Read Hawaii Pidgin Mark 10 Bible Online

Mark 10 - Hawaii Pidgin bible

Mark 10

¹Den Jesus wen go way from dat place an go Judea side, da odda side da Jordan River. One mo time plenny peopo wen go by him, an he teach um jalike he everytime do.

²Some Pharisee guys come fo trap him. Dey aks him, “Dass right, o wat, inside da Rules, fo one guy go dump his wife?”

³Jesus wen aks um, “Wat Rule Moses wen give yoa ancesta guys bout dat?”

⁴Dey say, “Moses wen tell, ‘Gotta give da wife one paper fo get one divorce, den can dump her.’-”

⁵Jesus tell um, “Cuz all you guys so hard head, dass why Moses wen let you guys dump yoa wife.

⁶But I telling you guys dis: Wen God wen make da world, he make one guy an one wahine.

⁷An God say, ‘Cuz I wen do dat, da guy no goin stay wit his fadda an mudda no moa, he goin stay wit his wife.

⁸An da guy an da wahine goin be togedda jalike one body.’ So jalike dey not two peopo no moa, dey jalike one.

⁹Wat God wen put togedda, da peopo betta not broke um up.

¹⁰Afta dey wen go inside da house one mo time, da guys he teaching wen aks um bout dat.

¹¹He tell um, “Da guy who dump his wife an go marry one nodda wahine, da way God see um, da first one still stay his wife. Da guy ony fooling aroun da second wahine.

¹²An da wahine who dump her husban an go marry one nodda guy, da way God see um, da first one still stay her husban. Da wahine ony fooling aroun da second guy.”

¹³Da peopo wen bring dea small kids by Jesus, cuz dey like him fo put his hands on top dea heads an aks God fo do good tings fo dem. But den Jesus guys wen scold da peopo cuz dey wen bring da kids, an dey tink da kids goin bodda Jesus.

¹⁴Wen Jesus wen see wat his guys doing, he huhu. He say, “Let da kids come! No stop dem! Cuz da peopo who make God dea King, inside demself dey jalike dese kids.

¹⁵Dass right! An I like tell you dis too: Da guy who not jalike one small kid inside, God no goin be his King.”

¹⁶An he wen hug da kids, an put his hands on top da kids heads, an aks God fo do good tings fo dem.

¹⁷Wen Jesus was starting fo go, one guy wen run up by him, an go down on his knees in front him, an say: ‘Eh, Teacha, you good. Can aks you one question? Wat I gotta do fo live to da max foeva?”

¹⁸Jesus say: “How come you call me good? Ony get One dat stay good fo real kine, dass God.

¹⁹You know God's Rules: No go kill nobody, no go fool aroun behind da odda's back, no rip off nobody, no bulai any kine bout nobody, no cockaroach nobody, show respeck fo yoa fadda an mudda.

²⁰He say: “Ho, Teacha! From small kid time I do all dat stuff.”

²¹Jesus wen look at um, an get aloha fo him. He say: “Ony one ting mo you neva do dat you gotta do. Go sell all da stuffs you get, an give da money to da poor peopo. An garans you goin get da real kine rich stuff up dea wea God stay. Den come wit me fo be my guy.”

²²Da guy wen hear dat, an he wen come real sad, an he wen go way, cuz he get plenny rich stuffs dat he neva like sell.

²³Jesus wen look aroun at his guys an say, “Az why hard fo one rich guy fo get God fo his King!”

²⁴His guys wen hear wat Jesus say, an wen blow dea minds. Jesus say one mo time, “Eh you guys! Stay hard, you know, fo get God fo yoa King.

²⁵Stay mo easy fo one camel go thru da puka in one needle, den fo one rich guy fo get God fo his King.”

²⁶Dey all shock, an dey tell each odda, “If dass how stay, who can come outa da bad kine stuff he stay in, den?”

²⁷Jesus look strait at dem an tell, “No mo nobody dat can do um, but ony God, he da One dat can do um all.”

²⁸Den Peter wen tell, “Eh, Boss, look! We wen give up everyting we get fo go wit you.”

