Read Hawaii Pidgin Deuteronomy 1 Bible Online

Deuteronomy 1 - Hawaii Pidgin bible

Deuteronomy 1

¹Dis, wat Moses wen tell all da Israel peopo. Dat time, dey all wen stay inside da boonies on da east side da Jordan Riva, inside da Jordan Valley. Dass across Suf, wit Paran on one side an Tofel, Laban, Hazerot, an Dizahab on da odda side.

²You know, fo go Mount Sinai to Kadesh Barnea, take eleven days, even if you go da long way on da Mount Se`ir road.

³But dat time, was 40 year afta da Israel peopo come outa Egypt, an was winta time, wen Moses tell da Israel peopo eryting Yahweh tell him he suppose to tell dem.

⁴Moses tell um dis afta dey wen win ova Sihon, da king fo da Amor peopo dat stay inside Heshbon, an afta dey win ova Og, da king fo da Bashan peopo dat stay inside Ashtarot an Edrei.

⁵From da east side a da Jordan Riva inside Moab, Moses start fo make God's rules mo easy fo da peopo undastand. He tell:

⁶“Wen us guys stay Mount Sinai side, oua God Yahweh wen tell us, ‘You guys stay ova hea by dis mountain long time awready.

⁷Take all yoa stuffs an go up inside da hills wea da Amor peopo stay. Den go wea da peopo dat live nea dem stay, inside da Jordan Valley, an da small hills on da west side, an da Negev boonies sout side, an da Mediterranean Sea coast. Go wea da Canaan peopo stay, den go nort side to da Lebanon mountains, den go east side all da way to da big Eufrates Riva.

⁸Yahweh tell, “Look, I give you guys all dis land awready. Go inside dea an use da land, cuz I wen make one strong promise to yoa ancesta guys Abraham, Isaac, an Jacob, an to dea kids an grankids an you guys.”

⁹“Befo us guys leave Mount Sinai, I Moses wen tell you guys, az too hard fo me stay in charge all you guys by myself.

¹⁰Yoa God Yahweh wen make you guys come plenny peopo awready. Az why today you guys stay plenny jalike da stars inside da sky.

¹¹I like Yahweh, da God fo yoa ancestas, make you guys come one tousand times mo plenny, an do plenny good kine stuff fo you guys, jalike he wen make promise fo do befo time.

¹²But I no can take care all you guys problems all by myself, an wit all da stuff you guys worry bout, an da stuff you guys squawk bout, wit nobody fo help me.

¹³So you guys pick some guys dat you know dey know wat fo do erytime, an dat undastan plenny stuff, an peopo get plenny respeck fo dem. Pick some fo ery one a da twelve ohanas. Den I goin make dem yoa leadas.

¹⁴“So you guys tell me, ‘Az good, do wat you tell.’

¹⁵“Den I take da leada guys from yoa ohanas, guys dat know wat fo do erytime an you guys get respeck fo dem. I make dem stay in charge a you guys. Some a dem stay in charge a one tousand peopo, some in charge a one hundred peopo, some in charge a fifty, an some in charge a ten. Dey da main guys fo all da twelve ohanas.

¹⁶Dat time, I wen tell yoa judge guys wat dey gotta do: Dey gotta lissen good wat da peopo say wen dey make argue wit each odda, an do wass right fo dem, no matta dey make argue wit anodda Israel guy, o wit somebody dass not one Israel guy.

¹⁷No make to one guy mo betta den to anodda guy. Lissen, no matta if he one importan guy o one guy dass not importan. No scared dem, cuz God da one goin help you figga wass right, an you stay do um fo him. If you donno wat fo do, den bring dem by me Moses, an I goin lissen.

¹⁸Mount Sinai time, I wen tell you guys eryting you guys gotta do.

¹⁹“Den, jalike wat oua God Yahweh wen tell us, we go from Mount Sinai to da hills inside da Amor peopo's land. We go thru da big an scary boonies dat you guys wen see. Den we reach Kadesh Barnea.

²⁰So I tell you guys, ‘All us guys stay come by da hills inside da Amor peopo's land. Dis, da land oua God Yahweh start fo give us.

