erybody tink you guys pilau, an make you guys shame. Cuz wit you guys, no mo nobody do da tings da way I tell um fo do um! Wen you guys teach da peopo wat God's Rules mean, you tell um diffren fo diffren peopo.” Dass wat Yahweh, Da God Ova All Da Armies, tell.

¹⁰You no tink all us guys get da same fadda?! You no tink da one God wen make us guys?! How come all us guys ack So not even our own brudda can trus us?! So! How come we ack like da deal pilau Dat God wen make fo our ancesta guys?!

¹¹Da Judah peopo, no can trus dem. Some a da Israel peopo, an da peopo inside Jerusalem, Dey do unreal pilau kine stuff dat make you like puke. Cuz da Judah peopo, dey even go marry Da wahines dat show love an respeck to da gods from da odda places. Dass how dey make pilau, da place dat stay spesho fo Yahweh, Da place God get love an aloha fo.

¹²Get peopo dat make lidat, Dey even bring gif fo make sacrifice fo Yahweh, Da God Ova All Da Armies. I like fo Yahweh, cut off dem peopo from da Israel ohana, No matta who dem.

¹³An dass anodda ting you guys do. You guys cry big an moan all ova da altar wea you make sacrifice fo Yahweh. But Yahweh still yet no turn aroun an take da sacrifices you guys bring, an he no feel good cuz you bring um.

¹⁴But you guys, you tell, “How come Yahweh still tink I pilau?” I tell you how come! Cuz Yahweh know eryting bout you an yoa wife, da one you wen marry wen you was young. He know dat you bulai her, no matta she yoa bestes friend, an you wen make strong promise fo stick wit her. Az why he tink you pilau.

¹⁵You donno, God wen make you an yoa wife one?! He da one dat own you guys body an spirit. An you know why Yahweh wen make you one? So wen you get kids, dey stay all out fo God! So, you guys make shua you stay okay inside, an no bulai da wife you wen marry wen you was young.

¹⁶Yahweh, da God fo da Israel peopo, tell: “I hate wen you leave yoa wife, an wen you bus up peopo an make like you neva do notting!” Dass wat Yahweh, Da God Ova All Da Armies tell. So, you guys make shua you stay okay inside, an no bulai!

¹⁷You guys, you talk too much, you make Yahweh real tired! An you say, “How us guys make God tired?” Cuz you tell, weneva you do bad kine stuff, Yahweh tink you good, an he stay good inside fo wat you do. So you guys tell, “You tink God goin judge us? No way!”