Read Hawaii Pidgin Luke 23 Bible Online

Luke 23 - Hawaii Pidgin bible

Luke 23

¹Den all da peopo dat wen come togedda take Jesus away fo go in front Pilate, da governa.

²Dey poin finga Jesus, an say, “Dis guy stay bulai our peopo! He teaching dem bad kine stuff! He say dey no need pay King Cesar his tax. He say dat he da Christ guy, da Spesho Guy God Wen Send, an dat he one king.”

³Pilate aks Jesus, “Eh, you da king fo da Jews, o wat?” Jesus say, “Dass right, wat you wen say.”

⁴Den Pilate tell da main pries guys an all da peopo, “I no find notting wrong wit dis guy.”

⁵But dey say mo strong, “All ova Judea da peopo like beef cuz a da stuff he teaching. He wen start Galilee side. Now, he stay come all da way ova hea.”

⁶Pilate hear dat, an he aks Jesus, “You come from Galilee?”

⁷Wen Pilate find out dat Jesus come from Galilee, he tell his guys fo take Jesus by Herod. Cuz Herod da one dat stay in charge inside Galilee, an he stay Jerusalem town dat time.

⁸Herod, he feel good inside wen he spock Jesus, cuz Herod wen hear bout him an like see him from long time. Herod tink maybe Jesus goin do someting awesome so he can see um.

⁹Herod aks Jesus plenny stuff, but Jesus neva say notting.

¹⁰Da main pries guys an da teachas dat teach God's Rules stay dea. Dey poin finga at Jesus real hard.

¹¹Den Herod an his army guys make fun a Jesus, an show dat dey hate him. Dey put one fancy robe on top him, an send him back to Pilate.

¹²Dass how Herod an Pilate wen come friends. Befo dat time dey stay agains each odda.

¹³Den Pilate tell da main pries guys, da leada guys, an da peopo fo come.

¹⁴He tell um, “You guys wen bring dis guy by me, an you say he trying fo make da peopo beef agains us Rome guys. I wen aks him plenny stuff in front you, an I no find notting wrong like you guys say, fo poin finga him.

¹⁵An Herod, he neva find notting fo poin finga him too. He wen send him back. You guys know he neva do notting dat say he gotta mahke.

¹⁶So, I goin tell my army guys fo go whip um an let um go.”

¹⁷[Now, every year, da Passova spesho religious time, Pilate gotta let one prisona guy go fo da peopo.]

¹⁸All da peopo was yelling, “Kill Jesus! Let Barabbas go fo us!”

¹⁹You know, da Rome army guys wen throw Barabbas inside jail befo, cuz he lead some a da peopo an dey try fo throw out da leada guys inside Jerusalem. Barabbas even wen kill one guy.

²⁰Pilate like let Jesus go, so he aks da peopo one mo time.

²¹But dey yelling, “Kill Jesus on top one cross! Kill um on top one cross!”

²²One mo time he tell dem, “How come? Wat kine crime dis guy wen do? I no find notting dat say he gotta mahke. So I goin tell my army guys fo whip him an let him go.”

²³But dey stay yelling da top a dea lungs, fo presha Pilate an make um kill Jesus on top one cross, an dey win.

²⁴So Pilate say dat Jesus gotta mahke, jalike da peopo say.

²⁵He let Barabbas go, da guy dey pick, dat wen make da peopo beef an wen kill one guy. An he give Jesus to dem so dey can do wat dey like to him.

²⁶Den dey take Jesus away. One guy name Simon from Cyrene stay coming from da countryside. Da army guys wen grab him, put da cross on top him, an make him carry um behind Jesus.

²⁷Plenny peopo walking behind Jesus, an some wahines crying. Dey real sad inside cuz a wat happening.

²⁸Jesus turn an tell um, “Sistas from Jerusalem, no cry fo me. Cry fo yoaself an fo yoa kids.

²⁹Cuz da time goin come wen you goin say, ‘Lucky now, da wahines dat no mo kids, da wahines dat neva born kids, an da wahines dat neva nurse kids!’

³⁰Dat time da peopo goin tell da mountains, ‘Fall down on top us!’ An dey goin tell da hills, ‘Hide us!’

³¹Cuz if dey doing dis kine stuff to one good guy like me, wat goin happen to da peopo dat not good?”

³²Dey take two crook guys wit him. Dey goin kill dem wit Jesus.

³³Dey come to da place name “Da Skull.” Dey hang Jesus on top da cross fo kill him dea. Dey hang da two crook guys on top da odda two crosses, one on da right side an da odda on da left side.

³⁴Jesus say, “Fadda, let um go fo dis bad ting dey doing. Dey donno wat dey doing!” Da army guys throw dice fo take Jesus clotheses.

³⁵Da peopo stand dea an watch um. Da leada guys fo da Jews make fun a him. Dey say, “Eh, he wen take da odda guys outa da bad kine stuff dey stay in. If he da Spesho Guy God Wen Send fo real kine, how come he no can get himself outa dis now?!”

³⁶Da army guys make fun a him too. Dey come by him an like give him da cheap kine wine fo drink.

³⁷Dey say, “Eh, if you da king fo da Jews, get yoaself outa dis, den!

³⁸Den dey write, “Dis da King Fo Da Jews,” an put um on top da cross.

³⁹One crook guy dat hanging dea talk any kine to him. He say, “Eh, you da Spesho Guy God Wen Send, o wat? Den get yoaself outa dis, an us guys too!”

⁴⁰But da odda crook guy scold him, an say, “Eh, you no scared God, o wat? Dey wen say you gotta mahke, too, jalike him.

⁴¹Us guys get da pay fo wat we wen do, but dis guy, he neva do notting wrong.”

⁴²An he tell Jesus, “Jesus, rememba me wen you come King!”

⁴³Jesus tell him, “Eh, you get um! An I tell you dis: Today you goin be wit me inside God's Beautiful Place.”

⁴⁴Now was bout noon time, an come real dark all ova da place, till three clock,

⁴⁵cuz da sun pau shine. Da big curtain inside da temple wen broke in two.

⁴⁶Jesus wen yell real loud. He say, “Fadda, I give you my spirit.” Wen he say dat, he mahke.

⁴⁷Da captain fo da army guys see wat happen, an he say good stuff bout God. He say, “Fo shua, dis guy neva do notting wrong! How come dey wen kill him?”

⁴⁸Da peopo dat wen come dea fo see wat goin happen see dat, an dey pound dea chests, fo show dat dey know someting real bad wen happen. Den dey go home.

⁴⁹All da guys dat wen know Jesus, an da wahines dat wen come dea wit him all da way from Galilee side, dey standing far away, watching all da stuff dat stay happening.

⁵⁰Had one guy name Joseph. He one a da National Council guys. He good an everytime do da right ting.

⁵¹He come from Arimatea, Judea side. Wen da odda guys wen like kill Jesus, Joseph neva vote wit dem. He trus God, an stay waiting fo him fo come King.

⁵²He go in front Pilate, an aks him fo Jesus body.

⁵³He take Jesus down from da cross, wrap him up inside one linen cloth, an put him inside one cave somebody wen cut inside da rock fo bury somebody, but neva get one mahke guy inside yet.

⁵⁴Dat day was da Day Fo Make Ready Fo Da Passova, an da Rest Day almos come.

⁵⁵Da wahines dat stick wit Jesus from Galilee side, dey go wit Joseph, an see da cave, an how dey put Jesus mahke body inside.

⁵⁶Den dey go home fo make da spices an da perfume ready fo his body. On da Rest Day dey rest, jalike da Bible say fo do.