Read Hawaii Pidgin Matthew 16 Bible Online

Matthew 16 - Hawaii Pidgin bible

Matthew 16

¹Da Pharisee guys an da Sadducee guys wen go by Jesus fo try make um look shame wit his own words. Dey say, “Eh! Do someting awesome lidat, so us guys can see da proof dat you come from God in da sky.”

²He tell um, “Wen da sun going down, you guys say, ‘Goin get good weather, cuz da sky red.’

³Early morning time, you guys say, ‘Goin get bad weather today, cuz red da sky an get dark clouds.’ You guys know how fo figga da weather from da sky, but you guys no can even figga wat stay happening nowdays.

⁴You guys stay doing bad kine stuff, an jalike you stay fooling aroun behind God's back. Dass why you guys telling me you like see proof lidat. You guys no goin see notting. Da same ting jalike wen happen to da guy Jonah, dass da ony proof you guys goin see!” Den Jesus go way from dem.

⁵Jesus guys go come by him ova dea da odda side da lake. But den dey wen foget da food.

⁶Jesus tell um, “Watch out! Watch out fo da Pharisee guys an da Sadducee guys! Dey jalike da yeast dat make da bread dough mo bigga.”

⁷Jesus guys talking, an trying fo figga out wat he mean. Dey say, “He talking lidat cuz we neva bring da food.”

⁸Jesus wen know wat dey talking bout, an he say, “Eh! How come you guys talk bout no mo food? You guys trus me ony litto bit, still yet?

⁹You guys no undastan, still yet? Wen I wen broke da five breads fo da five tousand guys, how much baskets you guys wen pick up afta? Tink bout dat.

¹⁰Da seven breads dat wen feed four tousand guys, how much baskets you guys wen pick up afta?

¹¹How come you guys no undastan dat I no talking bout food? Dass why I say, watch out fo da yeast from da Pharisee guys an da Sadducee guys.”

¹²Den dey wen undastan dat he not talking bout da yeast inside da bread. He telling um fo watch out cuz no good da kine stuff da Pharisee guys an da Sadducee guys stay teaching.

¹³Jesus dem stay going Cesarea Philippi side. He aks da guys he teaching, “Eh, I da Guy Dass Fo Real, but who da peopo tink me?”

¹⁴Dey say, “Get guys dat say you John Da Baptiza Guy. An get odda guys dat say you Elijah. Get mo odda guys dat say you Jeremiah, o one nodda guy who wen talk fo God long time ago.”

¹⁵Jesus aks dem, “Kay den, wat bout you guys? Who you tink me fo real kine?”

¹⁶Simon Peter say, “You da Christ Guy, da Spesho Guy God Wen Send. Da God who alive fo real kine, you his Boy.”

¹⁷Jesus say, “Eh, John's boy! Simon! You can stay good inside cuz you know dat. No mo nobody from dis world wen teach you dat. My Fadda in da sky, he wen teach you dat.

¹⁸I tell you, yoa name Peter, an dat mean ‘rock.’ On top dis rock I goin make my church. Da power dat come from Hell fo kill peopo no goin win ova my church guys.

¹⁹I goin let you take charge da peopo dat get God in da sky fo dea King. If you say bout someting ova hea inside dis world ‘No can,’ den God in da sky goin say ‘No can’ too. An if you say bout someting ova hea inside dis world ‘Dass okay,’ den God in da sky goin say ‘Dass okay’ too.”

²⁰Den he tell his guys, “Make shua you guys no tell nobody dat I da Christ Guy, da Spesho Guy God Wen Send.”

²¹Jesus wen start fo show da guys he teaching how he gotta go Jerusalem an suffa plenny ova dea. All da older leada guys, da main pries guys, an da teacha guys dat teach God's Rules, dey da ones dat goin make Jesus suffa, an dey da ones dat goin kill him. But he goin come back alive afta three days.

²²Peter take him on da side an tell him, “Eh! No way, Boss! No way dass goin happen to you!”

²³But Jesus wen turn aroun an tell Peter, “Eh, move outa my way, Devil! You ony trying fo jam me up. Cuz you tink jalike da peopo tink, not jalike God tink.”

²⁴Jesus tell his guys, “Whoeva like stick wit me, dey gotta make up dea mind dat dey no goin be dea own boss no moa. Goin be hard, jalike dying on top one cross. An den, dey can stick wit me.

²⁵If bodda you dat you goin mahke, fo shua you goin mahke. But if you like do everyting you do fo me,an no bodda you if you mahke fo dat, den you goin live fo real kine.

²⁶Dis poho: one guy get everyting inside dis world, but da guy end up cut off from God, an no mo da real kine life inside. You tink you rich nuff fo buy back yoa life?

²⁷I da Guy Dass Fo Real. I goin come back wit God's angel messenja guys from da sky. Goin be awesome, cuz my Fadda, he awesome. Den I goin pay back everybody fo wat dey wen do, good kine o bad kine.

²⁸Dass right! An I like tell you guys dis too: I da Guy Dass fo Real, an get some peopo standing ova hea, dat no goin mahke till dey see me come fo be King.”