Read Hawaii Pidgin Luke 19 Bible Online

Luke 19 - Hawaii Pidgin bible

Luke 19

¹Jesus wen go inside Jericho an stay go pass right thru da town an neva stop.

²Ova dea get one boss fo da guys dat collect money fo tax fo da govermen, name Zaccheus. He one rich guy.

³Zaccheus like see wat Jesus look like, but he no can see um, cuz he short, an get plenny odda peopo dat like see Jesus too.

⁴So he run in front, climb one fig tree fo see um, cuz Jesus goin go by dat place.

⁵Wen Jesus go by dea, he look up an tell Zaccheus, “Come down now, Zaccheus. I gotta stay yoa house today.”

⁶So Zaccheus come down real fast, an take him inside his house. He stay feel real good inside.

⁷All da peopo see dat, an start fo squawk. Dey say, “Jesus wen go inside da house a dat guy dat get bad name!”

⁸Zaccheus stand up an tell da Boss, “Look, Boss! I goin give half a my stuffs to da peopo dat no mo notting, an whoeva I wen rip off, I goin pay um back four times moa den wat I wen get.”

⁹Jesus tell um, “Da guy dat own dis house, he from Abraham's ohana. Today God take him outa all da bad kine stuff he doing.

¹⁰Cuz me, da Guy Dass Fo Real, I wen come hea fo look fo da guys dat stay cut off from God, fo take um outa da bad kine stuff dey doing.”

¹¹Da peopo hear wat Jesus wen say. Den Jesus tell um anodda story, cuz he stay near Jerusalem, an da peopo tink dat God goin come King right away ova dea.

¹²Jesus tell, “Had one ali`i dat wen go one far place fo come king an den come back.

¹³Befo he go, he tell ten worka guys fo come. He give every guy one gold coin. He say, ‘Go use dis coin fo make money till I come back.’

¹⁴But da peopo hate da ali`i guy, an dey send guys to da odda place fo say, ‘We no like dis guy fo be our king.’

¹⁵But da ali`i wen come king. Den he come back. He tell his worka guys fo come by him, da guys he wen give da money. He like find out how plenny money dey wen make.

¹⁶Da first guy come an he say, ‘I wen get ten mo gold coins from da one you wen give me.’

¹⁷Da king tell him, ‘You wen do good. You one good worka. Cuz you wen show I can trus you wit da small kine stuff, you goin take charge a ten towns.’

¹⁸Da nex guy come an he say, ‘Boss, I wen get five mo gold coins from da one you wen give me.’

¹⁹Da king tell him, ‘You goin take charge a five towns.’

²⁰Den anodda worka guy come an he say, ‘Boss, hea yoa gold coin. I wen go hide um inside one cloth.

²¹I scared you, cuz you one hard guy. You take wat not yoas, an you cut da crop dat you neva plant.’

²²Da boss tell, ‘Auwe! I goin make like one judge. Wat you wen say show you one bad worka! You know I one hard guy. I take wat not mines, an I cut da crop dat I neva plant.

²³How come you neva put my money inside da bank, so dat wen I come back I can get my money an mo too?

²⁴Den he tell da guys dat standing dea, ‘Eh, take away dis guy's gold coin from um, an give um to da guy dat get ten coins.’

²⁵Dey say, ‘Az not fair, Boss! Dat guy get ten coins awready!’

²⁶Da king say, ‘I telling you, whoeva get stuff, dey goin get mo plenny, but whoeva no mo notting, dey goin lose even da litto bit dey get.

²⁷Da guys dat stay agains me an no like me fo be dea king -- bring um ova hea, an kill um in front me.’-”

²⁸Jesus say dat, an den he go Jerusalem in front da peopo.

²⁹Wen he come near Betpage an Betany, by Olive Ridge, he send two a his guys in front, an tell um,

³⁰“Go by da small town ova dea, an wen you go inside um, you goin find one young donkey stay tie to da fence, dat nobody wen ride um yet. Hemo da rope from da fence an bring um ova hea.

³¹If somebody aks you guys, ‘Eh, how come you hemo um from da fence?’ tell him, ‘Da Boss need um.’-”

³²Da guys go, an find um jalike he wen say.

³³Wen dey hemo da rope from da fence fo da young donkey, da ownas say, “How come you hemo um from da fence?”

³⁴Dey tell, “Da Boss need um.”

³⁵Dey bring da young donkey by Jesus, an put dea coats on top da donkey, an put Jesus on top.

³⁶Jesus ride down da road. Da peopo put down dea coats on top da road jalike fo one king.

³⁷Wen he come near da place wea da road come down from Olive Ridge, all da peopo wen start fo feel good inside an yell good stuff bout God, cuz a all da awesome stuff dey wen see dat show Jesus power.

³⁸Dey say, “God goin do plenny good kine stuff fo dis guy! He da King dat come fo da Boss Up Dea! Everyting stay good wit God an da peopo. God in da sky, he awesome!”

³⁹Den some Pharisee guys from da peopo tell Jesus, “Teacha, scold yoa guys! Not good, wat dey saying!”

⁴⁰Jesus say, “I telling you, if dey shut up, even da stones goin yell same ting.”

⁴¹Jesus come near Jerusalem an look da town, an he cry.

⁴²He say, “You guys inside Jerusalem, if ony you guys wen know today wat can make you guys stay good wit God an come his friends -- but now you guys no can undastan.

⁴³Da time goin come wen da guys dat stay agains you guys goin pile up dirt all aroun yoa town fo make you guys stay inside.

⁴⁴Dey goin wipe out you guys, you an yoa kids inside dea. Dey no goin let one stone stay on top da odda. Cuz you guys neva like know wen God show up fo take you guys outa da bad kine stuff you doing.”

⁴⁵Den Jesus wen reach Jerusalem. He go inside da temple yard, an start fo throw out da guys dat was selling stuff inside dea.

⁴⁶He say, “Da Bible say, ‘My temple goin be one house fo pray inside.’ But you guys stay make um jalike one hangout fo crooks!”

⁴⁷From den, every day Jesus teach inside da temple yard. Da main pries guys, da teachas dat teach God's Rules, an da leadas fo da peopo wen like kill um,

⁴⁸but dey neva find out how fo do um, cuz all da peopo like hear everyting he say.