Read Hawaii Pidgin Matthew 23 Bible Online

Matthew 23 - Hawaii Pidgin bible

Matthew 23

¹Afta dat Jesus tell all da peopo an da guys he teaching,

²“Da teachas who teach God's Rules, an da Pharisee guys, dey get da same job jalike Moses had, cuz dey tell everybody wat fo do.

³So you guys betta do everyting dey tell you guys. But no do jalike dey do. Cuz dey no do da same ting dat dey teach.

⁴Wat dey teach, jalike dey stay pile up big heavy kine stuffs on top peopo's shouldas, dat real hard fo carry. But dey even no like help da peopo wit dea small finga notting.

⁵Everyting dey do, dey ony do um so dey can make demself look good in front da peopo. Dey go aroun an show off stuff da Bible say on top dea heads an arms, an make um look real nice wit real fancy kine religious kine clotheses.

⁶Dey like sit inside da main place at da lu`au, an on top da main place inside da Jewish churches.

⁷Dey like da peopo fo talk to dem wit respeck inside da open market, an fo call um ‘Teacha.’

⁸“But you guys, no let da peopo call you guys ‘Teacha.’ Cuz you guys get ony one Teacha, da Spesho Guy God Wen Send, an you guys stay brudda brudda.

⁹No call nobody inside da world yoa ‘Fadda,’ cuz you guys get ony one Fadda, an he stay in da sky.

¹⁰No let dem call you ‘Boss,’ cuz you guys get ony one Boss. Dass me, da Spesho Guy God Wen Send.

¹¹Wit you guys, whoeva yoa leada, he goin help all da odda guys jalike he one worka.

¹²Whoeva make himself big, God goin make um small. An whoeva make himself small, God goin make him big.”

¹³Den Jesus say, “Auwe! You teacha guys who teach God's Rules an you Pharisee guys, you guys goin get it! You guys say one ting an do anodda. You guys shut da door so da peopo no can get God in da sky fo dea King. But you guys no like get him fo yoa King too. An you guys no let da peopo who like get God fo dea King, get um.

¹⁴“Auwe! You teacha guys who teach God's Rules an you Pharisee guys, you guys goin get it! You guys say one ting an do anodda. You guys no mo shame fo trick da widows an take away dea house, an same time you guys praying, saying plenny stuff, so nobody tink you guys ripping off da widows. God goin get you guys mo den da odda guys.

¹⁵“Auwe! You teacha guys who teach God's Rules an you Pharisee guys, you guys goin get it! You guys say one ting an do anodda. You guys go all ova da ocean an all ova da land fo find one guy who not one Jew, so you guys can make um come one Jew. But afta he come one Jew, you guys make him two times mo worse den you guys, so he going Hell jalike you guys.

¹⁶“Auwe! You guys goin get it! You guys no can see notting, but you guys try fo show da odda guys wea fo go. You guys say, ‘If one guy swear to God he goin do someting, an he say, “I swear by da temple,” he no need do wat he say. But if he swear to God an he say, “I swear by da gold inside da temple,” he gotta do um.’

¹⁷Wot! You guys not tinking! You guys no can see notting! You guys tink da gold inside da temple mo importan den da temple dat make da gold spesho fo God? No way!

¹⁸“An you guys say, ‘Whoeva swear to God dat he goin do someting, an he say, “I swear by da altar inside da temple,” he no need do wat he say. But whoeva swear to God, an he say, “I swear by da gif offering on top da altar,” dat guy gotta do um.’

¹⁹Wot! You guys not tinking! You guys no can see notting! You guys tink da gif offering on top da altar mo importan den da altar dat make da gif offering spesho fo God? No way!

²⁰“Whoeva swear to God an say, ‘I swear by da altar,’ he swear to God by all da gifs on top da altar too.

²¹Whoeva swear to God an say, ‘I swear by da temple,’ he swear by da God dat stay inside da temple.

²²Whoeva swear to God an say, ‘I swear by da sky,’ dass God's throne, an God stay sit ova dea. So, if he swear to God ‘by da sky,’ den he swear by God.

²³“Auwe! You teacha guys who teach God's Rules an you Pharisee guys, you guys goin get it! You guys say one ting an do anodda. You guys give one piece to God from ten piece spice, like da mint, da dill kine spice, an da cummin spice. But you guys no do da main stuff God's Rules say. You guys no make right to da odda guys. You guys no give um chance. Dey no can trus you guys. Dass da main ting. Do dat stuff jalike you guys suppose to, an no foget da odda stuff too.

²⁴You guys no can see notting, an you guys try fo show da odda guys wea fo go! You guys pick out one small fly from inside da soup, but den jalike you guys let one big camel stay inside da soup, an you swallow da whole ting!

²⁵“Auwe! You teacha guys who teach God's Rules an you Pharisee guys, you guys goin get it! You guys say one ting an do anodda! Jalike you guys clean da cup an da plate on da outside, but inside get plenny stuff you guys wen rip off from da odda peopo, an you guys stash um fo yoaself!

²⁶You blind Pharisee guys! Go clean yoa cup an plate inside first, den da outside goin be clean too.

²⁷“Auwe! You teacha guys who teach God's Rules an you Pharisee guys, you guys goin get it! You guys say one ting an do anodda! You guys jus like da tomb dey wen paint white so look good outside, but inside get ony mahke guy bones an all kine pilau stuff.

²⁸On da outside, you guys make jalike you doing da right kine stuff, an peopo tink you guys stay doing um, but inside, you guys everytime say one ting an do anodda, an you guys stay broke God's Rules.

²⁹“Auwe! You teacha guys who teach God's Rules an you Pharisee guys, you guys goin get it! You guys say one ting an do anodda! You guys make big tombs fo da guys who wen talk fo God, an fix up da tombs fo da guys who wen everytime do da right ting.

³⁰Same time, you guys say, ‘If we was dea wen our ancesta guys was living, we neva help dem kill da guys who wen talk fo God.’

³¹Wen you guys say dat, you guys show dat you jalike dem killa guys -- you guys dea kids!

³²So go finish wat yoa ancesta guys wen start!

³³You guys jalike snakes, an you guys come from one snake ohana! You guys tink God da Judge goin let you guys go? No way! You tink you guys not going Hell? No way!

³⁴“So, fo shua I goin send guys by you guys who goin talk fo God, an smart guys, an guys who goin teach God's Rules. But you goin kill some a da guys, an some guys you guys goin kill on top crosses, an mo odda guys you guys goin whip hard inside da Jewish churches, an you guys goin make um suffa from one town to anodda town.

³⁵God goin punish you guys fo all da guys yoa ancesta guys wen kill. Dey wen kill any kine guys who wen everytime do wat dey suppose to, starting from Abel all da way to Zekariah, he Barakiah's boy. He da guy yoa ancesta guys wen kill right inside da temple yard, wit God's spesho place on one side an da altar on da odda side.

³⁶Dass right! An I like tell you guys dis too: you guys who stay live now goin suffa, cuz a all dis stuff dat wen happen befo.

³⁷“O auwe! You Jerusalem peopo! You guys stay kill da guys who talk fo God, an throw stones fo kill da guys God send by you guys. Plenny times I wen like bring you guys by me, jalike one mudda chicken bring togedda her baby chickens unda her wings, but you guys no like come.

³⁸You know wat? Everyting stay all poho fo you guys awready!

³⁹I tell you guys, you guys no goin see me again till you say, ‘Dis guy come wit power from da Boss Up Dea Inside Da Sky. We like God do plenny good tings fo him!’-”