Read Hawaii Pidgin Mark 7 Bible Online

Mark 7 - Hawaii Pidgin bible

Mark 7

¹Den some Pharisee guys an teacha guys dat teach God's Rules wen go from Jerusalem by Jesus.

²Dey spock Jesus guys, how dey eat. Befo dey eat, dey no wash dea hands da way da Pharisee guys say dey gotta wash um.

³You know, da Pharisee guys an all da Jewish peopo, dey no eat till dey wash dea hands. But dey suppose to wash um jalike da ancesta guys wen teach from long time ago.

⁴Wen dey come back from da market, dey no eat till dey wash dea hands dat way. Get plenny odda stuffs dey gotta do lidat. First, dey gotta wash da cups, da pitchas, an da pots jus right, da way dea ancesta guys wen teach um, so den dey can pray.

⁵So da Pharisee guys an da teacha guys dat teach God's Rules, dey tell Jesus, “Eh, da guys you teaching, no good how dey do! How come dey no live da way da ancesta guys wen teach from long time ago? Dey no wash dea hands dat way befo dey eat!”

⁶Jesus tell um, “Da guy Isaiah wen talk fo God long time ago, an fo shua he talking bout you guys! Cuz you guys say one ting an do anodda. Isaiah wen write dis: ‘God say: Dese peopo, dey say dey get respeck fo me, But inside dea heart dey stay far from me.

⁷Dey go down an pray to me, But dey ony wase time. Wat dey teach, Dass ony wat some peopo say we gotta do.’

⁸Jesus say, “You guys no like do wat God stay tell you. You guys ony do wat odda peopo wen teach you.”

⁹An he tell um, “You guys jalike da sly mongoose, yeah?! You guys know how fo dump God's Rules, so you guys can stick wit wat some peopo wen teach you long time ago.

¹⁰Moses wen tell, ‘Show respeck fo yoa fadda an mudda.’ He say dis too: ‘Whoeva swear at his fadda o mudda, gotta kill him.’

¹¹“But you teacha guys say, ‘If one guy get someting dat he can use um fo help his fadda o mudda, he can say to dem, “I no goin use um fo help you guys, cuz bumbye I goin give um to God.”’

¹²Den you guys say da guy no need help his fadda o mudda.

¹³You guys make no good wat God wen say, so you can stick wit da kine stuff yoa ancesta guys wen teach from long time ago. You guys do plenny odda tings lidat, an teach da odda peopo fo do um too.”

¹⁴Den Jesus wen tell da peopo, “Come. Lissen an try undastan.

¹⁵Wat you guys put inside yoa mout no mean you pilau inside so you no can pray, but wat come outa yoa mout, dass wat make you pilau inside so you no can pray.

¹⁶If you wen hear dat, den lissen!”

¹⁷Latas he wen go way from da peopo, an go inside one house, an da guys he teaching come an say, “Try tell us wat da ting mean dat he wen tell um.”

¹⁸He tell um, “Wot! You guys still yet no can undastan? You jalike da odda peopo! You gotta figga dis way: Wateva go inside da guy no can make him pilau inside so he no can pray.

¹⁹Cuz dat ting no go inside da heart, but go inside da stomach, an bumbye come out.” (Wen Jesus say dat, he make um okay fo eat any kine stuff.)

²⁰Den Jesus say, “Da kine stuff dat come outa one guy, dass wat make him pilau inside so he no can pray.

²¹Get all kine bad kine stuff come out from inside da heart. Dass how everybody figga how dey can do bad kine stuff; dey not married an dey still yet go fool aroun; dey rip off da odda peopo; dey kill; dey married an still yet go fool aroun;

²²dey like corral everyting fo demself; dey feel good wen dey do bad; dey like bulai da odda guy; dey no mo shame fo any kine; bodda dem wen da odda guy get someting good; dey talk stink bout da odda peopo; dey get big head; dey ack stupid cuz dey no like tink.

²³All dat bad kine stuff, dass wat come from inside da heart. Az why peopo stay pilau inside an dey no can pray.”

²⁴From dea Jesus go Tyre side. He wen go inside one house, an he no like nobody know wea he stay. But no can. Everybody wen find out.

²⁶(25-26) Get one wahine, from da Fonecia peopo, Syria side. She Greek, not Jewish, from da kine peopo dat da Jews call “dogs.” Her litto girl get one bad kine spirit dat wen take ova her, an make her do all kine stuff. Da mudda wen hear bout Jesus, an right den an dea she wen go by him. She wen go down by his feet, an beg him fo make da bad kine spirit let go her girl.

²⁷Jesus say, “First, gotta feed da kids, you know. No good take da food from da kids an throw um down to da dogs.”

²⁸She say, “Dass right, Boss. But even da dogs unda da table eat wat fall down from da table, yeah?”

²⁹Jesus tell her, “Wow! You trus me fo real kine! You can hele on home. Da bad kine spirit gone awready from yoa girl!”

³⁰So she go back home. Dea was da girl. She resting on top da bed, an no mo bad kine spirit.

³¹Jesus wen hele on from Tyre side, an go thru Sidon, to Galilee Lake, near da Ten Towns.

³²Dey bring one guy who no can hear o talk right. Dey beg Jesus fo put his hands on top da guy.

³³Jesus take him by da side wea neva have nobody. Den he wen stick his finga inside da guy's ears, an spit, an touch da guy's tongue.

³⁴Jesus wen look up to da sky, an moan, an say, “Efata!” Dat mean, “Open up!”

³⁵An right den an dea da guy's ears an his tongue come okay, an he can talk good.

³⁶Jesus tell dem guys, “No tell nobody bout dis!” But da mo he say dat, da mo dey was telling.

³⁷All dis really wen blow da peopo's minds. Dey say, “Dis guy, he really do everyting good! He even make da peopo who no can hear, hear, an da peopo who no can talk, talk!”