Read Hawaii Pidgin Luke 8 Bible Online

Luke 8 - Hawaii Pidgin bible

Luke 8

¹Afta dat Jesus wen go thru da big an da small towns, an he teach da Good Stuff bout how peopo can get God fo dea King. Da Twelve Guys wen go wit him.

²Befo time Jesus wen make some wahines come good from da bad kine spirits an all kine sick. Dey all wen go too: Mary da Magdala wahine, dat had seven bad kine spirits dat wen take ova her befo, an Jesus wen make um let her go.

³An Joanna, Chuza's wife, she wen go. (Chuza, he da guy dat stay in charge, King Herod's house.) An Susanna, an plenny odda wahines, dey all wen go too. Da wahines wen use dea own money fo help take care Jesus dem.

⁴Plenny peopo stay coming by Jesus from plenny towns, an he wen teach um wit one story.

⁵He say, “You wen hear da story bout da farma guy? He wen go plant seed. He throw da seeds all ova da groun fo plant. Some seeds fall down by da side da trail. Da peopo wen walk on top um, an da birds wen go eat um up.

⁶Some seeds fall down on top da rocks, an grow, an den dry up, cuz no mo water inside da dirt.

⁷Odda seeds wen fall down inside da kine bushes wit kuku. Da seeds an da bushes grow up togedda, an da bushes wit kuku choke um.

⁸Odda seeds, dey fall down inside da good dirt, an dey wen grow good, an come up plenny, one hundred times mo den da farma wen plant.” Afta dat Jesus say, “If you guys hear dis, den tink bout um!”

⁹Da guys Jesus teach wen aks him, “Wat dis story mean?”

¹⁰He tell, “God let you guys know all da stuff bout how he stay King. But I teach da odda peopo wit stories, so jalike da Bible say, ‘dey see, but dey no can see fo real kine. Dey hear, but dey no can hear fo real kine.’-”

¹¹Den Jesus tell, “Dis wat da story mean. Da seed, dass wat God say.

¹²Da seeds dat fall down on top da trail, dass jalike da peopo dat hear. But da Devil come take away wat God say from inside dea heart, so dey no can trus God. Dass why God no can take um outa da bad kine stuff dey do.

¹³Da seeds on top da rocks, dass da peopo dat take wat God say, an dey stay good inside wen dey hear um. Dey trus God litto bit, but wen get hard time dey pau trus, cuz dey no mo root, jalike da seeds on top da rocks.

¹⁴Da seeds dat fall down inside da bushes wit kuku, dass da peopo dat hear, but den dey worry plenny, an dey like come rich an get plenny stuffs, an dey like play aroun all da time. All dat stuff grab um, an choke um. Dey no rememba wat God say, jalike da seeds dat no mo wheat cuz dey stay inside da bushes wit kuku.

¹⁵But ho! Da seeds dat fall down inside da good dirt, dass jalike da peopo dat hear an rememba wat God say. Dey get good heart, do da right ting, an no give up. Dey jalike da seeds dat give good kine wheat.”

¹⁶“You no light one lamp an cover um wit one bucket, o put um unda da bed. No way! You goin put um on top one shelf so da guys dat come inside dea can see da light.

¹⁷Cuz everyting dat stay hiding, bumbye God goin show um, an everyting dass hard fo undastan he goin make um clear, so da peopo can undastan.

¹⁸Tink! You gotta lissen good! Da guy dat lissen good goin undastan plenny, but da guy dat no lissen good, God goin take away everyting he tink he know.”

¹⁹Dat time Jesus mudda an bruddas wen come fo see him, but dey no can come near him cuz get choke plenny peopo ova dea.

²⁰One guy tell Jesus, “Eh, yoa mudda an yoa bruddas, dey outside, an dey like talk to you.”

²¹Jesus tell da guy, “My mudda an my bruddas? Da peopo dat hear wat God say an do um, dey da ones az my mudda an bruddas fo real.”

²²One time Jesus wen tell his guys, “We go da odda side da lake.” So dey go inside da boat an wen start fo go.

²³Wen dey stay sailing, Jesus wen sleep. One big wind storm wen come down on top da lake, an da waves was bussing ova da boat, so da boat almos wen huli. Dey was in bad shape.

²⁴Da guys wen go wake Jesus up, an say, “Eh, Boss! We goin mahke!” Jesus get up. He scold da wind an da big waves. Da storm wen pau, an everyting come nice.

²⁵He tell his guys, “How come you guys no trus me?” Dey come real scared. Dat blow dea minds. Dey tell each odda, “Eh, who dis? Even da wind an da waves do wat he tell um!”

²⁶Dey wen sail da odda side da lake from Galilee, wea da Gerasa town peopo get dea fields.

