Read Hawaii Pidgin Luke 24 Bible Online

Luke 24 - Hawaii Pidgin bible

Luke 24

¹Sunday, da first day in da week, befo da sun come up, da wahines bring da spices dey wen make ready, an go by da cave.

²Dey see da big stone Jesus friends wen use fo close da cave. But stay on da side now.

³Dey go inside da cave, but da Boss Jesus, his body no stay dea.

⁴Dey no can figga dat. Right den an dea two guys stand dea by dem. Da guys clotheses stay shining.

⁵Da wahines stay real scared. Dey go down on dea knees, an ony look da groun. Da two guys tell um, “How come you wahines stay looking fo da guy dat stay alive, ova hea aroun da mahke guys?

⁶Jesus not hea; he wen come back alive! Rememba, he wen tell you guys dis wen he still stay wit you guys Galilee side.

⁷He wen say, ‘I Da Guy Dass Fo Real. Dey gotta turn me ova to da bad guys. An dey goin kill me on top one cross. But day numba three, I goin come back alive!’-”

⁸Den da wahines rememba wat Jesus wen say.

⁹So dey wen come back from da cave, an dey tell all dat stuff to Jesus eleven guys an to da odda peopo.

¹⁰Mary da Magdala wahine, Joanna, James mudda Mary, an da odda wahines dat wen go wit dem, dey tell all dis stuff to da guys dat Jesus was goin send all ova da place.

¹¹But dem guys, dey neva believe wat da wahines say, cuz sound like dey wen make um up.

¹²But Peter wen get up an run to da cave. He bend down, an see ony da grave cloths dea. Den he go way, an he no can figga bout wat wen happen.

¹³Dat same day had two a Jesus guys wen go one small town name Emmaus, bout seven miles from Jerusalem.

¹⁴Dey stay talk bout all da stuff dat wen happen.

¹⁵So dey talking lidat, an you know wat? Jesus come, an walk wit dem.

¹⁶But he neva let um know who him.

¹⁷He aks um, “Wat you guys stay talking bout now wen you walking? Dey stand dea, an dey hang dea face.

¹⁸One a dem, name Cleopas, tell him, “You must be da ony guy inside Jerusalem dat donno all da stuff dat jus wen happen ova dea.”

¹⁹He say, “Wat stuff?” Dey say, “Da stuff dat dey wen do to Jesus, da guy from Nazaret. He one guy dat talk fo God. Wat he wen say an do in front God an all da peopo wen show he get power.

²⁰Da main pries guys an our leada guys wen turn him in fo mahke. Den dey wen kill him on top one cross.

²¹We wen tink he da guy dat goin cut loose da Israel peopo from da power da bad kine stuff get ova dem. Dis wen happen day befo yesterday.

²²Some wahines dat stay wit us wen blow our minds, cuz dey wen go by da cave dis morning, befo da sun come up.

²³But dey neva find his body inside dea. Dey wen tell us dat dey wen see someting from God -- had angel guys dea, dat wen say Jesus stay alive!

²⁴Some a our guys wen go to da tomb. Everyting stay jalike da wahines say. But dey neva see Jesus body.”

²⁵Den Jesus tell da two guys, “You guys no tink! You hard head, cuz you guys no trus all da stuff da guys dat wen talk fo God wen say!

²⁶Dey say dat da Spesho Guy God Goin Send gotta suffa all dis kine stuff, an afta, he goin come real awesome, yeah?”

²⁷An den Jesus teach dem everyting da Bible wen say bout him from befo time. He start wit da stuff Moses wen write down inside da Rules, an den all da odda guys dat wen talk fo God, wat dey wen write down.

²⁸Den dey come near Emmaus, da small town, an Jesus ack like he going litto bit mo far.

²⁹But dey tell him, “Stay hea wit us, cuz pau hana, an dark awready. So he go inside da house, fo stay wit dem.

³⁰He sit down by da table fo eat wit dem. He take da bread, an tell God he good heart fo give um da bread, an broke da bread. Den he wen give um to dem.

³¹Den jalike dea eyes wen come open, an den dey wen know who he was. But right den an dea he wen disappear.

³²Den dey tell each odda, “Ho! Our hearts was beating fast, all da time he stay talking wit us on top da road, an wen he showing us da stuff from da Bible from befo time, yeah?”

³³Right den an dea dey wen stand up, an dey wen go back Jerusalem. Dey find Jesus eleven guys an da odda guys all togedda.

³⁴Da eleven guys say, “Da Boss Jesus wen come back alive, fo shua! Simon wen see him!”

³⁵Den da two guys tell um wat wen happen by da road, an dat dey wen know him wen he broke da bread.

³⁶Wen dey telling Jesus guys dis, ho! Jesus stand dea wit dem! He say, “No scared. I like you guys stay good inside.”

³⁷But dey real, real scared! Dey tink dey seeing one ghost!

³⁸He tell um, “How come you guys all scared? Why you no trus me?

³⁹Look my hands an my feet. Try touch me, an see dat dis me, fo shua! One ghost no mo bones an skin, like you guys see I get.”

⁴⁰He show dem his hands an feet.

⁴¹Dey still no believe, cuz dey all mix up inside. Dey feel real good inside, but same time, dey stay all max out. He tell um, “You guys get someting fo eat?”

⁴²Dey give him one cook fish.

⁴³He take um an eat um in front dem.

⁴⁴He tell um, “All dis happen jalike I wen tell you guys wen I stay wit you. Everyting Moses wen write inside da Rules, an everyting da odda guys dat wen talk fo God wen write down, an everyting dat get inside da Songs fo God -- all da stuff dat stay from befo time inside da Bible, all dat, talk bout me! An everyting dey wen write, goin happen!”

⁴⁵Den he wen help dem undastan da Bible.

⁴⁶He tell um, “Dis wat dey wen write, ‘Da Christ guy, da Spesho Guy God Goin Send, he goin suffa an mahke, an den come back alive on day numba three afta he mahke.

⁴⁷Afta dat, his guys goin teach all da diffren peopos inside da whole world bout Christ guy, da Spesho Guy God Wen Send. Dey goin tell da peopos dey gotta come sorry fo all da bad kine stuff dey doing, an pau do um. So den, God goin let go da peopos an hemo dea shame fo all da bad kine stuff dey wen do. His guys goin go teach lidat cuz dey his guys an dey get his power, an dey goin start Jerusalem side.’

⁴⁸You guys wen see all dis stuff dat wen happen, an you goin tell da peopo bout um.

⁴⁹I goin send you guys wat my Fadda wen promise you. So stay hea inside Jerusalem till you guys get da power dat come from God in da sky.”

⁵⁰Den Jesus take his guys outside Jerusalem, Betany side. He hold up his hands an aks God fo do good tings fo dem.

⁵¹Same time wen Jesus stay aksing God fo do good tings fo dem, he start fo go up inside da sky.

⁵²Den dey all go down on dea knees fo show Jesus love an respeck. Den dey go back to Jerusalem. An dey stay real good inside.

⁵³Dey stay inside da temple yard, praying an telling God how good he stay.