²¹Look! Right dea, dass da land dat oua God Yahweh stay give you guys awready! Go take um ova, jalike Yahweh, da God oua ancesta guys wen pray to, wen tell you guys. No scared. No lose fight.’

²²Den all you guys come by me an tell, ‘Send some guys dea firs fo look da land, an den come back an tell us da way we goin go up, an da towns we goin go inside.’

²³“Dat wen sound good to me, so I pick twelve guys fo go, one guy from ery big ohana.

²⁴Da guys wen go up country, all da way to da Eshkol Gulch, an check um out wat stay ova dea.

²⁵Dey take some a da stuff dat grow ova dea, an bring um back by us. Dey tell us, ‘Az good, da land dat oua God Yahweh start fo give us.’

²⁶“But you guys, you neva like go dea. You guys go agains wat yoa God Yahweh tell you guys fo do.

²⁷You guys sit inside yoa tents an grumble. You guys tell, “Az cuz Yahweh hate us! He wen take us outa Egypt fo turn us ova to da Amor peopo, so dey can wipe us out!

²⁸Wea we goin go, aah?! Oua bruddas dat wen go look da land make us lose fight. Dey tell, ‘Da peopo mo big an mo tall den us. Dea towns stay big. Dey get big wall dat go up inside da sky. We even see giant guys ova dea -- da ones dat come from Anak!’-”

²⁹“Den I tell you guys, ‘No need shake and stay scared a dem!

³⁰Oua God Yahweh, he da One goin go in front you guys. He da One goin fight fo you guys, jalike he wen fight fo you guys inside Egypt. You guys wen see dat awready.

³¹An inside da boonies, you guys wen see yoa God Yahweh take care you guys, like one fadda carry his boy inside his arms. He bring you guys all da way to dis place.

³²“No matta oua God Yahweh do all dat, still yet you guys no trus him.

³³Yahweh wen go in front you guys inside one fire nite time, an inside one cloud day time. He even find place wea you guys can make camp nite time! Az how he show you guys wea fo go.

³⁴“But Yahweh hear wat you guys tell, an he come huhu, an he make one strong promise.

³⁵He tell, ‘No mo nobody from dis bad peopo dat stay alive now, goin see da good land I wen promise fo give yoa ancestas.

³⁶Ony Caleb, Jefunneh's boy, he stay tight wit me, Yahweh, all da way. Cuz a dat, he goin go inside dat land. An I goin give him an his kids, da ones dat come from him, da land wea he wen walk on top.’

³⁷Cuz a you guys, Yahweh come huhu wit me, Moses, too. He tell me, “Not even you goin go inside da land.

³⁸But yoa helpa guy, Joshua, Nun's boy, he goin go inside dea. Talk to him, give him good kine words, cuz he goin lead da Israel peopo fo take ova da land I goin give dem.”

³⁹An Yahweh tell da peopo, “You guys even tell dat odda guys goin make yoa litto kids prisonas, no matta dose kids still yet donno wass good an wass bad. But dose kids goin go inside da land. I goin give um to dem, an dey goin own um.

⁴⁰But you guys, turn aroun an go back inside da boonies on top da road fo go by da Red Sea.’

⁴¹“Den you guys tell me, ‘Fo shua, us guys wen do someting bad agains Yahweh! Now we goin go up fight, jalike oua God Yahweh tell us fo do!’ So all you guys wen take yoa stuffs fo fight, an tink az not hard fo go up dea inside da hills.

⁴²“But Yahweh tell me, ‘Tell dem, no go up dea fight, cuz I no goin go wit dem. Da guys dat stay agains dem goin win ova dem.’

⁴³“So I wen tell you guys, but you guys no like lissen. You guys go agains wat Yahweh tell you. You guys get big head an you go up inside da hills.

⁴⁴But da Amor peopo dat live inside dose hills wen come out fight you guys, an dey make you guys run away, jalike dey plenny bees. Dey bus up you guys all da way from da Se`ir Range to Hormah town.

⁴⁵Den you guys come back cry in front Yahweh. But he no lissen wen you guys cry, he ony make deaf ear to you guys.

⁴⁶Az why you guys stay dea Kadesh town long time.