Read Hawaii Pidgin Luke 1 Bible Online

Luke 1 - Hawaii Pidgin bible

Luke 1

¹Aloha, my friend Teofilus, Plenny guys wen write down da tings dat wen happen wit us.

²Dey wen write down da stuff da odda guys wen see from da time Jesus wen start fo teach, an dey wen teach us an plenny odda peopo bout wat wen happen.

³An me, I wen check out real good all da stuff dat wen happen from da start, an I tink dat I like write um down fo you one by one.

⁴Den you can know dat da stuff you wen learn stay true.

⁵Wen Herod stay king fo Judea, had one pries guy name Zekariah. He wen work wit da Abijah pries hui. Elizabet, she his wife. She wen come from da Aaron pries ohana.

⁶Zekariah an his wife wen do da right tings da way God see um. Everyting da Boss wen tell um fo do, an all God's Rules, dey wen do, an no mo nobody poin finga dem.

⁷Dey no mo kids cuz Elizabet no can. She an Zekariah stay old now.

⁸An wen happen dat wen Zekariah wen go in front God inside da temple, fo do da pries kine job wit his pries hui,

⁹da pries guys wen pick Zekariah fo go inside God's Spesho Place an burn da incense dat time. Dey wen pick um ‘Jun Ken A Po’ kine, cuz dass how dey wen do um.

¹⁰An all da peopo stand outside praying wen da time wen come wen he suppose to burn da incense.

¹¹Den Zekariah wen spock one angel messenja guy from da Boss Up Dea In Da Sky dat wen come, standing on da right side by da altar wea da incense stay burn.

¹²Wen Zekariah see da angel guy he wen come mix up an scared.

¹³But da angel guy wen tell, “No scared, Zekariah! God wen hear wat you wen aks, an yoa wife Elizabet goin born one boy. You goin name him John.

¹⁴You goin stay real good inside cuz a him, an plenny peopo going stay good inside cuz he wen born.

¹⁵He goin be one importan guy, da way da Boss Up Dea In Da Sky see um. He no goin drink no wine o da odda kine booze. God's Spesho Spirit goin take charge a him befo he born.

¹⁶He goin bring back plenny Israel peopo fo trus God dea Boss.

¹⁷He goin come first, befo da Boss come, wit da same kine spirit an power dat Elijah wen get. He goin make da faddas get love fo dea kids again. An da peopo dat no do wat dey suppose to do, he goin make dem tink right jalike da peopo dat do da right tings. He goin make da peopo ready fo wen da Boss Up Dea In Da Sky come.”

¹⁸Zekariah wen aks da angel guy, “How I goin know dis fo shua? I one old man, an my wife, she old too.”

¹⁹Da angel guy wen tell, “I Gabriel, da one dat stand in front God, an he wen send me fo tell you dis good stuff.

²⁰From now on, you no can talk notting, till yoa boy born, cuz you neva trus wat I wen say. Dis goin happen fo shua at da right time.”

²¹All da time dis stay going on, da peopo stay wait fo Zekariah outside, an dey wen tink how come he wen stay long time inside da temple.

²²Wen he come outside, he no can talk to dem. So dey wen tink he wen see someting spesho inside dea, cuz he wen make signs wit his hands, but no can talk.

²³Wen da time pau fo his job, he wen go home.

²⁴Afta dat his wife Elizabet wen come hapai, an fo five months she wen stay hide inside da house.

²⁵She say, “Da Boss Up Dea In Da Sky wen do dis fo me. He wen show me he do someting good fo me, an he wen take away my shame wit da peopo.”

²⁶Afta six months God wen send da angel messenja Gabriel to one town Galilee side name Nazaret.

²⁷He come by one wahine name Mary. She neva come togedda wit one guy yet, but she make ready fo marry one guy name Joseph. He from King David's ohana.

²⁸Da angel guy come by her an say, “Aloha! Da Good Boss Up Dea In Da Sky goin do someting spesho fo you. He stay wit you.”

²⁹Mary come mix up cuz a wat he wen say, an tinking wat dat mean.

³⁰Da angel guy say, “Mary, no scared. God wen pick you, cuz he like do plenny good stuff fo you.

³¹You goin come hapai, an goin born one boy. You goin name him ‘Jesus.’

³²He goin be importan, An God goin call him ‘my Boy dat come from me, Da God Dass Mo Importan Den All Da Odda Gods.’ God da Boss goin make him one king Jalike King David, his ancesta guy.

³³He goin stay King fo Jacob's ohana, da Israel peopo, foeva. Dat no goin pau eva.”

³⁴Mary aks him, “How dis can be? I neva even sleep wit one guy.”

³⁵Da angel guy say, “God's Spesho Spirit goin come ova you. Da God Dass Mo Importan Den All Da Odda Gods, his power goin cover you. An dat baby you goin get, God goin call him ‘Spesho Fo Me’ an ‘God's Boy’.

³⁶You know Elizabet, yoa ohana? No matta she stay old, she goin born one boy too. Peopo say she no can born babies, but she six months hapai awready.

³⁷Notting too hard fo God.”

