Read Hawaii Pidgin Matthew 6 Bible Online

Matthew 6 - Hawaii Pidgin bible

Matthew 6

¹“Watch out! No good you make show in front peopo wen you do da religious kine stuff, cuz you guys ony like dem see da religious kine stuff dat you guys do. If you guys make lidat, yoa Fadda in da sky no goin give you guys notting.

²“Wen you guys give money to da guys dat no mo notting, no make big show jalike da guys dat say one ting an do anodda wen dey go inside da Jewish churches an wen dey walk in da town wea da peopo stay. Dey like da peopo say dat dey awesome. Dass right! An I telling you guys dis too: Dey wen get all dea pay awready.

³“So you guys, wen you give money to da guys dat no mo notting, no tell nobody.

⁴Den nobody goin know dat you give money. But yoa Fadda, he can see wat da odda guys no can see, an he goin give you plenny fo dat.

⁵“Wen you guys pray, no make like da guys dat say one ting an do anodda. Dey like stand up an pray inside da Jewish churches o outside wea everybody go, cuz dey like da peopo see wat dey do. Dass right! An I telling you dis too: Dey wen get all dea pay awready.

⁶But you guys, wen you pray, go inside yoa room an close da door. Den pray to yoa Fadda. He stay inside da room wit you, wea da odda guys no can see, an he goin give you plenny fo dat. Cuz yoa Fadda can see wat da odda guys no can see.

⁷“Wen you guys pray, no say any kine stuff dat mean notting. Get odda peopos all ova da world dat make lidat. Dey tink God goin lissen to dem cuz dey say so plenny stuff wen dey pray.

⁸No make like dem, cuz yoa Fadda know awready all da stuff you need, befo you aks him.

⁹So, pray lidis, ‘God, you our Fadda. You stay inside da sky. We like all da peopo know fo shua how you stay, An dat you stay good an spesho, An we like dem give you plenny respeck.

¹⁰We like you come King fo everybody now. We like everybody make jalike you like, Ova hea inside da world, Jalike da angel guys up inside da sky make jalike you like.

¹¹Give us da food we need fo every day.

¹²Hemo our shame, an let us go Fo all da kine bad stuff we do to you, Jalike us guys let da odda guys go awready, An we no stay huhu wit dem Fo all da kine bad stuff dey do to us.

¹³No let us get chance fo do bad kine stuff, But take us outa dea, so da Bad Guy no can hurt us. [Cuz you our King, You get da real power, An you stay awesome foeva. Dass it!]’

¹⁴“I telling you guys, if you let da odda guys go afta dey do bad kine stuff to you, den yoa Fadda up dea inside da sky goin let you guys go, an hemo yoa shame fo all da kine bad stuff you guys do.

¹⁵But if you no let da odda guys go afta dey do bad kine stuff to you, den yoa Fadda no goin let you guys go, an he no goin hemo yoa shame fo all da kine bad stuff you guys do.

¹⁶“You guys, wen you no eat so you can pray, no make long face. Da guys dat say one ting an do anodda, dey try make demself look all hamajang so all da peopo can see dey no eat so dey can pray. Dass right! An I telling you guys dis too: Dey wen get all dea pay awready, an God no goin give um any moa.

¹⁷“But you guys, wen you no eat so you can pray, comb yoa hair an wash yoa face,

¹⁸so wen da peopo see you, dey no goin know you not eating so you can pray. Yoa Fadda see wat da odda guys no can see, an he goin give you plenny fo dat.

¹⁹“No work hard fo stash da kine stuffs dass importan ova hea inside dis world, cuz da moth an da rust goin eat um up, an da steala guys goin broke inside yoa house an take um.

²⁰Mo betta you guys do da good kine stuffs dass importan up dea inside da sky wea God stay. Ova dea da moth an da rust no can eat um up, an da steala guys no can broke inside yoa house an take um.

²¹Cuz you know, wateva kine stuffs stay da mos importan fo you, dass wea yoa heart stay.

²²“You know, eh, da eye jalike one lamp fo inside da body. If da eye okay, dat mean, da guy stay all light inside. He get good heart fo help peopo.

²³But if da eye no good, dat mean, da guy stay all dark inside. He one greedy bugga! Eh brah, if no mo light inside you, you stay all dark inside fo shua!

²⁴“Nobody can work, an two boss guys own him. He goin like lissen to one boss an hate da odda. He goin like stick wit one boss an tink da odda guy no good. Same ting, you guys no can work fo da real God an da money god.

²⁵“Dass why I telling you guys, no worry bout how you goin live, wat you goin eat, wat you goin drink, wat you goin wear. Wat you tink? You live ony fo eat? No way! Yoa body ony fo clotheses? Not even!

²⁶Look da birds dat fly in da sky. Dey no plant seed, an get crops, an stash um, but yoa Fadda in da sky, he feed um. Tink! You guys mo importan den dem.

²⁷Wat you worry fo? You tink dat goin make you stay alive one mo hour? No way!

²⁸“An da clotheses, how come you worry bout dat? Tink! Da flowers dat grow in da field, how dey can grow? Dey no work o make dea own clotheses.

²⁹But I telling you, even King Solomon, wit all his awesome stuffs, neva get awesome clotheses like da flowers.

³⁰Da grass inside da field stay growing today, but tomorrow dey goin throw um inside da fire. Eh, God give da grass clotheses lidat, so garans he goin give you guys clotheses. You guys ony trussing God litto bit!

³¹“So, eh! no go worry an say, ‘Wat we goin eat?’ o ‘Wat we goin drink?’ o ‘Wat we goin wear?’

³²You know, da odda peopos all ova da world dat donno God, dey try get all dat kine stuff. But yoa Fadda inside da sky, he know you guys need um.

³³Main ting, make God yoa Boss, cuz he da King. Do da right ting jalike he do, an you guys goin get all da stuffs you need.

³⁴“So no worry bout tomorrow, cuz tomorrow get plenny fo worry bout. Every day get nuff trouble fo dat day.