Read Hawaii Pidgin Luke 13 Bible Online

Luke 13 - Hawaii Pidgin bible

Luke 13

¹Dat time some peopo stay dea, an tell Jesus bout da peopo from Galilee dat Pilate's army guys wen kill, same time dose peopo making sacrifice inside da temple.

²Jesus say, “You tink dem guys from Galilee wen do mo worse stuff den all da odda peopo from Galilee cuz dey wen suffa lidat?

³I telling you, no way! But if you guys no come sorry fo all da bad kine stuff you wen do, an pau do um, all you guys goin mahke too.

⁴Da eighteen guys dat wen mahke wen da tower Siloam side wen fall down on top um -- you tink dey wen do mo worse stuff den all da odda peopo inside Jerusalem?

⁵I telling you, no way! But if you guys no come sorry fo all da bad kine stuff you wen do, an pau do um, all you guys goin mahke too.”

⁶Jesus wen tell um dis story fo teach um. “Had one guy dat wen get one fig tree dat stay growing inside his grape field. He go fo look if get fruit on um, but no mo fruit.

⁷So he wen tell da worka guy dat take care da field, ‘Three years now I stay come fo look if get fruit on dis fig tree, an no mo fig! Cut um down, fo no use up da dirt!’

⁸But da worka guy say, ‘Boss, leave um one mo year. I goin dig one ditch aroun um, an put fertiliza inside da ditch.

⁹If da tree give fruit nex year, dass good! If no give fruit, den cut um down!’-”

¹⁰One Rest Day Jesus stay teaching inside one Jewish church.

¹¹One wahine stay dea dat no can walk good. One bad kine spirit wen make her lidat eighteen years befo. She was bent ova an no can stand up strait.

¹²Jesus spock her, an tell her, “Sista, I make you come good from all yoa sick!”

¹³Den he put his hands on top her, an right den an dea she wen stand up strait an tell how awesome God stay.

¹⁴Da main leada guy fo da Jewish church wen come huhu cuz Jesus wen make her come good on da Rest Day. So, he tell all da peopo, “Get six days fo work. So, come let um make you come good on dem days, an not on da Rest Day!”

¹⁵Da Boss Jesus wen tell um, “You guys say one ting an do anodda! Every one a you guys hemo his cow o his donkey from da fence an lead um out fo get water on da Rest Day.

¹⁶But dis wahine from Abraham's ohana, da Devil wen make her so she no can walk good fo eighteen years. You no tink dass okay fo hemo her from da sick dat wen make her no can walk, an do um on da Rest Day too, o wat?”

¹⁷Wat he say, wen make all da guys dat stay agains him come shame. But da peopo stay good inside cuz a all da awesome stuff he wen do.

¹⁸Jesus wen tell, “Wat you tink stay like, wen God stay King? Wat story I can tell you guys fo make um mo clear?

¹⁹Start small, den come big. Dass jalike one small mustard seed. One guy take um an plant um inside his yard. Da small seed grow up, an come one big bush, an da birds come down outa da sky an make house inside da branches.”

²⁰An Jesus tell, “Wat you tink stay like, wen God stay King?

²¹Make everyting come diffren, yeah? Dass jalike da yeast. One wahine take um an put um inside one big bowl wit flour. Bumbye da whole bread come diffren cuz a da yeast.”

²²Jesus wen go thru da big an small towns, an teach. He stay going Jerusalem.

²³One guy wen aks him, “Boss, ony litto bit peopo goin come outa da bad kine stuff dey stay in, yeah?” Jesus tell him,

²⁴“Make shua you try hard fo get God fo yoa King! You know, dass jalike you go inside one place thru one skinny door. Plenny peopo goin try fo go inside dea, but dey no can.

²⁵Jalike da house owna goin pau eat, he go lock da door fo go sleep. Den you guys goin stand outside an start fo knock da door an say, ‘Eh Boss, open da door fo us!’ But he goin tell you guys, ‘I donno who you guys o wea you guys come from!’

²⁶Den you guys goin say, ‘Eh! Us guys wen eat an drink wit you, an you wen teach us wen you was walking down our street.’

²⁷He goin say one mo time, ‘I donno who you guys o wea you guys come from! Get outa hea, all you guys dat no do wass right!’

²⁸You guys, you goin see Abraham, Isaac, an Jacob, an all da guys dat wen talk fo God, an dey goin stay dea wit God da King, but he goin throw you guys outside. Den you guys goin cry an grind yoa teet cuz you so mad an futless.

²⁹Da peopo goin come from mauka side an makai side an all ova an dey goin sit an party wit God da King.

³⁰An you know wat? Get guys dat peopo tink dey not importan now, an dey goin be da mos importan guys wen God stay King. Get odda guys dat peopo tink dey importan now, but dey no goin be importan wen God stay King.”

³¹Dat time, had some Pharisee guys dat wen come by Jesus an tell him. “You betta get outa hea, an go anodda place, cuz King Herod like kill you, you know.”

³²Jesus say, “Go tell dat bugga dat I say, ‘I make da bad kine spirits let go da peopo, an I make da peopo come good today an tomorrow, an day numba three, my work goin pau.’

³³But I still gotta go today an tomorrow an da nex day, till I get to Jerusalem. You know, befo time da Jewish peopo wen kill da guys dat wen talk fo God, an Jerusalem was da place dey wen kill um.

³⁴Auwe! You peopo inside Jerusalem! You wen throw rocks an kill da guys dat wen talk fo God befo time. Plenny times I wen like bring all yoa kids togedda, jalike one mudda hen bring togedda her chicks unda her wings, but you guys no like come by me!

³⁵Auwe! Everyting all poho fo you guys awready! I tell you guys, you no goin see me again till bumbye wen you guys say, ‘Dis da Guy dat come fo da Boss Up Dea In Da Sky, an we like God do good tings fo him!’-”