Read Hawaii Pidgin Luke 14 Bible Online

Luke 14 - Hawaii Pidgin bible

Luke 14

¹One Rest Day, one Pharisee guy wen tell Jesus fo come his house fo eat. He one main leada fo da Pharisee guys. An da Pharisee guys an da guys dat teach God's Rules wen watch Jesus real good.

²Had one sick guy dat show up ova dea in front Jesus. He get da kine sick dat make da arms an da legs come fat.

³Jesus wen aks da Pharisee guys an da guys dat teach God's Rules, “You tink da Rules say dass good fo make one guy come good on da Rest Day, o wat?”

⁴But dey neva say notting. So he wen take da sick guy, an make um come good, an tell um fo go.

⁵Den he tell dem, “If da Rest Day, an one a you guys get one boy o one cow dat fall down inside one deep water hole, you goin pull um out right away, o wat? No matta da Rest Day, yeah?”

⁶But dey no can say notting.

⁷Jesus see dat befo dey eat, some guys ova dea wen pick da main places by da table. So he tell um dis fo teach um:

⁸He say, “Wen somebody tell you fo come da wedding lu`au, no go sit down by da place fo da spesho wedding guys. You do dat, an den one guy mo importan den you goin come.

⁹Den da boss fo da lu`au dat wen tell him an you fo come, he goin tell you, ‘Give dis guy yoa place.’ Den you goin come shame, an take da place fo da guy dass not importan.

¹⁰Mo betta, wen dey tell you fo come, go take da place fo da guy dass not importan. Den wen da boss fo da lu`au come, he goin tell you, ‘My friend, ova hea mo betta.’ Den everybody dea goin get respeck fo you cuz a dat.

¹¹Cuz whoeva make himself importan, no goin be importan, an whoeva make himself not importan, goin be importan.”

¹²Den Jesus tell da guy dat wen tell um fo come his place fo eat, “Wen you make one lunch o one dinna, no tell yoa friends, o yoa bruddas, o yoa ohana, o da rich guys nex door fo come. You do dat, an bumbye dey goin tell you fo come dea house, an dat goin pay you back fo wat you wen do.

¹³Mo betta, wen you make one lu`au, tell da guys dat no mo notting fo come, da guys dat no can move, da guys dat no can walk, an da guys dat no can see.

¹⁴Den you goin stay good inside. Cuz dem guys no can pay you back bumbye. But God, he goin give you back someting good fo wat you wen do, wen da peopo dat wen do da right tings come back alive.”

¹⁵One guy dat stay sitting at da table wen hear dat, an he tell Jesus, “Fo shua, da guys dat goin sit down at God's table wen he come King, dey can stay good inside!”

¹⁶Jesus tell, “You wen hear da story bout da guy dat wen make one big lu`au? He aks plenny peopo fo come.

¹⁷Bumbye he send his worka guy fo tell da peopo, ‘Come on! Everyting stay ready!’

¹⁸But dey all wen start fo make up story. Da first guy wen tell da worka guy, ‘I jus wen buy one field, an I gotta go look um. Sorry.’

¹⁹Anodda guy say, ‘I jus wen buy ten cows fo plow, an I goin go see if dey strong nuff fo work. Sorry.’

²⁰Anodda guy say, ‘I jus wen get married, so I no can go wit you.’

²¹Da worka guy go tell his boss. Da boss fo da house wen come huhu, an tell da worka guy, ‘Hurry up! Go out by da big an small roads inside town, an bring back da guys dat no mo notting, da guys dat no can move, da guys dat no can see, an da guys dat no can walk.’

²²Bumbye da worka guy come an say, ‘We wen do wat you wen say, an still yet get room.’

²³Da boss tell da worka guy, ‘Go out by da big an small roads in da country side an make da peopo come in, so my house can come full.

²⁴I telling you now, da peopo I wen tell first, not one a dem goin taste my lu`au food.’-”

²⁵Plenny peopo wen go wit Jesus. He turn aroun to dem, an say,

²⁶“Whoeva come by me, an get love an aloha fo dea fadda an mudda, dea wife an kids, dea bruddas an sistas -- an even fo demself too, mo den dey get love an aloha fo me, dey no can be my guy.

²⁷Whoeva no like suffa fo me, o even mahke on top one cross, dey no can be my guy.

²⁸“If one a you guys tink you goin make one tower, you betta sit down first an figga out how much goin cost, fo know if you get nuff money fo finish da tower, yeah?

²⁹If you no do dat, you goin make da foundation, an den you no can make da rest. Den everybody goin bus laugh at you.

³⁰Dey goin say, ‘Dis guy wen start fo make litto bit, an he no can finish da job.’

³¹“If one king going out wit ten tousand army guys fo fight anodda king, an da odda king come agains um wit twenty tousand army guys, da guy wit ony ten tousand army guys goin sit down first an figga if him an his guys strong nuff fo fight da odda king an his guys, yeah?

³²If he not strong nuff, he goin send talka guys fo meet da odda king wen he still stay far away, an dey goin talk so dey no fight.”

³³Jesus say, “Same ting. You guys no can be my guys if you no give up everyting you get.”

³⁴“Salt stay good. But if da salt no mo taste, no way you can make um work like salt again.

³⁵Dat kine salt no good fo even da dirt o da manure pile. Ony ting can do, throw um away. If you hear dis, you betta lissen!”