Read Hawaii Pidgin Malachi 3 Bible Online

Malachi 3 - Hawaii Pidgin bible

Malachi 3

¹Yahweh Up Dea Inside Da Sky, da God Ova All Da Armies, tell dis: You know wat I goin do? I stay ready fo send my messenja guy He goin make ready da road befo I go dea. I goin show up mo fas den you tink, Ova dea inside my own temple! Dat messenja guy, da one dat you guys stay looking fo him, He da messenja fo set up da deal wit me, An you guys tell, ‘We goin stay good inside wen he come!’ You neva know?! He stay coming awready!”

²Da messenja guy goin come, An you tink you can handle wen he come?! No way! He goin show up, An you tink you can face him an no run away? Not even! Cuz him, he real strong, Jalike da real hot fire dat da peopo use fo take da junk stuff outa da silva. Jalike da wash soap Da peopo use fo make da clothes real clean.

³Da messenja guy, he goin make like da guy Dat melt da silva fo take out da junk stuff. Da pries guys dat come from Levi, He goin make dem come all clean inside. He goin throw out all da junk stuff inside dem, Jalike he melt da gold an silva fo burn up da junks. Den, da Levi peopo goin be da ones Dat make da sacrifices for Yahweh, Cuz den, dey goin be da kine peopo dat stay do da right ting.

⁴Wen da Judah ohana an da Jerusalem peopo Bring dea sacrifice fo Yahweh, Goin be jalike da ol days, long time ago, Jalike how was wen da sacrifice was good kine.

⁵Yahweh Ova All Da Armies say dis too: “I goin go by you guys in front da judge right den an dea, I goin tell da judge wat I know bout you guys, Bout da ones dat make kahuna, An da ones dat fool aroun behin dea wife o husban back, An da ones dat make strong promise but dey bulai, An da ones dat make trouble fo dea worka guys cuz dey no like pay um, An make trouble fo da widows an da kids dat no mo fadda o mudda, An da ones dat give hard time to da peopo from odda place. All dose peopo, dey no scared me!”

⁶Yahweh, he say dis too: “I Yahweh, Yahweh, an I no change how I ack. I still da same. Az why you guys from da Jacob ohana no stay wipe out!

⁷From da time dat yoa ancesta guys wen live, You guys erytime turn aroun an go da odda way from my Rules An you guys no stick wit um. Come back an be my guys one mo time! An I goin come back to you guys! I Yahweh, Da God Ova All Da Armies, An dass wat I tell.” But you guys tell, “How us guys goin come back?! Us guys neva go way!”

⁸Yahweh tell, “You guys tink anybody can steal from God, o wat? No way! Cuz you da ones dat stay steal from me, you know.” But you guys tell, “How us guys stay steal from you?!” Yahweh tell, “You guys owe me ten percent a eryting you get, an odda gifs, you know. Wen you guys no pay, you stay steal from me!

⁹Az why erybody inside da whole nation get kahuna on top dem, cuz you guys stay steal from me.

¹⁰“Go bring all da ten percent you owe me Inside da temple storage place. Den goin get food inside my house. So, try see if I fo real bout all dat! See if I no goin open da windows inside da sky An pour down fo you guys plenny good tings, Too plenny fo you guys handle! I Yahweh, Da God Ova All Da Armies, an dass wat I tell.

¹¹I goin chase away da bugs so dey no eat wat you guys plant. Dey no goin wipe out da tings dat grow outa da groun. Da grapes no goin fall down from da grape plants befo dey ready. I Yahweh, Da God Ova All Da Armies, an dass wat I tell.

¹²“Den all da peopos from diffren place goin say You guys can stay good inside, Cuz yoa land, one real nice place. Dass wat I tell, an I Yahweh, Da God Ova All Da Armies.”

¹³Yahweh tell, “You guys, you talk stink agains me!” But you guys tell, “Wot, us guys talk stink agains you?! No way!”

¹⁴You guys tell, “Ony wase time, work fo God! Wat we goin get from dat?! Notting! Us guys do all da religious kine stuff fo God awready, an now, us stay make real sad face in front Yahweh, Da God Ova All Da Armies.

¹⁵So den, from now, us guys goin tink, ‘Da peopo dat ack like dey mo betta den all da odda peopo an no care bout nobody, dey da ones dat can stay good inside.’ Da peopo dat do wass wrong, dey da ones dat come rich! Even wen dey push God fo see if he goin punish dem, notting bad happen to dem!”

¹⁶But den, get da odda peopo dat stay feel jalike dey real scared wen dey in front Yahweh. All dem talk wit odda guys dat tink da same ting jalike dem. Yahweh, he lissen plenny an hear wat da guys saying. He wen write down eryting on top one paypa dat stay in front him, fo no foget wat da peopo saying. Yahweh do all dat fo da ones dat stay feel jalike dey real scared in front him, an dat tink plenny bout wat kine God he stay.

¹⁷Den Yahweh, Da God Ova All Da Armies tell: “Wen da time come fo me make dem my spesho peopo, dey goin come mines.

¹⁸Den you guys goin see jalike befo time, da peopo dat stay do wass right, dey stay diffren den da peopo dat stay do wass wrong, an da peopo dat work fo God stay diffren den da peopo dat no work fo God.”