Read Hawaii Pidgin Luke 20 Bible Online

Luke 20 - Hawaii Pidgin bible

Luke 20

¹One time Jesus go inside da temple yard, an teach da peopo da Good Stuff From God. Da main pries guys, da teachas dat teach God's Rules, an da older leadas fo da peopo go by him.

²Dey aks him, “Wat right you get fo do dis kine stuff? Who say you can do um?”

³Jesus tell um, “I like aks you guys someting too.

⁴John Da Baptiza, wen he wen baptize da peopo, wea he get da right fo do dat? God in da sky, he give um da right? O da peopo, dey give um da right?”

⁵Da main pries dem start fo squawk wit each odda bout dat, an tell, “If we say, ‘Was God in da sky wen give John da right,’ den Jesus goin say, ‘How come you guys neva believe wat John wen say, den?’

⁶But if we say, ‘Da peopo give um da right,’ den all da peopo goin throw stones fo kill us, cuz dey tink fo shua dat John wen talk fo God.”

⁷So da main pries dem tell, “We donno wea John wen get da right fo baptize.”

⁸Jesus tell um, “Kay den, I no goin tell you guys from wea I get da right fo do dis kine stuff.”

⁹Jesus tell da peopo anodda story fo teach um. He say, “One guy wen plant grapes inside one grape farm, an he rent um to some farma guys. Den he go way long time.

¹⁰Wen da time come fo cut da grapes, he send one worka guy by da guys dat rent his farm, so dey can give him some grapes. But da guys dat rent da farm bus up da worka guy an send um away wit notting.

¹¹He send anodda worka guy, an dey bus him up too, an dey no shame fo make any kine to him, an send um away wit notting.

¹²Den he send one nodda guy. Dey bus him up an make um bleed, an throw um outside.

¹³Den da boss fo da grape farm say, ‘Wat I goin do? Eh, I know wat! I goin send my ony boy, da one I love. Fo shua, dey goin show respeck fo him!’

¹⁴But wen da guys dat rent da farm spock him, dey tell each odda, ‘Eh, dis da owna's boy. He da guy goin own da farm bumbye. Come, we go kill him. Den everyting he get goin come ours!’

¹⁵So dey throw him outside da grape farm an kill him.” Den Jesus say, “Wat you guys tink da guy dat own da grape farm goin do to da guys dat rent da farm?

¹⁶He goin come wipe um out, an rent da grape farm to odda guys.” Wen da peopo hear dat, dey say, “Nah! Da owna no goin wipe um out!”

¹⁷Jesus look dem in da eye an say, “Den wat dat mean inside da Bible dat say, ‘Had one big stone, Da builda guys neva like use um, An dey no take um. But dat stone, Dass da corner block Dat make da building strong.’

¹⁸Anybody dat trip an fall down on top dat stone, dat stone goin broke dem. If dat stone fall down on top somebody, dat stone goin make um jalike dust. An dat stone, dass me, you know.”

¹⁹Da teachas dat teach God's Rules an da main pries guys wen like bus Jesus right den an dea, cuz dey know dat he tell dat story fo teach bout dem. But dey scared da peopo.

²⁰So dey look fo da right time fo do um. Dey send some guys fo watch him. Dem guys wen ack like dey good guys. Dey like trick Jesus wit wat he say, so dey can turn him ova to da leada guys an to da governa who get power.

²¹So da guys dat stay watching him tell him, “Eh, Teacha, we know dat you talk strait an wat you say an teach stay true. You do da same to everybody, an you teach God's way fo real kine.

²²So, wat? We still gotta pay tax to Cesar, da king fo da Rome peopo, o wat?”

²³But Jesus know dey smart an trying fo trick him, so he tell um,

²⁴“Show me one coin. Who dis guy on top da coin? An wass his name?”

²⁵Dey say, “Dass King Cesar.” Jesus say, “Kay den, give um to Cesar wat his, an give to God wat his!”

²⁶Dey no can trick him wit wat he say in front da peopo. Wat he say blow dea minds, an dey no say notting.

²⁷Now, da Sadducee guys, dey say nobody can come back alive afta he mahke. Some a dem Sadducee guys wen come by Jesus an aks him,

²⁸“Eh, Teacha, Moses wen write fo us inside da Bible, dat if one guy's brudda mahke an his wife stay, but no mo kids, da mahke guy's brudda gotta marry da widow an get kids fo his brudda.

²⁹Now, had seven bruddas. Da first brudda wen marry one wahine an den mahke, an no mo kids.

³⁰Da numba two brudda marry her, an mahke, an no mo kids.

³¹An da numba three brudda same ting, an da oddas too, an no mo kids.

³²Den afta dat, da wahine mahke too.

³³So, dey all wen marry her. Bumbye, wen da time come wen all da peopo dat wen mahke goin come back alive, dat time, who goin be her husban?”

³⁴Jesus tell um, “Da peopo in dis time marry an give dea girls fo marry.

³⁵But God say some peopo get um right wit him. Dey da ones, he goin make um come back alive inside da nex world, an give um da kine life dat stay to da max foeva. Dat time dem guys no goin marry o give dea girls fo marry.

³⁶Dat time dey no can mahke, but dey goin stay jalike da angel guys. Cuz dey God's kids, an dey goin come back alive.

³⁷Now, long time ago, wen Moses wen spock one bush dat stay burning, he wen talk to God ova dea. Moses wen use dis name fo da Boss Up Dea Inside Da Sky -- he call um ‘Da God fo Abraham, Isaac, an Jacob.’ So Moses wen show dat da mahke peopo goin come back alive.

³⁸Cuz God not da God fo da mahke peopo, but fo da peopo dat stay alive. Cuz everybody dat stay tight wit God, dey alive!”

³⁹Some teachas dat teach God's Rules wen say, “Dass good wat you say, Teacha!”

⁴⁰An nobody aks him mo stuff.

⁴¹Jesus aks da teachas dat teach God's Rules, “How come dey say dat da Spesho Guy God Send, he David's boy?

⁴²David, he tell inside da Song Book, Da Boss Up Dea Inside Da Sky, He tell my Boss, ‘Come ova hea, sit down! Dis da importan place by my right side.

⁴³Bumbye I goin make da peopo dat go agains you Go down in front you, Fo show dat you da winna ova dem.’

⁴⁴Kay den, David call him ‘My Boss,’ yeah? Den how come he can be David's boy, same time?”

⁴⁵Da peopo stay lissen to Jesus, an he tell his guys,

⁴⁶“Watch out fo da teacha guys dat teach God's Rules. Dey like go aroun an wear fancy kine religious kine clotheses. Dey like da peopo fo talk to dem wit respeck inside da market. Dey like sit in da main place inside da Jewish churches, an da main place at da lu`aus.

⁴⁷But dey no shame fo rip off da widows an take away dea houses. Same time dey make big show an pray long time, ony fo make peopo tink dey do good kine stuff fo dem. Dese kine peopo, dey goin get it mo worse from God da Judge wen da time come!”