Read Hawaii Pidgin Mark 1 Bible Online

Mark 1 - Hawaii Pidgin bible

Mark 1

¹You wen hear da story bout Jesus? He da Christ, da Spesho Guy God Wen Send. He God's Boy. Dis da time da Good Kine Stuff Bout Christ wen start happening.

²Isaiah, da guy who wen talk fo God long time ago, he wen write dis inside da Bible: “God say, lissen! I goin send my messenja guy. He going ahead a you An he goin get everyting ready Befo you come, Cuz you my real Spesho Guy, you know.

³Inside da boonies, My messenja guy goin talk real loud an real strong So everybody can hear: ‘Eh! Make da road ready fo da Good Boss Up Dea! Make um strait fo him!’-”

⁴Dat time da guy John wen show up inside da boonies, baptizing da peopo. He stay teaching, “You guys gotta come sorry an like pau do all da bad kine stuff you stay doing now, an no do um no moa. Den God goin let you guys go an hemo all yoa shame. Dass why I stay baptize peopo.”

⁵All da peopo from Judea side an Jerusalem town, dey wen go da boonies fo hear John. Dey wen tell um strait out all da bad kine stuff dey wen do, an he wen baptize um inside da Jordan River.

⁶You know, John's clotheses come from da camel hair. He wen make one rope outa leather fo belt. He eat grasshoppas, an he get honey from da bees.

⁷Dis wat he tell um, “Afta me, goin come one nodda guy. He get mo power den me. An you know wat? I not even importan nuff fo go down an help him hemo his slippa from his foot.

⁸I baptizing you guys wit water, but da way he goin baptize you guys, he goin give you God's Good an Spesho Spirit fo take ova you.”

⁹Dat time, Jesus come from Nazaret town, Galilee side, an John wen baptize him inside da Jordan River.

¹⁰Right den Jesus wen come up outa da water. An you know wat? Jesus wen see da sky broke open, an wen spock God's Spirit coming down on top him, jalike one dove.

¹¹An wow! Had one voice from da sky wen say, “You my boy! I really get love an aloha fo you, an I stay good inside cuz a you!”

¹²Right afta dat, God's Spirit wen make Jesus go inside da boonies.

¹³Had wild animals ova dea. Jesus, he wen stay dea forty days. Da Devil try presha him fo make him do bad kine stuff, but he neva. An had angel messenja guys from God dat wen come an take care him.

¹⁴Latas, King Herod wen throw John Da Baptiza Guy inside da prison. Afta dat, Jesus go Galilee side, an he tell da peopo da Good Stuff From God.

¹⁵He tell, “Time awready! God stay King hea now. You guys gotta come sorry fo all da bad kine stuff you guys doing, an no do um no moa. An da Good Stuff From God I telling you guys, you guys gotta believe um!”

¹⁶Dat time Jesus stay walking by Galilee Lake, an he spock Simon an his brudda Andrew. Dey throwing dea net inside da water, cuz dey fisha guys.

¹⁷Jesus tell um, “Eh you guys! Come wit me! Be my guys! Da way you guys bring in da fish, I goin teach you guys how fo bring in peopo fo be my guys too!”

¹⁸Right den an dea, dey wen leave dea nets an go wit him.

¹⁹Going from dea, he spock James an his brudda John. Zebedee dea fadda. Dey inside da boat fixing dea nets.

²⁰Right den an dea he tell um fo come wit him. Dey go way from dea fadda Zebedee who stay inside da boat wit da workas, an dey go wit Jesus.

²¹Jesus an his guys, dey wen go Capernaum town. On da Jewish Rest Day, dey go inside da Jewish church. Jesus start fo teach da peopo.

²²Wat he teach um wen blow dea minds! Cuz he teach wit plenny power, not like da teacha guys dat teach God's Rules, an dem guys no mo power.

²³Get one guy inside da Jewish church wit one bad spirit dat wen take ova him. Right den an dea he wen yell,

²⁴“Ho! You Jesus from Nazaret! Wat you like do to us? Why you wen come ova hea? Fo wipe us out? I know who you! You da Good An Spesho Guy from God!”

²⁵Jesus wen scold da spirit, “Shut yoa mout! Let go da guy!”

²⁶Den da bad spirit wen shake up da guy plenny. Da spirit wen yell real loud, an let go da guy.

²⁷Da peopo, wen blow dea minds. Dey tell each odda, “Eh! Wass dis?! Wat kine new teaching dis? Dis guy, he get power! He even tell da bad kine spirits wat fo do, an dey do um!”

²⁸Right den an dea, da peopo wen go all ova Galilee side, fo tell everybody bout Jesus.

²⁹Right den an dea Jesus dem wen go outside da Jewish church, an dey go inside Simon an Andrew's house. James an John go too.

³⁰Simon's mudda-in-law get feva. Simon dem tell Jesus, “Eh, her sick, you know.”

³¹Jesus go an take her by da hand an pull her up. Right den da feva wen pau, an her wen give dem food.

³²Wen da sun go down, an da Rest Day pau, da peopo bring all da sick peopo an da peopo who get bad spirits da wen take ova dem.

³³All da peopo from da town was jamming outside da house.

³⁴Jesus wen make plenny peopo who get all kine sick come good. He make all da bad kine spirits let go da peopo, an he tell da spirits, “No talk!” cuz dey know who him.

³⁵Early in da morning, wen starting fo get light, Jesus wen get up an go outa da house. He go one place wea neva have nobody, an pray ova dea.

³⁶Simon dem wen go look fo him.

³⁷Dey find him, an dey tell, “Eh, everybody stay looking fo you, you know!”

³⁸But he say, “Neva mind! We gotta go da odda towns aroun hea, cuz I gotta teach dea too. Dass why I wen come.”

³⁹So, he teach inside all da Jewish churches all ova Galilee, an make all da bad kine spirits let go da peopo.

⁴⁰Had one lepa guy wen go by Jesus, an go down in front him an beg him. He say, “If you like, you can make me come good so I can go wit da odda peopo fo pray, yeah?”

⁴¹Jesus wen look at him, an he pity him. He touch da guy, an say, “Okay, I do um. Come good.”

⁴²Right den an dea da lepa guy come good. No mo lepa!

⁴⁴(43-44) Jesus wen talk strong to da guy. He tell um, “Eh! You betta not tell nobody bout dis! Go, let da pries guy check you out. No foget make da kine sacrifice now, jalike Moses wen tell inside God's Rules. Den everybody goin know dat you stay good now.” Den he tell um fo go.

⁴⁵But da guy, he go outside an tell everybody wat wen happen to him. So, Jesus no can stay inside da towns, but he gotta stay outside inside da boonies. An da peopo, dey stay come from all ova da place fo hear him.