²⁹Jesus say, “Az right! An I tell you guys dis: Whoeva give up dea home, dea bruddas, dea sistas, dea mudda an fadda, dea kids, an dea lands, so dey can stick wit me an da Good Stuff From God I stay telling you,

³⁰bumbye dey goin get hundred times mo plenny even befo dey mahke. Dey goin get home, bruddas, sistas, mudda, kids, lands. An one nodda ting dey goin get -- peopo goin make um suffa. Bumbye, in da time to come, dey goin live to da max foeva.

³¹Goin get plenny peopo who like make demself come first, but bumbye dey goin come last. An get plenny peopo who like make demself come last, but bumbye dey goin come first.”

³²Jesus go in front his guys, an dey all going Jerusalem. Jesus guys was all shook up, an da odda peopo who wen go wit dem was all scared. One mo time he wen take da twelve guys by da side a da road, an tell um wat goin happen.

³³He tell dem, “Eh, lissen, we going Jerusalem. I da Guy Dass Fo Real. One guy goin set me up so da main pries guys an da teacha guys dat teach God's Rules can take me. Den dey goin say I gotta mahke. Dey goin give me to da guys dat not Jews.

³⁴Dey goin make fun a me, an spit on top me, an whip me, an kill me. But on day numba three, I goin come back alive.”

³⁵James an John, Zebedee's boys, dey come by Jesus. Dey say, “Teacha, us guys like you do someting fo us, yeah?”

³⁶Jesus say, “Wat you like?”

³⁷Dey say, “Wen you come King, goin be awesome, yeah? We like you let us sit by you, one by da left side an da odda by da right side.”

³⁸Jesus say, “You guys donno wat you aksing fo. You tink you guys can suffa jalike I goin suffa? You tink you can handle da big trouble I goin get?”

³⁹Dey say, “Shua, us guys can handle.” He tell um, “Fo shua you guys goin suffa jalike me, an you goin handle all da trouble I goin get.

⁴⁰But fo sit by my right side an by my left side bumbye wen I come King, dass not mines fo say. My Fadda, he da One who can say dat, an he awready stay make da spesho places ready fo da peopo dat suppose to sit ova dea.”

⁴¹Wen da odda ten guys hear dat, dey come all huhu wit James an John.

⁴²Jesus say, “Eh, all you guys! Come ova hea! You know, da leadas fo da peopos dat donno God, dey get any kine power ova dea peopo. Dea main guys get da rights fo tell da peopo wat fo do.

⁴³But you guys, no goin be lidat wit you. Wit you guys, whoeva like be da leada guy, he gotta be da helpa guy first.

⁴⁴Wit you guys, whoeva like be da numba one guy, he gotta do wat you guys tell him.

⁴⁵I da Guy Dass Fo Real. I neva come so peopo can take care me. I wen come fo take care dem. I wen come fo give up my life an mahke fo cut loose plenny peopo from da power dat da bad kine stuff get ova dem.”

⁴⁶Dey go Jericho. Wen dey going away from da town, get plenny peopo wit dem. Bartimeus, one blind guy, stay sitting by da road side begging. He Timeus boy.

⁴⁷He hear dat Jesus from Nazaret passing by, an he wen start fo yell, “Eh, Jesus! You da guy dat suppose to show up from King David's ohana! Try pity me!”

⁴⁸Had plenny peopo ova dea dat wen scold him an tell um fo shut his mout. But he wen yell even mo loud, “Eh Boss, you da guy from King David's ohana! Try pity me!”

⁴⁹Jesus stop an say, “Call him!” So dey wen call da blind guy an tell um, “Eh, dass okay! Get up! He stay call you.”

⁵⁰He wen jump up an throw down his coat, an go by Jesus.

⁵¹Jesus aks um, “Wat you like me do fo you?” Da blind guy say, “Teacha! I like see!”

⁵²Jesus tell um, “Go! You wen trus me, dass why you come good now.” Right den an dea he can see, an he go wit Jesus on da road.