Read Hawaii Pidgin Luke 21 Bible Online

Luke 21 - Hawaii Pidgin bible

Luke 21

¹Jesus wen look up an spock da rich guys putting dea money inside da money box inside da temple.

²Den he spock one widow dat no mo notting. She put two small copper coins inside dea.

³He say, “I tell you guys da trut: Dis widow dat no mo notting, she wen put in mo plenny money den all da odda peopo.

⁴All da odda peopo wen give dea money from plenny money dey get. But her no mo notting, an she wen give God da ony money she get fo stay alive.”

⁵Some a his guys wen talk story bout da temple, how da temple get da awesome stones an da odda tings da peopo wen give fo God. Jesus say,

⁶“You guys see all dis stuff? Bumbye no goin get one stone on top da odda. Peopo goin throw um all down.”

⁷Jesus guys wen aks him, “Teacha, wat time all dat kine stuff goin happen? An wat kine ting goin happen fo show us wen da time come fo dat?”

⁸Jesus tell um, “Watch out! No let nobody fool you guys! Plenny guys goin show up an use my name. Dey goin say, ‘Eh me, I dat Spesho Christ Guy from God! Da time stay now!’ But no go wit dem.

⁹You guys goin hear, ‘Dey fighting an get war all ova da place.’ No bum out. All dat kine stuff gotta happen, but dat no mean everyting goin pau yet.”

¹⁰He say, “Countries goin fight each odda. Kings goin fight each odda.

¹¹Da groun goin shake. No goin get food, an all ova da place da peopo no goin get notting fo eat. Plenny peopo goin get real sick an mahke. Real bad an awesome stuff goin come dat goin scare plenny peopo. Unreal stuff from da sky goin come.

¹²“Befo all dat stuff come, peopo goin bus you guys an make you guys suffa. Dey goin turn you guys ova to da Jewish churches an throw you guys inside jail. Dey goin take you guys in front kings an governas. Dey goin do all dat cuz you my guys.

¹³Den you guys goin get chance fo tell dem da Good Stuff From God.

¹⁴“But befo dat happen, tink lidis: You guys no need worry wat you goin say.

¹⁵Cuz I goin give you guys wat fo say, an I goin make you guys akamai, so da guys dat stand up agains you no goin know wat fo say, an dey no goin show proof dat you guys wen do wrong.

¹⁶“Even yoa fadda an mudda goin set you guys up. Yoa bruddas, yoa ohana, an yoa friends goin set you guys up too, an dey even goin kill some a you guys.

¹⁷Everybody goin hate you guys cuz dey know you my guys.

¹⁸But dey no goin hurt you guys. You guys no goin lose even one hair from yoa head!

¹⁹If you guys hang in dea to da end, you guys goin get da kine life dass fo real!”

²⁰Wen you guys see Jerusalem town wit da armies all aroun dea, you goin know dat da time stay near wen dey goin bus up Jerusalem.

²¹Den da peopo dat stay Judea side gotta run to da mountains. Da guys inside Jerusalem town gotta get out, an da guys inside da boonies betta not go back to da town.

²²Cuz da time stay dat dey gotta suffa plenny, jalike da Bible say.

²³Goin be hard time fo da hapai wahines an da muddas dat stay nursing dea babies! Everybody in da land goin suffa plenny, cuz God no take da bad kine stuff da peopo wen do.

²⁴Peopo goin kill some wit swords, an take oddas away. Peopo all ova da world goin make um prisonas. Da peopos dat not Jews goin bus up Jerusalem an walk all ova um, till dea time pau.”

²⁵Goin get awesome stuff fo see up inside da sky, wit da sun, da moon, an da stars. All ova da world, da peopos from inside da diffren countries goin suffa plenny. Dey goin come all bum out, jalike peopo feel wen da ocean pound loud an da waves come wild.

²⁶Da peopo goin pass out cuz dey so scared. Dey scared cuz dey donno wat goin happen inside da world. Da big powers inside da sky like da stars goin get shake up.

²⁷Dat time dey goin spock me, da Guy Dass Fo Real, coming inside one cloud wit big power, an I goin be real awesome.

²⁸Wen all dat stuff start fo happen, stand up tall an look up, cuz da time stay near fo God cut you guys loose from da power da bad kine stuff get ova you.”

²⁹Jesus tell um anodda story fo teach um. He say, “Look da fig tree an every kine tree.

³⁰Wen get new leaf, you can see um, an you know da summa time almos come.

³¹Same ting. Wen you guys see all dis stuff happen, den you goin know dat God stay King hea now.

³²“Dass right! An I tell you guys dis too: All dat stuff goin happen befo all da guys dat stay alive nowdays goin mahke.

³³Da sky an da earth goin pau, but wat I say no goin pau foeva.”

³⁴“Watch out! No good you guys come all jam up wit too much partying, getting drunk, an worry bout all kine stuff. No good da Boss come back, an you guys not ready.

³⁵Quick like one trap dat day goin come fo all da peopo dat stay inside da whole world.

³⁶Watch out everytime, an stay ready. Aks God fo let you get outa all da stuff dat goin happen, an fo let you stand in front me, da Guy Dass Fo Real.”

³⁷Every day Jesus wen teach inside da temple yard. Wen da sun go down, he wen go outside da town fo stay on top Olive Ridge.

³⁸An real early in da morning da peopo come fo hear him teach inside da temple yard.