²⁷Jesus wen go on top da beach. One guy from dat town wen come dat get some bad kine spirits in charge a him. Long time dat guy neva wear clotheses o stay inside one house, but he stay inside da caves wea dey put da mahke guys.

²⁹(28-29) Plenny times befo, one bad spirit wen grab um. No matta if da guy had chains on his hands an feet, an one nodda guy wen watch um real good, he still wen broke da chains. An da bad spirit wen make da guy go odda places wea nobody stay. So wen da spirit spock Jesus, da guy yell, an fall down by Jesus feet. Jesus tell da bad spirit, “Let go da guy!” Da spirit yell, “Eh, wat you like do to me, Jesus? Da God Dass Mo Importan Den All Da Odda Gods, I know you his Boy! I beg you, no hurt me!”

³⁰Jesus aks da guy, “Wat yoa name?” He tell, “My name ‘Army.’-” He say dat cuz uku paila bad kine spirits wen take ova him.

³¹Da bad kine spirits, dey beg Jesus plenny times fo no make um go suffa inside da Devil's Deep Dark Hole.

³²Had plenny pigs dat stay grinding on top da hill. Da bad kine spirits wen beg Jesus, “If you go make us let da guy, we like go take ova da pigs, yeah?” Jesus tell um, “Go!”

³³So da bad kine spirits wen let go da guy, an go take ova da pigs. An den all da pigs wen run down one steep hill, an fall inside da lake, an drown.

³⁴Wen da guys taking care da pigs wen see wat wen happen, dey wen run go tell everybody inside da town an all ova da place wat dey wen see.

³⁵All da peopo wen come fo look. Wen dey come by Jesus, dey spock da guy, an he no mo da bad kine spirits now. He stay sitting by Jesus feet wit clotheses on, an he tink good stuff now. An all da peopo wen come real scared.

³⁶Da guys dat wen see wat wen happen, dey tell da peopo bout da guy dat da bad kine spirits wen take ova, dat he stay good now.

³⁷Den all da peopo from aroun Gerasa town aks Jesus fo go way from dem, cuz dey real, real scared. So he go inside da boat an go way.

³⁸Da guy dat no mo bad kine spirits now, he wen beg Jesus if he can go wit him, but Jesus tell him, “No, brah. No can.” Jesus tell,

³⁹“Go home. Tell how God wen help you plenny.” So da guy go way an tell all ova da town how Jesus wen help him plenny.

⁴⁰Wen Jesus come back, plenny peopo feel good inside fo see um, cuz dey stay waiting fo him.

⁴¹Had one one leada guy from da Jewish church, name Jairus. Right den an dea he wen come an go down by Jesus feet. He beg Jesus fo go his house,

⁴²cuz his ony girl, bout twelve years old, litto mo mahke ova dea. Wen Jesus stay going, get plenny peopo stay jamming him.. ...

⁴³Had one wahine ova dea dat stay bleeding twelve years. She wen pay everyting she get to da doctas, but nobody can make her come good.

⁴⁴She wen come behind Jesus, touch his clotheses. Right den an dea she wen pau bleed.

⁴⁵Jesus say, “Who wen touch me?” Everybody tell him, “Not me!” Peter say, “Boss, get uku paila peopo aroun you, jamming agains you.”

⁴⁶But Jesus tell, “Somebody wen touch me. I know, cuz power wen go out from inside me.”

⁴⁷Den da wahine wen know dat dey goin find out, an she come an go down by Jesus feet, shaking real hard. In front all da peopo she wen tell how come she wen touch him, an how quick time she wen come good.

⁴⁸Jesus tell her, “Sista, you trus me, dass why you come good awready. Go. Now yoa heart can stay rest inside.”

⁴⁹Wen Jesus still talking, one guy come from Jairus house, an say, “Yoa girl mahke awready. No need bodda da teacha no moa.”

⁵⁰Wen Jesus hear dat, he turn aroun an tell Jairus, “No scared, ony trus me, an she goin come good.”

⁵¹Wen Jesus wen come Jairus house, he ony let Peter, John, an James, an da fadda an mudda go inside wit him, an no odda peopo.

⁵²Same time all da peopo wen cry an moan fo her. Jesus tell, “Stop crying! She not mahke, she ony stay sleeping.”

⁵³An dey all wen laugh an make fun a him, cuz dey know she mahke.

⁵⁴But Jesus take her hand an say, “Eh litto girl, get up!”

⁵⁵Right den an dea her life wen come back, an she wen get up. Den Jesus tell um, “Give her someting fo eat.”

⁵⁶An her fadda an mudda, wen blow dea minds. But Jesus tell um, “Eh! No tell nobody wat wen happen, aah.”