³⁸Mary say, “I da Boss helpa. Do um to me jalike you wen say.” Den da angel guy wen go way.

³⁹Dat time, Mary wen get up an wen go fast to one town in da hills Judea side.

⁴⁰Ova dea she wen go inside Zekariah's house, an wen spock Elizabet, an wen tell her, “Aloha!”

⁴¹Wen Elizabet wen hear Mary say dat, da baby wen huli inside her, an God's Spesho Spirit wen take ova Elizabet.

⁴²An she wen talk loud an say, “God stay do mo good fo you den fo all da wahines, an he stay do mo good fo da boy you goin born too!

⁴³But why dis good ting happen to me, dat you wen come by me, an you goin be my Boss mudda?!

⁴⁴Cuz wen I hear you say ‘Aloha,’ right den an dea da baby inside me wen huli cuz he stay good inside.

⁴⁵Da Boss stay do plenny good stuff fo you, cuz you stay shua dat da ting he say, goin happen.

⁴⁶Mary wen say, “My heart say good tings bout da Boss Up Dea Inside Da Sky,

⁴⁷My spirit stay good inside Cuz God take me outa da bad kine stuff I stay in,

⁴⁸Cuz he wen tink bout me, his poor worka! From now on all da peopo goin say God wen do plenny good stuffs fo me,

⁴⁹Cuz God get power An wen do plenny importan tings fo me. He stay spesho an good, dass wat kine God him.

⁵⁰He give da peopo chance dat show respeck fo him, From da granfaddas to da kids.

⁵¹He stay show his power An stay make da peopo wit big head so dey no can do All da stuff dey like do.

⁵²He stay pull down plenny big kings from dea thrones, An he stay make da peopo dat no mo notting importan.

⁵³He stay give da hungry peopo good stuff fo eat, An he stay send away da rich guys wit notting.

⁵⁴He stay help da Israel peopo dat work fo him. He no foget fo give dem chance,

⁵⁵Jalike he wen tell our ancesta guys, Abraham, an his ohana, foeva.”

⁵⁶Mary wen stay dea wit Elizabet three months, an den she wen go home.

⁵⁷Da time wen come fo Elizabet fo born her baby, an she wen born her boy.

⁵⁸Da peopo from ova dea an her ohana wen hear how plenny da Boss wen do cuz he get pity fo her, an dey all wen come real good inside wit her.

⁵⁹One week lata dey wen come fo cut da baby skin. Dey wen tink dey goin name him Zekariah jalike his fadda.

⁶⁰But his mudda say, “No way! We goin name him ‘John.’-”

⁶¹Dey tell her, “But you no mo nobody in yoa ohana wit dat name!”

⁶²Den dey wen make signs wit dea hands to his fadda, an wen aks him wat he like name da boy.

⁶³Zekariah wen aks fo one paper an wen write down, “He get da name ‘John.’-” An dea jaws wen drop!

⁶⁴Right den an dea Zekariah wen start fo talk an say good tings bout God.

⁶⁵Da peopo from ova dea wen come scared. An everybody wen tell dis story all ova da place in da hills Judea side.

⁶⁶Everybody dat wen hear dat story wen tink plenny, an say, “Wat kine kid dis goin be?” An God's power stay wit him.

⁶⁷Da time God's Spesho Spirit wen take ova John's fadda Zekariah, he wen tell stuff from God, lidis:

⁶⁸“Tell good tings bout da Boss Up Dea Inside Da Sky, Da God fo da Israel peopo! He wen come fo cut loose his peopo So dey no gotta be jalike slaves no moa.

⁶⁹He give us one Guy dat get power Fo take us outa da bad kine stuff we stay in. Dat Guy come from King David's ohana, Da king dat wen work fo God.

⁷⁰From befo time da spesho guys dat wen talk fo God Wen tell dis,

⁷¹He wen promise fo take us away from da guys dat stay agains us An from da power dey get.

⁷²He wen say he goin give our ancesta guys chance, An he no goin foget da spesho deal he wen make.

⁷³He wen promise our ancesta Abraham fo shua

⁷⁴Dat he goin take us away from da guys dat stay agains us, An from da power dey get, He goin help us work fo him an no be scared,

⁷⁵So we can come spesho an right da way he see us All da days we stay alive.

⁷⁶An you, my boy John, dey goin call you One guy dat talk fo da God Dass Mo Importan Den All Da Odda Gods, Cuz you goin go first, befo da Boss, Fo make da road ready fo him,

⁷⁷Fo make da peopo know Dat he goin take dem outa da bad kine stuff dey stay doing, An he goin let um go an hemo dea shame from dat.

⁷⁸Our God give chance cuz he get big heart. Dass why da new day goin come up fo us from God in da sky.

⁷⁹So da peopo dat stay do bad kine stuff, Jalike dey stay live inside da dark an no can see notting, An dey goin mahke inside, God goin help dem fo know da trut. Den we goin see da right way An den our heart goin rest inside.”

⁸⁰Da boy John wen grow up, an his spirit wen come strong. He wen live inside da boonies till da day wen he wen come out an da Israel peopo wen see him.