Read Hawaii Pidgin Malachi 4 Bible Online

Malachi 4 - Hawaii Pidgin bible

Malachi 4

¹Dis wat Yahweh, Da God Ova All Da Armies tell: “You know wat I goin do? Fo all da peopo dat ack jalike dey mo betta den anybody, An fo all da peopo dat stay do bad kine stuff -- Da time goin come, wen dose peopo goin come Jalike da lef ova junk kine stuff from da wheat Dat peopo burn up inside one hot burning oven! No goin get notting lef, Not even da roots, not even da branches!

²But fo you guys dat feel real scared Wen you tink bout wat kine God me, Erybody goin see fo real kine wat stay right, Jalike wen da bright sun come up An you can see eryting mo clea. An dass goin make all you guys feel good. Den, you guys goin run aroun an jump, Jalike wen peopo let da bebe cows outa da pen!

³Da time wen I goin do all dat, Jalike you guys goin walk all ova da bad kine peopo, Cuz dey goin be jalike da dirt undaneat you guys feets.” Dass wat Yahweh, Da God Ova All Da Armies tell.

⁴“No foget da Rules from my worka guy Moses. I wen teach him wat he gotta do, Mount Sinai side, So dat he can teach all da Israel peopo da Rules Fo know wass right an wass wrong.

⁵An one mo ting I goin do, I goin send Elijah to you guys, Da guy dat wen talk fo me befo time. He goin show up befo I come back. An dat time goin be awesome an real scary!

⁶Da Elijah guy, he goin make da faddas come back togedda wit dea kids An da kids come back togedda wit dea faddas. Cuz if dat no happen, Den I goin wipe out erybody inside da world!”